Капиталистик қадриятлар инсоний қадриятларни йўқ қилади
بسم الله الرحمن الرحيم
Роя газетаси:
Капиталистик қадриятлар инсоний қадриятларни йўқ қилади
Исмоил Ваҳвоҳ қаламига мансуб
АҚШ кўчалари, мактаблари, университетлари ва черковларида тўсатдан ўқ узиб, оммавий қотилликни содир этишга бўлган ишқибозлик ҳолатлари тез-тез учрамоқда… Уларнинг навбатдагиси Флорида штати Паркленд шаҳридаги ўрта мактабда содир этилди ва унда 17 нафар шахс ҳалок бўлди. Ҳеч шубҳа йўқки, айни турдаги қонли сериалларнинг охирги қисми йўқ бўлиб, ҳеч қачон тугамайди. Айни қонли сериалда бош ролни ижро этган ўн тўққиз ёшли йигит ҳам оммавий қотилликка ишқибоз бўлган манякларнинг сўнггиси эмас. Чунки ақллари мана шундай қотиллик сақофати билан обдан суғорилганлар жуда кўп бўлиб, улар қурол тепкисини босиш билан ҳузурланишади. Улар Жиноят содир этиш учун алоҳида майдон қидириб топишни ҳам, кимларни қурбон қилишни ҳам билади…
Бу турдаги ҳодиса содир этилди дегунча, бутун ахборот воситалари, сиёсатчилар ва инсон ҳуқуқлари ҳимоячиларининг мамлакатда одамлар қўлида қуроллар кенг тарқалаётгани, қурол топиш жуда осонлиги тўғрисида гап сотишаётганини кўрасиз. Улар бундай ҳолатларни бартараф этиш учун қонуний чора кўрилишини, қурол савдосига чек қўйишни талаб қила бошлайди.
Улар ўз хулосалари тўғрилигини исботлаш учун Америкадаги мана шундай тўсатдан содир этилган қотиллик ҳодисаларини бирма-бир санай бошлайдилар… Яъни, ҳодиса санаси, қурбонлар сони, қотилнинг ёши нечадаю, қаерлик бўлгани ҳақида гапириб, бу ҳодисалар сабабини қурол-яроқнинг кенг тарқалиши билан боғлашаётганини кўрасиз.
АҚШ ташқарисидаги ҳолатга келсак, Америкадаги мана шундай қотиллик ҳодисалари кўплаб халқларнинг жароҳатини қонатмоқда. Чунки улар ушбу маняклик сақофатининг қурбонлари бўлишди ва ҳамон шундай бўлмоқдалар. Зотан, Америка ҳукмдорларининг ўзлари маняклик билан шуғулланиб, ташқи сиёсатларини ушбу халқларга қарши йўналтиришмоқда. Унинг ташқи сиёсати касофатидан юз минглаб, ҳатто миллионлаб қурбонлар, ярадорлар, касаллар ва қочқинлар келиб чиқди… Бу қурбонларни Вьетнам, Филиппин, Никарагуа, Панама, Ироқ, Афғонистон, Сомали ва Салвадорда санаб тугатиб бўлмайди!
Аммо АҚШ ичкарисидаги маняк қотиллар содир этаётган жиноятлар билан, унинг ташқарисида содир этилаётган жиноятларни бир-бирига боғлиқ, деб ҳисоблайдиганлар жуда озчиликни ташкил қилади. Ваҳоланки, ҳукмдорлар, сиёсатчилар, ғарблик ва америкалик қарор соҳибларининг – хусусан, ўз юртлари ташқарисида – содир этаётган жиноятлари АҚШ ичкарисидаги маняк қотиллар содир этаётган жиноятлардан ваҳшийроқ ва қонхўрроқдир, қурбонлари ҳам жуда кўп.
Бу озчилик қатлам – бир тарафдан капиталистик Ғарб қадриятларига, унинг ирқчилик ва мустамлакачилик назариясига, иккинчи тарафдан индивидуал (якка шахслар) қадриятларга, этник дискриминация ва такаббурликка, қолаверса бу қадриятлардан келиб чиққан руҳий касалликларга бирров назар ташласа, шахслар жинояти билан ҳукмдор ва давлатлар жинояти ўртасидаги боғлиқликни кўради.
Ҳа, бутун капиталистик Ғарб, хусусан, Америка дунё халқларига қарши содир этаётган ўз жиноятларини оқлаш учун турли баҳона ва дастаклар ўйлаб топишда моҳир. 1950 йилда АҚШ ташқи ишлар Вазирлигининг режалаштириш хизмати раиси Пол Чич бундай деган: «Америка универсал (бир неча хил ишни қила оладиган) кучга эга. Шу боис ўзимиз учун универсал душманни пайдо қилишимиз керак. Бу душманни шундай бир шайтон қилиб тасвирлайликки, Американинг бошқа давлатлар ишларига аралашуви олдиндан оқлансин, гўё бу аралашувни бутун дунёни қамраётган хавфдан ҳимояланиш ҳаракати қилиб кўрсатайлик». Мана, биз бугун Американинг Исломга қарши уруш олиб бориш учун уни шайтон қилиб кўрсатаётганига гувоҳ бўляпмиз.
Американинг ўзида эса, очкўз манфаатпараст капиталистик қадриятлар ва мутакаббирона миллатчилик қарашлари Америка жамиятида ҳокимият устидан янги бир ҳокимиятни пайдо қилди… Бу эса, миллатчи мафия ҳамда криминалистлар ҳокимиятидир… Улар Америка тарихида чуқур илдиз отган миллатчи гуруҳларнинг давоматчилари бўлиб, йирик сиёсатчи ва капиталистларга хизмат қилишади, баъзилари ўшалардан бири бўлади.
Бироқ, бугун инсоният олдида улкан муаммо бўлиб турган бир муҳим савол бор: Хўш, инсон қонини оқизиб, ҳар томондан унинг хавфсизлигини вайрон қилаётган ушбу жиноятларга қандай чек қўйилади ўзи?!
Муаммо – бир жиҳатдан, асли капиталистик мафкура билан унинг қадриятлари бўлса, иккинчи томондан, капиталистик давлатларнинг олам устидан ҳукмронлик қилишидир. Ушбу муаммонинг ечими ҳам шу ерда. Яъни руҳий, маънавий, ахлоқий ва инсоний қадриятлар моддий қадриятлар устидан – уларни бекор қилмаган ҳолда – юқори турадиган янги ҳазорий альтернатив яратиш керак. У шундай бир ҳазоратки, унда олий қадриятларни ўзида мужассам этган бошқа бир давлат ва бошқа бир Уммат башарият етакчилигини қўлга олади. Бу ҳазорат ва унинг фикрий ва башарий етакчилиги инсонни қаттол капиталистик ҳазорат ботқоғидан қутқариш амалиётини олиб боради ҳамда уни хавфсизлик ва хотиржамлик қирғоғига элтади. Бундай буюк вазифани адо этишга Исломдан бошқаси қодир эмас:
﴿وَمَا أَرْسَلْنَاكَ إِلاَّ رَحْمَةً لِّلْعَالَمِينَ﴾
«(Эй Муҳаммад), дарҳақиқат Биз сизни барча оламларга фақат раҳмат қилиб юбордик»[Анбиё 107]
Аммо бу нарса Ислом ва мусулмонларнинг худди кечаги каби бутун башариятга қайта етакчи бўлишларига боғлиқдир. Бунга жуда яқин қолди, инша Аллоҳ.
Роя газетаси сайтидан олинди
