Кофир қавмга тиз чўкмаган Ғазо қолди холосми?!

بسم الله الرحمن الرحيم

      Кеча бир фалсафий фикрни эшитиб лол қолдим! Унда сўзловчи шундай дейди: “Мен Ғазони яҳудийлар назорати остида қолган Ислом юрти деб ўйлар эканман. Йўқ, ундай эмас экан. Ғазо воқесидан аён бўлди-ки, барча Ислом ўлкалари сионистлар назоратида экан, ёлғиз Ғазодан бошқа!”

      Оламдаги мусулмон ўлкаларини ва устимиздаги раҳбарлар олиб бораётган телба-тескари сиёсатни кузатсак, юқоридаги фикрда жон бордек кўринади. Шундай эмасми? Муқаддас заминни сионистлар қўлига топширмаслик учун Ғазо гўдакларидан то қарияларигача – аёлу эркак бирдек ҳаракат қилаётгани олам аҳли кўз ўнгида. Аммо айни дамда армиясининг куч-қудратини дунёга намойиш қилаётган Исломий ўлкалар – Миср, Туркия, Покистон каби давлатлар раҳбарлари яҳудлар вужудининг ишончли тиргаги Америка сценарийси асосида пўписа сиёсати билан машғул бўлмоқда. Шу кунларда Эрон гўё ўз халқи ва мустақиллигини ҳимоя қилиш важидан хожаси Американинг рухсати билан саноғи аниқ ракета-дронлар орқали “Ғазо ҳимоячиси” ролини ўйнашга киришди, ҳатто бу ҳақда Америка сионистларни огоҳлантирди. Яъни Эрон дронлари қайси ҳудудларда қачон ҳужум қилишидан хабар берди. Бу ориятсиз, пасткаш малайлар бугун ўзларини Америка ва сионистларга  қарши ўкираётган шерлардек қилиб кўрсатаётгандек бўлсалар-да, аслида эчкилар маърашига шерлар овози фонограмма қилинди холос. Уларнинг тўғри баҳоси шуки, улар Ғазога ясама табассумли, тизгинлари эса Америка қўлида бўлган шоқоллардир холос. Улар мазлум умматга бефарқ хоинлардир. Ҳозир уларни бефарқ ва бетараф дейиш ҳам тўғри эмас. Тўғриси шуки, улар Ғазо қаттолларини қувватлаб дастаклаётган расволардир. Дунё кўз ўнгида бу хоинлар шармандалик тамғасини бошларида кўтараётган бир пайтда, Ғазодаги оналар шаҳид ўғлонларининг тобутини елкаларига олиб Аллоҳга қайтармоқдалар. Энг оғриқли ва аламлиси, барча малайлар ўзлари раҳбар бўлган юртлардаги армияни қўзғотмагани етмаганидек, кун сайин уйғониб келаётган умматнинг олдини сунъий чегаралар билан тўсмоқда. Чорасиз мўминлар намойишлар ва пикетларга чекланиб қолмоқда. Ёнаётган Ғазонинг ёшу қарилари, аёлу қизчалари билан бошқа юртлардаги умматни таққосласак, нафақат малай ҳокимлар шармандалигига, балки олам мусулмонлари аянчли ҳолатдалигига гувоҳ бўламиз. Ғазо азизларининг нуроний қариялари қўлидаги тош билан аждаҳога қарши курашга турганда, бошқа юрт қариялари нафл ибодатлар ва умраларда мусобақага кирдилар. Бизларнинг ёшларимиз таълим масканларида жинсий алоқа дарсларини олаётган чоғида, Ғазо гўдаклари яҳудийлар золимига хитоб қилиб, “Эй Нетаняҳу, сенинг ортингда Америка ва барча кофир давлатлар турган бўлса, бизларнинг ортимизда Оламлар Роббиси Аллоҳ турибди. Сенлардан ўлганлар жаҳаннамда, бизлардан ўлаётганлар жаннатдадирлар. Сенлар мағлубсан, ғалаба эса Аллоҳдан ва у биз ғарибларга, албатта, берилгувчидир инша Аллоҳ” дея оламни хижолатдан юзларини қизартириб ерга қаратмоқда.

      Шуларни мулоҳазасида айтар сўзимиз шуки, Ғазодаги уммат ўз поклиги ва шарафини сақлаб қолган соғлом Умматдир. Уларнинг вайроналари-ю харобалари бизларнинг кошоналардан қадри юксак ва ободдир. Уларнинг кўкатлардан безалган дастурхони, бизларнинг шоҳона тузалган дастурхонимиздан файзлироқдир. Уларнинг вайроналар остида қолган жасадлари макони, бизларнинг мақбаралармиз ичидан ёруғроқдир. Оналарининг шаҳид қилинган фарзандларини эслашлари, бизларнинг фахримиз бўлган олийгоҳлардаги ўғлонларимизни эслашимиздан кўра маънолироқдир. У заминда айтилаётган хитоблар, юртларимиз масжидларида сарой имомларининг мана бу раҳбарлар татбиқ қилаётган бузуқ низомларни хаспўшлаб қилаётган хутбалари ва ҳайзу нифос маърузаларидан минг чандон қимматлироқдир. Қулаган деворлар чангига зарб уриб таяммум билан тошлар орасида ўқиган намозлари, бугунги кўплаб нақши-нигорли масжидларда ўқилган намозлардан анча аълороқдир. Бу таққослашлар натижасидан юраклар увушмоқдаки, Охиратда Роббимизга рўбарў келганимизда қайси биримизнинг мақомимиз у азизлар мавқесига баробар бўларкин!!! Ахир, денгиз кўпиклари жўшқин дарёга баробар бўлурми?!

Шоир айтганидек:

Мен булут бағрига синчиклаб боқсам,

Селлари кўзимда бир намча йўқдир,

Ваҳшати тун ёрган йилдиримнинг ҳам,

Бардоши титраган бир шамча йўқдир.

Аллоҳ таоло айтади:

أَجَعَلْتُمْ سِقَايَةَ الْحَاجِّ وَعِمَارَةَ الْمَسْجِدِ الْحَرَامِ كَمَنْ آمَنَ بِاللَّهِ وَالْيَوْمِ الْآخِرِ وَجَاهَدَ فِي سَبِيلِ اللَّهِ ۚ لَا يَسْتَوُونَ عِندَ اللَّهِ ۗ وَاللَّهُ لَا يَهْدِي الْقَوْمَ الظَّالِمِينَ ‎

– “Сизлар ҳожиларга сув беришни ва Масжид-ал-Ҳаромни обод қилишни – Аллоҳга ва Охират кунига иймон келтирган ҳамда Аллоҳ йўлида жиҳод қилган зотлар(нинг амалларига) тенг, деб билдингизми?! Улар Аллоҳ наздида тенг эмаслар, Аллоҳ золим қавмни ҳидоят қилмас”.   (Тавба:17)

Ҳизб ут-Таҳрир Ўзбекистон матбуот бўлими аъзоси Зайниддин

16.04.2024й