بسم الله الرحمن الرحيم

Оддий ҳақиқатларни англаш ҳам инсонга ижобий таъсир қилади

Биз ҳаётимиздаги оддий ҳақиқатларга кўпинча эътибор қаратмаймиз. Зеро, улар жуда жўн ва оддий бўлишига қарамай, агар эътиборлироқ бўлиб қаралса, кўп нарсани тушуниш ва баъзи хираликлар ойдинлашиши мумкин. Масалан, қанчадан қанча одамлар узоқларини яқин қилиш учун самолётга чиқишади. Улар ўз ҳаётларини умуман нотаниш бўлган, ҳатто исмини ҳам билмайдиган учувчига ўйлаб ўтирмай топширишади. Ҳолбуки, унинг кўзланган манзилга соғ-омон етказиб олиб бориши ҳам 100% аниқ эмас, бунга ҳеч ким кафолат ҳам бера олмайди. Чунки дунёдаги йирик ва обрўли компаниялар ишлаб чиқарган энг ишонилган самолётлар ҳам ҳалокатга учраётганлиги тўғрисидаги хабарларни кўриб, эшитиб турибмиз. Ёки кемага чиққан одамларда ҳам худди шундай ҳолат. Тарихга назар ташласак, “Титаник” номли ўта ишончли ва ҳатто Худо ҳам чўктира олмайди, деб даъво қилинган кема биринчи сафаридаёқ океанга ғарқ бўлганини эшитмаган одам бўлмаса керак. Лекин шунча воқеликларни кўриб, билиб туриб ҳам одамлар ҳеч иккиланмай самолёт, кема, поезд ва бошқа транспорт воситаларига чиқиб, ҳаётларини ўзлари умуман танимаган, ҳатто исмини ҳам билмайдиган одамлар қўлига топширишмоқда. Ваҳоланки, ҳаёт жуда ширин, унинг баҳоси йўқ, одам учун энг қимматли матоҳ унинг жони.

Бироқ бугун баъзи мусулмонлар исломий ҳаёт кечиришга чақирилса, улар тезда шубҳа-гумонга борадилар. Улар ўз ҳаётларини Ислом бошқара олишига ишонишмайди, ваҳоланки, юқорида айтганимиздек, етти ёт бегонага ўйлаб ўтирмай ҳаётларини ишониб топшираверишади. Ўша етти ёт бегона манзилга соғ-омон етказа олишига ҳеч қандай кафолат бермагани ҳолида, Ислом инсонни икки дунё саодатига эришишига 100% кафолат берса ҳам, барибир қандайдир шубҳа-гумонларга боришади. Ислом тузуми инсонларни йўқдан бор қилган оламлар роббиси Аллоҳ Таоло тарафидан берилганлиги ҳам уларни қаноатлантирмайди. Ҳолбуки, улар буни жуда яхши билишади, Ислом ҳақ дин эканлигини ҳам эътироф этишади, аммо яна қандайдир шубҳа-гумонларга боришаверади. Ўша ўзлари танимаган етти ёт бегонага ишонганчалик Аллоҳнинг дини ҳаётларини бошқара олишига ишонишмайди. Ҳаётларини ўша етти ёт бегонага таваккал қилиб топширишади-ю, лекин Аллоҳга таваккал қилиб, ҳаётларини Исломга топширишга ўйланишади, яна ўша қандайдир шубҳа-гумонларга боришади.

Юқорида келтирилган воқеликлар ҳаётимизда учрайдиган воқеликлардан биттаси холос. Эътиборли кишига ҳатто энг майда нарсада ҳам ибрат бор. Кўриб турганимиздек, ҳаётда оддий кўринган нарсаларга ҳам ибрат кўзи билан қараш инсонни фикрлашга ва бунинг ортидан ўзи ҳали билмаган нарсаларни англаб етишига сабабчи бўлиши мумкин. Ва ҳатто шу кичкина ибрат ҳам инсон ҳаётига сезиларли таъсир кўрсатиши мумкин. Шундай экан, токи тирик эканмиз, токи ҳали вақтимиз бор экан, атрофимиздаги нарсалар ва бўлаётган воқеа-ҳодисаларга озгина эътиборлироқ бўлайлик, акс ҳолда бу дунёдан ҳеч нимани билмай, ҳеч нарсага қизиқмай ўтиб кетиб, кейин надомат чекиб юрмайлик.

Ҳизб ут-Таҳрирнинг Ўзбекистондаги медиа офиси.Фаррух.

01.01.2019