Шом қўзғолони аро йўлда қолди, етакчилар жасадлар устида рақсга тушмоқда
بِسْمِ اللَّـهِ الرَّحْمَـٰنِ الرَّحِيمِ
Роя газетаси:
Шом қўзғолони аро йўлда қолди, душманлар нафрати кучайди, «дўст» давлатлар ёрдамсиз қолдирди, етакчилар жасадлар устида рақсга тушмоқда
Абдулҳамид Абдулҳамид қаламига мансуб
Шом қўзғолони еттинчи йилнинг биринчи ойи охирига келиб, гарчи унда заифлик ва ҳолдан тойиш аломатлари кўриниб турган бўлса-да, у ҳамон мағрурдир. Тиз чўкишга мажбурлаш уринишларини рад этиб, турли-туман азоб-уқубатлар олдида ишониб бўлмайдиган даражада сабр-тоқат кўрсатмоқда, жангчи гуруҳлари етакчиларидан Пайғамбарлик минҳожи асосидаги Халифалик лойиҳасини ижро этиш ва Уммат талабини қабул қилиш билан тарихга татигулик иш қилишларига мунтазир бўлиб турибди, барчаларини Аллоҳни рози қиладиган ва икки дунё саодатини рўёбга чиқарадиган йўлга етаклашга яроқли бўлган сиёсий етакчилик остида бирлашишни орзиқиб кутмоқда.
Ўтган ҳафтада қўзғолон душманларининг янги лойиҳа устида ишлашаётгани фош бўлди. Улар Шом аҳлининг нияти яққол кўриниб турган амалларга чек қўйишмоқчи. Бу ният, халқаро ҳамжамият келишувига қарши чиқиш ва башарият тақдирига ҳукмронлик қилаётган капиталистик Ғарб тузумини йўқ қилиб, ўрнига адолат, эзгулик, тинчлик, ҳидоят ва офият тузуми бўлмиш Ислом тузумини олиб келишдир.
Ғарб Москвада туриб берган навбатдаги баёноти билан ўзининг нақадар қабиҳлигини, қўзғолончиларни лақма, деб ўйлаётганини кўрсатди, Саудия ташқи ишлар вазири тилидан янграган бу баёнотида Ғарб Шом масаласини фақат режим раҳбарини ишдан олиб, режимнинг ўзини сақлаб қолиш масаласига айлантиришга уринаётгани намоён бўлди. Саудия бош вазири россиялик ҳамкасби билан ўтказган учрашувида етти йилдан бери тинмай гапирилавериб Шом аҳли қулоқларини том битказган сийқаси чиққан сўзини такрорлаб, «Менинг мамлакатим ҳамон Сурия келажаги Башар Асад эмас, деган эътиқоддадир», деди. (Би-Би-Си арабий 2017 йил 26 апрел чоршанба).
Россия бош вазирига келсак, у 29 апрелда «яқин кунлар ичида Остона сўзлашувларининг учинчи тури иш бошлашини, кун тартибига ўт очишни тўхтатиш, инсонпарварлик ёрдамларини етиб боришини таъминлаш, бундан ташқари, сиёсий амалиёт билан шуғулланишга муносиб замин тайёрлаш масаласини қўяжаги»ни таъкидлади. (Россия ТАСС ахборот агентлги 2017 йил 29 апрел шанба). Россия билан Саудиянинг қўзғолонга нисбатан позициялари бир-бирига зидлигига қарамасдан, у «Масала Сурия кризисини ҳал этиш билан боғлиқ экан, икки юрт ўртасида ҳал этиб бўлмайдиган зиддиятлар йўқ», деди. (Би-Би-Си арабий 2017 йил 26 апрел чоршанба).
Жорий май ойининг 3-4 кунларида ўтказилиши белгиланган Остона сўзлашувларидан кўзланган мақсад маълум эди. Бироқ бунга қарамасдан, Шарқул Авсат газетасининг «янги ижобий маълумотлар» манзарасида Остона сўзлашувларида қатнашишга гуруҳлар рози бўлганини бериши қизиқ бўлди. Бу «янги ижобий маълумотлар» ўт очишни тўхтатишга ҳамда ўт очишни тўхтатишни таъминловчи янги томонларнинг киришига боғлиқдир. Бундан олдин ўт очишни тўхтатишни таъминловчи томонлар Россия, Эрон ва Туркияга чекланган эди. Остонага келган мухолафат делегацияси аъзоси генерал Фотиҳ Ҳассун, журналистларга «янги «ижобий» омилларнинг музокаралар кун тартибига қўшимча қилинганини, бу омиллар конференция давомида расман ўрганилиб чиқилиши учун чақириқ сифатида, норасмий тарзда уларга юборилгани»ни таъкидлади. (Шарқул Авсат 2017 йил 30 апрел).
Делегация бундай таъкидлови билан, Россия ташқи ишлар вазири ўринбосари Михаил Богдановнинг шанба кунги таклифини қабул қилди. Дарҳақиқат, Богданов делегацияга келаси Остона учрашувида қатнашишга таклиф қилган ҳамда туркларни мухолафатга кафил бўлишларига чақирган эди. (Русиял Явм 2017 йил 30 апрел). Ваҳоланки, «Ал-Жазира» канали тарқатган хабарга кўра, режим билан сулҳ тузиш ва ўт очишни тўхтатиш музокараларига кафиллик қилаётган мана шу Россия учоқлари ёрдамида ўтган апрел ойи мобайнида Идлибда саккизта госпитал ва тиббий марказлар вайрон қилинган!
Эрдоганга келсак, айни ҳодисаларга жанговар аралашув унинг учун фақат битта жиҳатдан, яъни жанубий ҳудудларига бўлган «террористик» ташкилотлар таҳдиди жиҳатидан муҳим, холос. Зеро, баъзи кимсалар Шомдаги ғалабамиз Эрдоганнинг қўли билан келади, бошқасининг қўли билан эмас, деган хомхаёлда юрибди. Дарҳақиқат, Эрдоган ўзининг юрти ҳудудидан ташқарида кутилаётган навбатдаги ҳарбий амалиёт ҳақида изоҳ берар экан, «Вақти келганда нима қилишни ўзимиз яхши биламиз… бирор тунда кутилмаганда борамиз», деди. Сўнг «келаси мақсади Манбаж шаҳри эканини, АҚШ етакчилигидаги халқаро коалиция кучлари билан ҳамкорликда Раққа амалиётини амалга оширишга тайёрлигини» таъкидлади. (Онадўли агентлиги 2017 йил 29 апрел).
Турк режими Европа давлатларига шантаж қилиб босим ўтказишда Сурия қочқинлари масаласидан фойдаланмоқда. Жазоир билан Марокаш режимлари эса, Сурия қочқинлари масаласидан ораларидаги сиёсий ютуққа эришишда фойдаланишмоқда. Мисол учун, Марокаш 17-19 апрел кунлари Факик чегарабўйи шаҳридан эллик тўрт нафар қочқиннинг Марокашга ноқонуний тарзда киритиб юборганликда Жазоирни айблади. Марокаш ташқи ишлар вазирлиги чиқарган баёнотда «Жазоир бундай вазиятга нисбатан сиёсий ва ахлоқий жавобгарликни ўз зиммасига олиши керак»лиги қўшимча қилинди. Ўз навбатида, Жазоир ташқи ишлар вазирлиги ҳам жавоб қайтариб, бундай «ёлғон айблов»ни мутлақо инкор этишини, бу айбловдан Жазоирни таҳқирлашдан бошқа нарса кўзланмаганини таъкидлади ҳамда «Жазоир суриялик биродарлари билан ака-укалик вазифаларидан ҳеч қачон воз кечмайди», дея қўшимча қилди. (Евроньюс 2017 йил 24 апрел).
Сурия ичкарисида жуда ночор аҳволда қолган қочқинларга келсак, тиббий ва фуқаровий манбаларнинг билдиришича, атиги Раққа вилоятининг ўзида бир неча кун ичида 12 қочқин вафот этган, улардан саккиз нафари болаларни ташкил қилади. Ўша пайтда Идлибдаги Хон Шихунга қилинган кимёвий ҳужум ортидан шаҳар аҳолисидан жуда катта қисми қочиб чиққан эди. (Ал-Жазира 2017 йил 29 апрел шанба).
Энди фронтлардаги аҳволга тўхталадиган бўлсак, у ерларда ҳам ҳолат сиёсий ва инсоний аҳволлардан яхши эмас. Бунга сабаб, қонхўр режим кучлари сўнгги пайтда озод этилган шимолий Ҳама баладияларининг барчасини қайта қўлга киритди, уларнинг ортидан Ҳалфая ва Мусана баладияларини ҳам қўшиб олди, Ҳидоя университети ва пойтахтдаги Қобун квартали атрофидаги бир неча объектларни, Тишрин кварталидаги Ҳофиз кўчасидан маълум қисмини ўз назоратига олди. Буни иккала квартални кенг кўламда тинимсиз ҳаво ҳужумига тутиб, бомбардимон қилиш ва ракета отиб туриш билан амалга оширди.
Шундай бир пайтда, Шарқий Ғутада Аллоҳдан қўрқмайдиган кимсаларнинг фатволари билан биродарлар ўртасида аламли тўқнашувлар бўлиб, ўнлаб мужоҳид нобуд бўлди. Бу фатволар баъзан боғий-исёнкор, баъзан хоин кимсалар бўлгани учун мужоҳидлар ўртасида жанг қилиш зарур, улар ўртасидаги бундай жанг, режимга қарши жангдан зарурроқ, деган фатволар бўлди!!
Бугун Суриядаги мусулмонлар шу аҳволда. Душманлар ғарази кучаймоқда, «дўст» давлатлар мусулмонларни ёрдамсиз ташлаб қўйди, гуруҳ етакчилари мужоҳидларнинг жонсиз танаси устида рақсга тушмоқда… Бундай етакчиларни жуда кўпчилик инсонлар норози ҳолатда қарши олмоқдалар, уларда шаръан нима қилмоқ кераклиги ҳақида фикрлари тиниқлашган… Чамаси, ғазабнок кўча барча ўйинчи томонларга қарши қўзғалиб, ҳамма нарсани остин-устин қиладиган кун ҳам узоқ эмасга ўхшайди, чунки жинояткорлар истамасалар-да, Аллоҳ ҳақни рўёбга чиқариб, ботилни яксон этади.
Роя газетасининг 2017 йил 3 май чоршанба кунги 128-сонидан
