Сиз ким учун яшайсиз?

بِسْمِ اللهِ الرَّحْمٰنِ الرَّحِيم

Тасаввур қилинг, бир неча инсоннинг қўлига катта миқдордаги маблағ берилди ва уларга исталган нарсага сарфлаш имконияти тақдим қилинди. Улар маблағни сарфлаб бўлиб яна йиғилишди ва нималарга сарфлаганликлари тўғрисида барчага айтиб беришди. Шунда уларнинг бирлари бошқаларини ҳайратга солган бўлса, баъзилари ҳатто кулгили тарзда сарфлаганликлари, яна бошқалари ғазаблантирадиган ишларга ва бошқалари хурсанд қиладиган ишларга сарф қилганлари маълум бўлди. Энди ўз-ўзидан табиий бир савол вужудга келади. Пулни сарф этишдан чиқарилган хулосалар, яъни ҳайратланарли, ғазабланарли, кулгили ва ҳакозо баҳолар қаердан келиб чиқди? Бу саволга жавоб беришда инсонлардаги дунёқараш муҳим омил эканлигини айтиб ўтиш керак. Чунки дунёқараш худди кўзга тақилган кўзойнак мисоли қандай рангда бўлса уни тақиб олган инсон атрофни шундай рангда кўради. Демак, баҳоларда уларнинг дунёқарашлари муҳим.

Энди мисолни тўхтатиб асл мақсадга ўтамиз. Яъни сизу бизга Яратувчи томонидан маблағдан азиз бўлган умр, соғлик, ақл каби нарсалар берилганлигини эслатамиз. Буларнинг ҳам қандай сарф этилиши ва бу сарф этилишга баҳо беришда дунёқараш муҳим ўрин тутади. Агар дунёқарашингиз тўғри бўлса, бу умрни тўғри сарф қиласиз ва атрофдаги нарсаларга тўғри баҳо бера оласиз. Агар дунёқараш хато бўлса бунинг акси.

Дунёқарашнинг тўғри ёки нотўғри эканлиги унинг келиб чиққан асосига боғлиқ бўлади. Қайси асос тўғри бўлса, ундан келиб чиқадиган дунёқараш ҳам тўғри бўлади. Шунинг учун айта оламизки, исломий дунёқараш тўғридир. Чунки унинг асоси тўғри.

Исломий дунёқарашдан қарайдиган бўлсак, инсон Яратувчи учун яшамоғи шарт. Бу ҳар бир амал Буюк Зотнинг кўрсатмаларига мувофиқ бўлишини тақозо қилади. Буйруқларига бўйсуниш ва қайтариқларидан қайтиш Яратувчи учун яшашни англатади.

Бундай яшаш албатта инсонни бахтиёр қилувчи яшашдир. Чунки хурсандчилигингиз, мусибатларга сабр қилишингиз, буларнинг барчаси Яратувчига боғланади. Бундай яшашнинг натижаси ҳам маълум, кейинги ҳаётда Яратувчимиз Аллоҳ Таолонинг ваъдаларига мувофиқ мукофотлар кутади.

Ҳизб ут-Таҳрирнинг Ўзбекистондаги медиа офиси. Абдуллоҳ

02.05.2020й