Туркия ва Суриядаги табиий офатдан жабрланган мусулмон биродарларимизга ҳамдардлик
Туркия ва Суриядаги табиий офатдан жабрланган мусулмон биродарларимизга ҳамдардлик
بسم الله الرحمن الرحيم
6 феврал куни Туркия жанубидаги Қаҳрамонмараш вилояти ҳудудида, соат 4:17 да ўчоғи 7 км чуқурликда жойлашган 7,7 магнитудали зилзила рўй берди. Ер силкинишидан жами ўнта вилоят жабрланган. Бу ҳудудларда уч ой муддатга фавқулодда ҳолат эълон қилинган.
Зилзила Суриянинг шимолий ҳудудларига, жумладан Латақия ва Ҳалабга ҳам жиддий таъсир кўрсатди. Сурия соғлиқни сақлаш вазирлиги камида 1262 киши ҳалок бўлгани ва 2,3 мингдан ортиқ киши жабрланганини хабар қилган. Al Jazeera эса, расмий Дамашқ томонидан назорат қилинмайдиган, мухолифат кучлари назоратидаги ҳудудда 1400 киши ҳалок бўлиб, 2,7 мингдан ортиқ киши жароҳат олгани ҳақида хабар берган.
Ҳали ҳам давом этиб турган ушбу даҳшатли зилзилалар оқибатида ер билан яксон бўлган уйлар ва бинолар остида қолиб ҳалок бўлганлар ҳақидаги хабарлар қалбларимизни ўртади, кўзларимиз ёшга тўлди. Айниқса, ижтимоий тармоқларни тўлдириб юборган вайроналар остидан қутқариб олинаётган ёш гўдакларнинг видеолавҳаларини кўзга ёш олмай кўриш мумкин бўлмай қолди. Биз Ҳизб ут-Таҳрирнинг Ўзбекистондаги матбуот бўлими жамоаси Туркия ва Суриядаги табиий офатдан ҳалок бўлган мусулмон биродарларимизнинг оиласи ва яқинларига кўнгилларимиз маҳзун бўлгани ҳолида чуқур таъзиямизни изҳор қиламиз. Сиз азизларга Аллоҳ Таоло сабру жамил, офият берсин. Вафот этганларни ўз раҳматига олсин, Қиёмат кунидаги ҳисоб-китобини осон қилсин. Ушбу табиий офатда чеккан азоб-уқубатларини гуноҳларига каффорат қилсин. Турли даражада тан жароҳатлари олганларга комил шифо ато этсин. Зилзилалар натижасида мол-мулкидан айрилганларга ундан-да зиёдаси билан ўрнини тўлдириб берсин. Биз сиз азиз мусулмон биродарларимиз учун Аллоҳга кеча-ю кундуз дуодамиз. Ва шундай оғир дамларда барча ишини ташлаб беғараз ёрдамга ошиққан ҳар бир иймон эгасидан Аллоҳ рози бўлсин деймиз. Ушбу хизматларингиз учун Аллоҳ Таоло сиз азизларни бир неча баробар кўп ажрлар билан мукофотласин.
Албатта, Аллоҳнинг қазоси ҳақдир. Шундай дамларда биз Аллоҳнинг куч-қудрати олдида нақадар ожиз эканлигимизни ҳис қиламиз. Бу биз Ислом Умматини Унинг буйруқ ва тақиқларига амал қилиб яшашдан ўзга тўғри йўл йўқ эканлиги ҳақида фикрлашга ундайди. Зеро, устимизда содир бўлаётган ишларда – гарчи улар бизнинг наздимизда ёмондек кўринса-да – ақли расо кишилар учун ҳикмат ва ибрат бор. Биз қазо ва қадарнинг яхшиси ва ёмони Аллоҳдан эканлигига иймон келтирган уммат сифатида Аллоҳнинг бизга бераётган дарсини чуқур англаб етиб, ундан ибратланишимиз ўзимиз учун қилган энг катта яхшиликлардандир.
إِنَّ فِي هَذَا لَبَلَاغاً لِقَوْمٍ عَابِدِينَ
– “Албатта, бунда Аллоҳга ибодат қилувчи қавм учун етарли ибрат бордир”. (Анбия:106)
Сўзимиз якунида зилзила қурбонлари ва жабрланганларга чуқур ҳамдардлигимизни изҳор қилган ҳолда Аллоҳни рози қиладиган сўзни айтамиз:
الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ
– “Уларга бирор мусибат келганда айтадилар: “Албатта биз Аллоҳнинг бандаларимиз ва албатта Ўзига қайтажакмиз””. (Бақара:156)
Ҳизб ут-Таҳрирнинг Ўзбекистондаги матбуот бўлими
09.02.2023й
