Ҳукумат ва унинг идоралари ким билан ишламоқда: Уммат биланми ёки унинг душманлари биланми?!
Матбуот баёноти
Ҳукумат ва унинг идоралари ким билан ишламоқда: Уммат биланми ёки унинг душманлари биланми?!
Ҳизб ут-Таҳрир – Судан вилояти ҳижрий 1447 йил 27 ражаб (милодий 2026 йил 16 январ) куни Шимолий Кордофан вилояти маъмурий маркази – Убаййид шаҳридаги Катта масжид майдонида тадбир ўтказди. Унда Ҳизб ут-Таҳрир аъзоси, устоз Назир Муҳаммад Ҳусайн жума намозидан сўнг йиғилганларга нутқ сўзлади. Мазкур тадбир Ислом давлати бўлмиш Халифалик қулатилганининг қамарий 105 йиллик хотираси сабабли ташкил этилди. Устоз Назир ўз нутқида йиғилганларга фарзлар тожи бўлган Халифаликни ҳамда уни барпо этиш йўлида ҳаракат қилиш фарз эканини эслатди. Тадбирдан сўнг Судан хавфсизлик хизмати Ҳизб ут-Таҳрирнинг тўрт нафар аъзосини ҳибсга олди. Улар 2026 йил 18 январ, якшанба куни озод қилинди.
Бироқ 2026 йил 27 январ куни улар яна чақиртирилиб, Судан жиноят кодексининг 69-моддаси – «жамоат тинчлиги ва умумий осойишталикни бузиш» бўйича жиноий иш очилди. Улар томонидан ёлланган адвокат гаров эвазига озод қилиш ёки ишни тугатиш ҳақида илтимоснома билан мурожаат қилди. Аммо прокуратура Ҳизб ут-Таҳрир аъзоларига нисбатан терговни қайтадан ўтказиш тўғрисида кўрсатма берди. Қайта тергов якунида бош прокуратура айбловни кенгайтириб, ишга 63, 67 ва 126-моддаларни ҳам қўшди ҳамда уларни ўн кун муддатга ҳибсда қолдириш қарорини чиқарди.
Биз, Ҳизб ут-Таҳрир – Судан вилояти аъзолари, 2026 йил 28 январ куни «Исломга ва унинг ҳукмини ўрнатишга даъват қилиш жамоат тинчлиги ва осойишталигини бузишга айланиб қолдими?!» сарлавҳали матбуот баёноти чиқарган эдик. Унда ҳукумат ҳамда хавфсизлик хизматининг даъватни етказаётганларга нисбатан кўрсатаётган ажабланарли ва ғалати муносабатини кескин қоралаган эдик. Бироқ ҳукумат даъват аҳлига қарши курашда ҳамон оёқ тираб турибди ва уларга нисбатан ҳатто Исломнинг дўстлари тугул, душманларини ҳам ҳайратга соладиган уйдирма айбловларни тўқиб чиқармоқда. Жумладан, Судан жиноят кодексининг 63-моддасида қуйидагича баён этилган: «Кимки зўравонлик ёки жиноий куч орқали давлат ҳокимиятига қаршилик қилишга чақирса, тарқатса ёки тарғиб қилса, уч йилдан ошмаган муддатга озодликдан маҳрум қилиш ёки жарима, ёхуд ҳар икки жазо билан жазоланади».
Шунингдек, 67-моддада бундай дейилган: «Беш ёки ундан ортиқ кишидан иборат ҳар қандай тўпланишда куч намойиш этилса ёки куч, террор ёхуд зўравонлик қўлланса ва бундан кўзланган асосий мақсад қуйидагилардан бири бўлса, у ҳолда ушбу тўпланишда иштирок этган шахс тартибсизлик жиноятини содир этган ҳисобланади:
а) Бирор қонун ҳукми ёки ҳуқуқий чора ижросига қаршилик кўрсатиш;
б) Жиноий зарар етказиш, жиноий тўсқинлик қилиш ёки бошқа бирор жиноят содир этиш;
в) Мавжуд ёки даъво қилинаётган ҳуқуқни жамоат тартиби бузилишига олиб келиши мумкин бўлган тарзда амалга ошириш;
г) Бирор шахсни қонун талаб қилмаган ишни қилишга ёки қонун рухсат берган ишни қилмасликка мажбурлаш.
126-моддада эса қуйидагича баён этилган: «Кимки бирор шахс, тоифа ёки муайян гуруҳнинг ўз дини ёки эътиқодидан қайтганини (муртадлигини) очиқ эълон қилса, ёхуд ўша шахс, тоифа ёки гуруҳни омма олдида кофирга чиқариб, шу орқали унинг қонини ҳалол деб эълон қилса, ўн йилдан ошмаган муддатга озодликдан маҳрум қилиш, жарима ёхуд ҳар икки жазо билан жазоланади».
Ҳизб ут-Таҳрирни яхши билган ҳар бир киши бундай айбловлардан ҳайратга тушиши табиий. Зеро, ҳаммага маълумки, Ҳизб ут-Таҳрир – мабдаи Ислом бўлган сиёсий партия бўлиб, Пайғамбарлик минҳожи асосидаги Халифалик давлатини барпо этиш орқали исломий ҳаётни қайта бошлаш учун фаолият қилади. Бу йўлда ҳеч қандай моддий куч ишлатиш ҳаракатини амалга оширмайди, балки фақат фикрий ва сиёсий кураш олиб боради. Бу, албатта, Ҳизбнинг бирор кимсадан қўрққани учун эмас, балки биз учун энг гўзал намуна ва ўрнак бўлмиш суюкли Росулимиз ﷺга эргашгани сабаблидир. Чунки у зот давлат барпо бўлгунга қадар ҳеч қандай моддий ҳаракатга қўл урмаганлар.
Биз ҳақли равишда савол қўямиз: Судан ҳукумати ва унинг хавфсизлик идоралари кимнинг манфаатига хизмат қилмоқда? Исломий Уммат ва унинг ҳаётий, тақдирий масаласи – Пайғамбарлик минҳожи асосидаги иккинчи рошид Халифалик соясида Ислом ҳукмини ўрнатиш йўлидами, ёки Исломга ва унинг даъватини етказувчиларга қарши курашаётган Уммат душманлари биланми?!
Аллоҳ Субҳанаҳу айтади:
﴿إِنَّمَا يَفۡتَرِي ٱلۡكَذِبَ ٱلَّذِينَ لَا يُؤۡمِنُونَ بَِٔايَٰتِ ٱللَّهِۖ وَأُوْلَٰٓئِكَ هُمُ ٱلۡكَٰذِبُونَ﴾
«Ёлғон сўзларни ҳам фақат Аллоҳ оятларига иймон келтирмайдиган кимсаларгина тўқурлар. Ана ўшаларнинг ўзлари ёлғончидирлар» [Наҳл 105]
Иброҳим Усмон (Абу Халил)
Ҳизб ут-Таҳрирнинг Судан
вилоятидаги расмий нотиғи
