بسم الله الرحمن الرحيم

Ўроқда йўқ, машоқда йўқ, хирмонда ҳозир ҳокимлар каллаларига келган буйруқни бермоқдалар

Ўзбекистондаги ҳукумат бюджет ташкилотлари ишчи-ходимларини қул сифатида ишлатиши ҳеч кимга сир эмас. Бу ҳолат мана неча йилдан бери давом этиб келмоқда. Сўнгги йилларда эса, ҳокимлар каллаларига келган ҳар қандай юмушни ўйламай-нетмай буюриб юбормоқдалар. Қуйида шунақанги ажабтовур буйруқ ҳақида хабар тарқалди:

“Жиззах вилояти ҳокими буйруғига кўра, вилоятдаги бюджет ташкилотлари ишчилари ғўзани “шамоллатиш” тадбирига жалб этилди. Ҳар бир ишчи-ҳашарчи зиммасига бир гектар ғўза майдонидаги эгатда бирма-бир юриб чиқиш вазифаси юклатилган. Бундай "шамоллатиш" муаллифларига кўра, эгатлар ораланганда ғўза танаси шамоллаб, кўсакларнинг тезроқ очилишига ёрдам беради.

Жиззахдаги ғўзаларни “шамоллатиш” тадбири ҳақида Озодликка хабар қилган манбага кўра, ушбу жараёнга вилоятдаги барча бюджет ташкилоти ишчилари жалб қилинган:

“Жиззахда пахта теримига жуда қаттиқ тайёргарлик кетаяпти. Вилоят ҳокими Сайфиддин Исмоилов ҳар куни икки маҳал эрталаб ва кечқурун шу бўйича йиғилиш ўтказаяпти. Ташкилот раҳбарлари ҳам ҳокимдан норози. Ҳамма раҳбарнинг жонига тегиб кетди шу ҳоким. Яқинда ҳоким “Ҳар бир ташкилотдан 20-30тадан одам чиқарилсин далага, уларни пахта орасида у ёқдан бу ёққа қараб юргизинглар. Ғўзаларни шамоллатинглар, шунда тезроқ очилади” деб топшириқ берган”, деди исми очиқланмаслик ва овози ёзиб олинмаслик шарти билан Озодликка гапирган жиззахлик манба”. (“Озодлик” 18.08.2016 й.)

Ҳокимларнинг ҳеч нимадан қўрқмай, уялмай ана шундай бемаъни буйруқларни бераётганларига, уларни қўлидан ушлаб тўхтатиб қўядиган кучнинг йўқлиги ва ҳукуматнинг ўзи бунга тек қўйиб бераётгани сабаб бўлмоқда. Талаб қилинаётган нарса ҳар қандай йўл билан режани бажариш бўлиб қолмоқда, буйруқни сўзсиз бажариш бўлиб қолмоқда. Вилоят ва туман ҳокимлари ҳам шу ўлчовга қараб иш тутмоқдалар, яъни ўлчов халқ фаровонлиги эмас, балки ҳукумат тепасидаги бир ҳовуч текинхўрларни рози қилиш бўлиб қолмоқда. Ўз ўрнида, бу текинхўрлар ҳам ҳокимларнинг ўзларига қийинчиликларсиз хизмат қилишлари учун кўк чироқ ёқиб беришмоқда.

Афсусланарлиси шуки, бу кўзи очиқ кўр ҳокимлар Каримов бошлиқ жиноятчи ҳукумат ва у тадбиқ қилаётган манфаатдорликка асосланган тузумнинг чириб битганини кўра олмаяптилар. Улар яна шуни кўра олмаяптиларки, Каримов неча йиллаб ўзига содиқ хизмат қилганларни ҳам ахлатга ирғитмоқда. Бу манфаатдорликка асосланган тузумнинг олтин қонунидир, фойдаси йўқ одамдан воз кечилади, асло раҳм қилинмайди. Ҳокимларимиз шуни кўра била туриб ҳам халқ устида қилаётган зулмларини тўхтатмаяптилар. Аксинча, туну кун хўжайинларини рози қилиш ҳақида ўйламоқдалар.

Шунингдек, юртда яшаётган биз мусулмонлар ҳам ҳукмдорларнинг ҳаддан ошиб бораётган бундай зулмларига, айтиш мумкинки, устимиздан кулаётганларига индамай сукут сақлаб юрибмиз. Бу на дунёмиз ва на охиратимиз учун фойдали бўлган сукутдир. Сукутнинг ҳам ўз ўрни бор, шариат белгилаган ўринлардагина сукут сақлаш тўғридир. Сукутимизнинг, шунингдек қўрқувимизнинг чегараси бормикин? Аллоҳ тоқатимиздан ортиқча нарсани бизга буюрмагани ҳолида, бу ҳукмдорларнинг тоқатимиздан ортиқча бўлган бундай буйруқлар беришларига қачонгача сукут қиламиз?

Ҳизб ут-Таҳрирнинг Ўзбекистондаги медиа офиси Фаррух

29.08.2016й.