Қуръон боғларига саёҳат
Қуръон боғларига саёҳат
بسم الله الرحمن الرحيم
ان النَّبِيِّ صَلَّى اللَّهم عَلَيْهِ وَسَلَّمَ قَالَ خَيْرُكُمْ مَنْ تَعَلَّمَ الْقُرْآنَ وَعَلَّمَهُ
Пайғамбар соллаллоҳу алайҳи ва саллам дедилар: “Сизларнинг ичингизда яхшироғингиз, Қуръонни ўрганган ва уни ўргатганингиздир”. Бухорий ривояти.
Муқаддас китоби бўлган Қуръони Каримни бандаларининг ҳидоят топишлари учун дастур қилиб берган Аллоҳга Унинг Ўзига муносиб мақтов ва ҳамдлар бўлсин. Ушбу Китобни умматга энг олий кўринишда чиройли етказган, ушбу Китоб мўъжизалиги билан у зотнинг Пайғамбарлиги исботланган Муҳаммад соллаллоҳу алайҳи ва салламга саловоту саломлар бўлсин.
Рукнимизнинг ўтган сонида Бақара сурасининг 114-ояти тафсирини ўрганиб, Аллоҳнинг уйи ҳисобланадиган масжидларни бузадиган, у ерда ибодат қилинишидан тўсадиган, масжидларни хароб қиладиган кимсаларга Аллоҳнинг ғазаби ва нафрати бўлиши, улар жаҳаннамга тушишлари тўғрисида сўз юритган эдик. Рукнимизнинг ушбу сонида мусулмонлар кофирларнинг динига эргашмагунча, улар мусулмонлардан ҳаргиз рози бўлмасликлари, яъни куфр ўзининг қўлидаги тузум ва кучлари билан бор имкониятини ишга солиб мусулмонларни динидан қайтаришга, ўзларининг динига киргизишга ҳаракат қилишлари тўғрисидаги оятларни ўрганамиз.
وَلَن تَرْضَى عَنكَ الْيَهُودُ وَلاَ النَّصَارَى حَتَّى تَتَّبِعَ مِلَّتَهُمْ قُلْ إِنَّ هُدَى اللّهِ هُوَ الْهُدَى وَلَئِنِ اتَّبَعْتَ أَهْوَاءهُم بَعْدَ الَّذِي جَاءكَ مِنَ الْعِلْمِ مَا لَكَ مِنَ اللّهِ مِن وَلِيٍّ وَلاَ نَصِيرٍ * الَّذِينَ آتَيْنَاهُمُ الْكِتَابَ يَتْلُونَهُ حَقَّ تِلاَوَتِهِ أُوْلَـئِكَ يُؤْمِنُونَ بِهِ وَمن يَكْفُرْ بِهِ فَأُوْلَـئِكَ هُمُ الْخَاسِرُونَ * يَا بَنِي إِسْرَائِيلَ اذْكُرُواْ نِعْمَتِيَ الَّتِي أَنْعَمْتُ عَلَيْكُمْ وَأَنِّي فَضَّلْتُكُمْ عَلَى الْعَالَمِينَ * وَاتَّقُواْ يَوْماً لاَّ تَجْزِي نَفْسٌ عَن نَّفْسٍ شَيْئاً وَلاَ يُقْبَلُ مِنْهَا عَدْلٌ وَلاَ تَنفَعُهَا شَفَاعَةٌ وَلاَ هُمْ يُنصَرُونَ
“Яҳудий ва насронийлар уларнинг динига кирмагунингизча ҳаргиз сиздан рози бўлмайдилар. Айтинг: “Аллоҳнинг йўлигина ҳақиқий йўлдир”. Қасамки, агар сизга келган ҳақиқий билимдан кейин уларнинг нафс-ҳаволарига эргашсангиз, Аллоҳ тарафидан сизга на бир дўст ва на бир ёрдам бергувчи бўлмайди. Биз китоб (яъни Таврот, Инжил) ато этган зотлар орасида уни тўғри тиловат қиладиган кишилар ҳам бордирки, ана ўшалар (Қуръонга) иймон келтирурлар. Ва кимда-ким унга (Қуръонга) кофир бўлса, ўшалар зиён кўргувчилардир. Эй Бану Исроил, сизларга инъом қилган неъматимни ва сизларни бутун оламга афзал қилган пайтимни эсланг. Бир жон бошқа жондан ҳеч нарсани адо қила олмайдиган, ундан шафоат қабул қилинмайдиган, ундан тўлов олинмайдиган ва уларга ёрдам берилмайдиган Кундан қўрқинг!” (120 – 123)
Аллоҳ Таоло бу оятларда қуйидагиларни баён қилади.
- Яҳуд ва насоролар то сиз уларнинг миллатига – динига эргашмагунингизча сиздан рози бўлишмайди. Бу иш эса ҳеч қачон амалга ошмайди. Чунки Аллоҳ Таоло “وَمَن يَبْتَغِ غَيْرَ الإِسْلاَمِ دِيناً فَلَن يُقْبَلَ مِنْهُ وَهُوَ فِي الآخِرَةِ مِنَ الْخَاسِرِينَ – Кимки Исломдан ўзга дин истаса, бас (унинг «дини» Аллоҳ ҳузурида) ҳаргиз қабул қилинмайди ва у охиратда зиён кўргувчилардандир”. (Оли Имрон. 85), “إِنَّ الدِّينَ عِندَ اللّهِ الإِسْلاَمُ – Албатта Аллоҳ наздида мақбул бўладиган дин фақат Ислом динидир” (Оли Имрон. 19)
Улар (кофирлар) билиб қўйсинларки, ҳидоят уларнинг динига эргашиш эмас, Пайғамбар соллаллоҳу алайҳи ва саллам олиб келган кўрсатмадир. Уларнинг дини ўзгартирилиб, ўринлари алмаштирилиб куфр динига айланиб кетган, яъни улар ўзларига берилган динни ўз қўллари билан бузишди, Таврот ва Инжил оятларини ўзгартиришди. Шундан сўнг Аллоҳ Таоло Ўз пайғамбарига қасам йўли билан хабар беряптики, (бу ердаги лом ҳарфи қасам маъносини англатади) агар у киши уларнинг ҳавойи нафсларига эргашгудек бўлсалар, (бу ерда уларнинг ўзларича ҳидоят деб ўйлаётган нарсалари ҳавойи нафс эканлиги кўрсатиляпти) ўзларига ҳеч қандай дўст ҳам, Аллоҳнинг азобидан ҳимоя қиладиган ёрдамчи ҳам топа олмай қоладилар. Демак, бутун инсоният учун Аллоҳ рози бўладиган диндан, Аллоҳ рози бўладиган шариатдан бошқа тўғри йўл йўқдир.
Мана шуларнинг ҳаммаси Аллоҳ томонидан яҳуд ва насороларнинг Пайғамбар соллаллоҳу алайҳи ва салламдан рози бўлишлари эҳтимолдан узоқ эканлигини кўрсатувчи баёнлардир. Зеро, Пайғамбар соллаллоҳу алайҳи ва саллам уларнинг динига эргашишлари амри маҳолдир.
- Кейин Аллоҳ Таоло ўзларининг китобларига ҳақиқий эргашадиган яҳуд ва насороларнинг Пайғамбар соллаллоҳу алайҳи ва салламга иймон келтиришларини баён қиляпти. Зеро, уларнинг китобларида Пайғамбар соллаллоҳу алайҳи ва салламнинг белгилари кўрсатилган. Ким унга кофир бўлса, дунё ва охиратда зиён кўргувчилардан бўлади. Дунё ва охиратини бой беради.
يَتْلُونَهُ حَقَّ تِلاَوَتِهِ
“Уни (Таврот ва Инжил каби китобларини) тўғри тиловат қиладилар”. Яъни, унга ҳақиқий эргашадиганлар. Бу худди Аллоҳ Таолонинг мана бу гапига ўхшайди “وَالْقَمَرِ إِذَا تَلَاهَا – У (қуёш)нинг ортидан келган ойга қасам” (Шамс. 2) Яъни, қуёшга эргашган (унинг ортидан чиққан) ой… “ما زلت أتلو أثره Унинг изидан боравердим” иборасида ҳам худди шу сўз қўлланган. Яъни “تلاوة – тиловат” сўзи эргашиш маъносида.
- Сўнг Аллоҳ Таоло Бану Исроил қиссасини қандай бошлаган бўлса, ўшандай якунлаяпти. Чунки улар тинимсиз гуноҳлар қилавердилар.
يَا بَنِي إِسْرَائِيلَ اذْكُرُواْ نِعْمَتِيَ
“Эй Бану Исроил, сизларга инъом қилган неъматимни эсланг”. Бу оят ва ундан кейинги
وَاتَّقُواْ يَوْماً لاَّ تَجْزِي نَفْسٌ عَن نَّفْسٍ شَيْئاً
“Бир жон бошқа жондан ҳеч нарсани адо қила олмайдиган, ундан шафоат қабул қилинмайдиган, ундан тўлов олинмайдиган ва уларга ёрдам берилмайдиган Кундан қўрқинг!” ояти қандай маънолар англатиши хусусида Бану Исроил хусусидаги оятлар бошланган пайтида айтиб ўтдик.
Ҳизб ут-Таҳрирнинг Ўзбекистондаги медиа офиси. Муслим
12.09.2018й.
