بِسْمِ اللَّـهِ الرَّحْمَـٰنِ الرَّحِيمِ

Роя газетаси:

Ўт очишни тўхтатиш битимидан манфатдор Сурия режимидир

Ҳижрий 1438 йил 20 зул-қаъда, милодий 2017 йил 12 август шанба куни араб тилидаги «Ватан» сайтида чоп этилган хабарда бундай дейилади:

«Сурия режими армияси Иордания билан чегарадош Сувайдо шаҳри яқинидаги жанг майдонларида муҳим ютуқларни қўлга киритиши ортидан ўз ҳаракатини бир неча фронтларга кенгайтирди».

Сурия манбаларига кўра, президент Башар Асад пайшанба куни Иордания чегарасига яқин ҳудудлар бўйлаб, шу жумладан, Сувайдо шарқи яқинидаги текширув пункти ва полиция участкасида назорат ўрнатишга муваффақ бўлгач, Исломий Давлат жангариларига қарши курашда асосий ҳаракатини Дайриззурга қарата бошлади.

Бу ҳарбий ҳаракатлар пойтахт Дамашқ атрофидаги мухолафатнинг сўнгги қароргоҳи бўлган Шарқий Ғутага қуруқликдан кенг кўламли ҳужумлар уюштиришга тайёргарлик кўриш давом этаётган бир пайтда амалга оширилмоқда.

Афтидан, Сурия армияси бир неча жанг майдонларидаги хусусан – Остона битимига биноан ўт очишни тўхтатиш келишувини ўз ичига олган минтақалардаги – тинчликдан фойдаланаётган кўринади. Зеро, бу битим музокаралар учун мутасадди бўлган давлатлар (Россия, Эрон ва Туркия) томонидан кафолатланган бўлиб, хавфсиз ҳудудлар ҳам шу битим асосида ташкил қилинган.

Сурия режими бир неча минтақаларни ҳеч қандай қаршиликсиз назоратга олиш учун ҳарбий йўналишга мувофиқ қадам ташлаб, маҳаллий сулҳларни жонлантиришга уринмоқда.

Дамашқ ҳам жанг майдонида, ҳам ҳарбий томонлама маҳаллий сулҳлардан фойдаланди. Яъни бу сулҳлар Дамашққа ҳеч нимани йўқотмасдан, қурол-яроқ ва оилалари билан тинч, соғ-саломат чиқиб кетишни афзал кўрган мухолафат гуруҳлари билан тузилган битимга мувофиқ, бир неча минтақаларни ўз назоратига олишига ёрдам берди.

Сурия режими ўз рақибларини келишувга кўндириш учун қамал, оч қолдириш ва ҳар куни бомбардимон қилиш тактикасидан фойдаланиб келмоқда. Бу келишувга кўра, жангарилар, уларнинг оилалари ва кўнгиллилар қуролли тўқнашувлардан холи минтақаларга кўчирилади ҳамда мухолафат назорати остида тинч йўл билан чиқиб кетишлари таъминланади.

Таҳлилчиларнинг айтишича, айни тактика Сурия режимига ўз армиясини кўп йўқотишдан сақлаб, узоқ жанглар ортидан нафасини ростлаб олишга имкон беради.

Бироқ қуролли мухолафатни бошқа минтақага кўчиришдан мақсад, уларни битта ерга тўплаб, кейин бомбардимон қилиш мумкин, деган жиддий хавф ҳам бор».

Роя газетаси шарҳи:

Биз такрор-такрор огоҳлантириб келган нарса ҳам айнан мана шудир: яъни Шом тоғути билан қилинадиган ҳар қандай сулҳ жарликка олиб боради. Сулҳлар, музокаралар, келишувлар, ўт очишни тўхтатиш битимлари, хавфсиз ҳудудлар… буларнинг барчасидан асосий манфаатдор, эҳтимолки ягона манфаатдор қонхўр режимдир. Музокаралардаги қарор ва лойиҳалар ҳар доим шу режим фойдасига хизмат қиляпти. Сулҳ ва ўт очишни тўхтатиш битимларга биринчи бўлиб шу режимнинг ўзи риоя қилмаяпти. Бошқа томоннинг ўт очмаётганидан фойдаланиб, хотиржам бомбардимон қилиб, қирғин қиляпти. Қонхўр режим булардан фойдаланиб, нафас ростлаяпти, сафларини тартиблаштириб, қайтадан жанг бошлашга куч тўплаяпти ҳамда Сурия аҳлини яна қиришни давом эттиряпти. Шунинг учун биз шуни таъкидлаймизки, бугун Шом қўзғолони кечиб ўтаётган босқич, унинг йўналишини тўғрилаб, режимни ағдарадиган ва Пайғамбарлик минҳожи асосидаги рошид Халифалик давлатида Ислом ҳукмини барпо қиладиган ҳақиқий эр кишиларни талаб қилмоқда.

Роя газетасининг 2017 йил 16 август чоршанба кунги 143-сонидан