Ўзбек режими кофир мустамлакачи давлатлар ва халқимизнинг Исломга бўлган муҳаббати ўртасида

بِسْمِ اللهِ الرَّحْمٰنِ الرَّحِيمِ

Ислом юртимиз – Мовароуннаҳр халқларига кириб келиб, уларнинг қалби ва ақлини забт этди. Ана шу даврдан бошлаб то шу кунгача улар Аллоҳнинг динини маҳкам ушлаб келишяпти. Ҳатто мусулмонлар устида ҳозиргидек золимона ишлар юргизилаётган, Исломдан узоқлаштириш сиёсати кундан-кун авж олаётган даврда ҳам халқимизнинг Исломга бўлган интилиши кучайса кучаймоқдаки, асло сусайгани йўқ. Зотан, юртимиз аҳолисининг аксари Ислом ва мусулмонлар фойдасига фикрлар янграса ёки қандайдир ижобий ҳодисалар юз берса, хайрихоҳлик билан олқишлаб қарши олаётганига гувоҳ бўлмоқдамиз. Шунингдек, Ислом ва унинг аҳкомларига зид ишлар содир этилганда, унга норозилик билдириб, нафратланаётганини ҳам кўряпмиз. Мана шундай ҳолатни қалблардаги Исломга бўлган муҳаббатнинг ёрқин ифодаси дейишимиз мумкин.

Келинг, сўзимиз қуруқ бўлмаслиги учун баъзи мисолларни келтириб ўтамиз. Узоққа бормайлик, яқинда америкалик отарчи Лопеснинг юртимизда ўтган концертидан сўнг “Миллий тикланиш” партияси етакчиси Алишер Қодиров бу борада муносабат билдириб, жумладан, шундай деди: “Лопесга қандай кийинишни ўргатмаганимиздек, эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак”. Бу фикрга мусулмонлар фойдаси учун айтилди, деган эътиборда қараб, гарчи кўп ҳолларда ўзининг баҳсли фикрлари билан омманинг эътирозига учрайдиган Алишер Қодиров айтган бўлса-да, айнан мана шу сўзлари учун кўпчилик уни мақтади. Ҳатто унинг бошқа гап-сўзлари учун ёмон кўрадиган одамлар ҳам айнан мана шу фикрини олқишлашди. Қодировнинг юқоридаги сўзлари тарқатилган хабарлар остида қолдирилган изоҳларнинг баъзиларида шундай дейилади: “биринчи марта ҳақ гапни гапирди”, “Офарин, тасанно…. Алишер Қодировдан хам шунақа халқ учун яхши ва фойдали фикрлар чиқаркан, биринчи марта ҳурматим ошди шу одамга..”, “Қоил ома шу одамни умуман ҳурмат қилмас эдим, шу чиқишидан кейин бир даражага кўтарилди” ва ҳоказо. Кўриб турганингиздек, халқимиз Ислом ва мусулмонларга фойдали деб билган сўз ва амалларни қўллаб-қувватлаб, аксинча, унга терс бўлган ишларни қоралаяпти. Лопеснинг концертига жамиятда асосан салбий ёндашув бўлгани ҳам сўзларимизни қувватлайди. Жамиятимизда бузуқлик ва ахлоқсизликни кенг ёйилишига хизмат қиладиган бундай концерт ва тадбирларни ташкил қилаётгани учун кўпчилик ҳукуматдагиларни айблади ва, албатта, бу жуда ўринли эътироз ва танқидлардир…

Хуллас, мусулмон халқимиз ким бўлишидан қатъий назар, агар у Ислом ва мусулмонлар фойдасига гапирса ё бирор иш қилса, уни ҳатто ёмон кўрсалар ҳам ўша иш ё амалини мақташаётганининг сабаби – улардаги Исломга бўлган муҳаббатдир.

Энди мавзумизнинг энг муҳим нуқтасига етиб келдик. Маълумки, ҳозир ҳукумат ва халқ ўртасида жарлик мавжуд бўлиб, у тобора чуқурлашмоқда. Ҳукумат халқни эшитмаяпти, менсимаяпти, халқ эса ҳукуматга ишонмаяпти. Шунга қарамай, Ўзбекистон ҳукумати, хусусан, президент Мирзиёев халқни рози қилиш ҳақида гапиришдан чарчамаяпти. Агар улар ўз сўзларида ростгўй ва холис бўлсалар, халқимизнинг Исломга бўлган муҳаббати, унинг қонунлари – ҳалол-ҳаромга бўлган эҳтироми-ю муносабатига эътибор қаратишлари ва инобатга олишлари керак эмасми?! Ҳа, ҳақиқатан, ҳозир ҳукумат Исломни ўрганиб, унга амал қилаётганларни ўзига хавф-хатар, деб эмас, балки халқ билан ҳукуматни бир-бирига дўст ва ҳамкор қилиб, бир мушт қилиб тугадиган қудратли бирлаштирувчи омил, деган эътиборда қараши зарур. Шунингдек, Америка, Россия, Хитой каби мустамлакачи давлатларни ҳақиқий душманлар сифатида кўриб, уларнинг босимлари, таҳдидлари, иқтисодий найрангларига учмаган ҳолда, халқ қувватловини қўлдан бой бермаслик сиёсатини юргизиш энг тўғри ва энг муваффақиятли ишдир.

Эй Ўзбекистон ҳукумати! Агар сиз ўз халқингиз эътиқоди талабига кўра иш тутиб, Аллоҳнинг йўлига қайтсангиз, мусулмон халқингиз сизни асло ташлаб қўймайди. Билъакс, сизнинг ҳақиқий ва мустаҳкам таянчингиз бўлади. Мана, халқингиз ким Ислом билан ҳукм юритса, ўшани қўллаб-қувватлашга тайёр эканлигини фаҳмлаб тургандирсиз. Чунки бу халқ Ислом ва мусулмонлар фойдасига айтилган биргина сўзни ҳам эътиборсиз қолдирмаяпти, тинимсиз қўллаб-қувватлаяпти. Энди бир тасаввур қилиб кўринг, агар сиз Исломий сиёсат юргизишга ҳаракат қилсангиз қандай бўларкин! Ҳозир мусулмонлар ҳокимият тепасига мана шундай раҳбарлар келишини жуда-жуда хоҳлашмоқда, улар Абу Бакр, Умар, Али, Усмон (р.а.)лар каби буюк етакчи бошлиқларни ниҳоятда соғинишган. Уларга аслида қаёқдаги демократия ҳам, ундан бошқаси ҳам керак эмас. Агар халқингизни ҳақиқатда рози қилмоқчи бўлсангиз, унинг муҳаббати ва ишончини қозонишни истасангиз, албатта, сиз учун Исломга мурожаат қилишдан бошқа йўл йўқ. Ундан бошқа ҳар қандай йўл халқингизни сиздан янада узоқлаштиради ва ҳатто сизни унинг қаттиқ нафратига олиб боради холос! Сиз учун Аллоҳ таолонинг мана бу сўзларини тадаббур қилиш ва унга амал қилиш вақти келди:

وَاعْتَصِمُواْ بِحَبْلِ اللّهِ جَمِيعًا وَلاَ تَفَرَّقُواْ وَاذْكُرُواْ نِعْمَةَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَانًا وَكُنتُمْ عَلَىَ شَفَا حُفْرَةٍ مِّنَ النَّارِ فَأَنقَذَكُم مِّنْهَا كَذَلِكَ يُبَيِّنُ اللّهُ لَكُمْ آيَاتِهِ لَعَلَّكُمْ تَهْتَدُونَ

– “Барчангиз Аллоҳнинг арқонини маҳкам тутинг ва бўлиниб кетманг. Ва Аллоҳнинг сизга берган неъматини эсланг: бир вақтлар душман эдингиз, бас, қалбларингизни улфат қилди. Унинг неъмати ила биродар бўлдингиз. Ўтли жар ёқасида эдингиз, сизни ундан қутқарди. Аллоҳ сизга Ўз оятларини ана шундай баён қилади. Шоядки, ҳидоят топсангиз”.  (Оли Имрон:103)

Форуқ

28.08.2025й