بِسْمِ اللَّـهِ الرَّحْمَـٰنِ الرَّحِيمِ

Ўзбекистон халқи иш излаб ўзга юрт остонасига бош уришини асл негизи қаерда?

Бугунги кунда юрт ичкарисида яшаётган барча инсонларга очиқ-равшан кўриниб турган воқеалардан бири, Ўзбекистондан хорижга иш излаб чиқиб кетаётганлар сони кундан-кунга ортиб бораётганидир. Статистика маълумотларига кўра, беш миллиондан зиёд Ўзбекистон фуқаролари иш излаб Россия, Туркия, Жанубий Корея, Қозоғистон ҳамда Араб юртларига чиқиб кетганлар ва бу ҳолат мунтазам давом этмоқда.

Ушбу масала юзасидан фикр алмашар эканмиз, қуйидаги саволларни ўзингизга бериб кўринг. Аввало, миллионлаб билаги кучга тўлган, юртимиз келажаги бўлган навқирон ёшларимизнинг чет давлатларда бир тишлам нон илинжида юришининг асосий сабаби нима? Ушбу ёшларимизнинг ораларида олий маълумотли зиёли қатламларнинг ҳам борлиги нимани англатади? Нега ўзга юртлардан, ҳатто ён қўшни давлатлардан бирор инсон бизнинг диёрларга иш излаб келмайди? Йигитларимизни чиқиб кетганликларини ҳам тушуниш мумкиндир, лекин аёлларимизни ўша юртларда юришини қандай тушуниш мумкин? Бу каби саволларни охири кўринмайди, шундай экан бугунги воқеликка қайтсак, маҳаллий ҳокимиятларнинг ҳамда кучишлатар тизимларининг чет мамлакатларда пешона тери эвазига оила тебратаётган фуқароларимизни турли тахдидлар билан юртга қайтишини талаб қилаётган экан, бундан  Каримов  хукуматнинг асл муддаоси нимада?

Биз ушбу саволларни сиз азиз ўқувчи ҳукмига ҳавола қилган ҳолда, бу муаммоларни асл негизига эътиборинизни қаратмоқчимиз. Аслида ушбу адолатсизликларни замири қаерда? Иқтисодий тангликка, сиёсий қарамлигимизга, маънавий қашшоқлашиб боришимизга, охири кўринмаётган иқтисодий жарлик сари босқичма-босқич кетаётганимизга кимлар айбдор? Мансаби учун динини, ориятини, номусини, ғурурини ҳам сотиб юборган қандайдир худбин кимсаларми? Ёки кечаю-кундуз тиним билмай меҳнат қилаётган жафокаш, мазлум халқми? Ёки ўттиз миллион халқ устида татбиқ этилаётган, бу уммат учун бегона бўлган ғарб капитализмими?

Дарҳақиқат, бугунги кунда учинчи олам мамлакатларидаги инсонлар адолатсизликдан, қашшоқликдан, хавфсизликни издан чиқишидан, ҳатто кундалик озиқ-овқат сотиб олишга маблағ етишмаслигидан ҳамда даволаниш муассасалари буткул таъмагирликни асос қилиб олгани туфайли аксар халқлар унсиз йиғламоқда. Шу жумладан, бизнинг Ўзбекистондаги Ислом уммати ҳам ушбу оғриқли вазиятлардан ҳоли эмасдирлар.

Бугунги авлод ҳисобланган сизу-бизлар, ўтган бир асримизга теран, ёрқин назар ташлар эканмиз, келажак авлодларимиз олдида ҳам хижолат бўладиган кўп нарсани қўлдан бой бериб бўлдик. Бу йўқотишнинг энг асосийси, умматнинг қимматбаҳо мероси бўлган сиёсий Исломдан узоқлашдик. Юрт бошқарувига эса, насл-насабини тайини йўқ малай ҳукмдорлар эгалик қила бошлади. Бунинг натижасида ғурурларимиз топталди, уммат ўзлигини йўқотди, ер ости ва ер усти бойликларимиз тасарруфини эса мустамлакачилар қўлларига топшириб қўйдик.

Ушбу хоин кимсаларнинг ҳиёнати туфайли ижтимоий ҳаётимиз ҳам Американинг собиқ президенти кичик Буш иддаосидек, яъни “биз уларнинг эркакларидаги соқолларни қириб ташлаймиз, аёлларидаги ҳижобни ечиб оламиз, ётоқхоналарига ҳаёсиз фильмларимизни киритамиз”, деб берган баёнотига мувофиқ шаклланди. Шунингдек, иқтисодий соҳаларимиз ғарбнинг жирканч капиталистик низомига асосланган ҳолда кредит бериш ҳамда оёқларимиз остидаги нефт ва қимматбаҳо конларимизни Америка ва Европа каби мустамлакачилар томонидан қўшма корхона номи билан очиқдан-очиқ талон-тарож қилинди ва қилинмоқда.

Бир сўз билан айтсак, бутун дунё иқтисодига ҳужум қилаётган Америка ва Европа бизнинг юртларни ҳам ўзининг ёвуз режалари асосида кемириб ётибди. Бунинг натижаси ўлароқ юртда ишсизлик, пул қадрсизланиши, бюджет камомади каби муаммолар пайдо бўлдики, натижада юрт фарзандларида атроф давлатларга чиқиб кетишдан ўзга чоралари қолмади. Буларнинг барчасига асосий сабаб битта, у ҳам бўлса демократия ниқобидаги капитализм тузумининг бизга олиб келган ёвузликларидир.

Шунингдек, бугунги кунда бизнинг диёрларимиз ғарб давлатларининг мустамлакасига, ажнабий фикрий етакчиликлари учун саҳнага ҳамда Россия ҳам нигоҳини узмаётган, ҳужум қилиб босиб олишни мўлжаллаётган ерларига айланиб улгурди. Демак, ажнабий фикрий етакчиликларга қарши курашиш орқали мавжуд мустамлакачиликка қарши курашиш учун ҳамда юртларимизни мўлжаллаётган ажнабий босқин хатарига қарши бор вужудимиз, имкониятларимизни ишга солмоғимиз лозимдир.

Ушбу оғир ва машаққатли ишни амалга оширишда юртимизда фаолият олиб бораётган Ҳизб ут-Таҳрир партияси етакчилигидаги фаолият билан елкама-елка бўлишликка сиз мусулмон биродарларимизни даъват қиламиз. У исломий ўлкаларни барчасини мустамлакачиликнинг барча турларидан озод қилиш учун тинимсиз кураш олиб бормоқда. Ушбу жамоа мустамлакачи кофир ўрнатган барча шаклларни таг-томири билан қўпориб ташлашда ҳарбий, фикрий, маърифий, иқтисодий ёки бошқа босқинчиликлардан озод қилиш учунгина ҳаракат қилмайди, балки бутун дунёдаги инсонларга Аллоҳнинг динини етказишни амалга оширадиган Халифалик давлатини тиклаш учун ҳам бор имкониятини ишга солиб ҳаракат қилмоқда.

Ушбу фаолият билан биргаликда барча ёмонликларнинг онаси бўлган ушбу капиталист   мустамлакачиларга барҳам бермас эканмиз, нафақат бугунги авлод, балки фарзандларимиз ҳам бир тишлам нон илинжида дунё кезишда давом этадилар. Ушбу жирканч,  ноинсоний тузумни таг-томири билан қўпориб ташлашдек эзгу ишга бепарво бўлар эканмиз, бизни иқтисодий ва сиёсий қарамлик, бадбахтлик, бошбошдоқлик, оилаларнинг бузилиши, маънавий қашшоқлик ҳеч қачон тарк этмайди.

Қачонки, бизлар ўз мабдаъий давлатимизга, халифамизга эга бўлсак, шундагина Роббимиз бизларга ваъда берган азизликни, буюкликни, ўз шону-шавкатимизни қайта тиклаб олишга имконият пайдо бўлади. Бу ҳақда Аллох Таоло ўн тўрт аср муқаддам ўз каломида бизни огоҳ этиб шундай деган:

إِنَّ اللَّهَ لَا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ

– „Аниқки, то бирон қавм ўзларини ўзгартирмагунларича, Аллоҳ уларнинг аҳволини ўзгартирмас“.    (13:11)

Бу улкан вазифаларни адо қилиш учун Аллоҳдан Ўз ёрдами билан бизга мадад беришини сўраб, Унга илтижо қиламиз. Аллоҳ эшитгувчи ва дуоларни қабул қилгувчи Зотдир.

Хизб ут-Таҳрирнинг Ўзбекистондаги медиа офиси. Зайниддин