Ўзбекистон ҳукумати диний идора ходимлари ва имомларига мурожаат
Ўзбекистон ҳукумати диний идора ходимлари ва имомларига мурожаат
بِسْمِ اللهِ الرَّحْمٰنِ الرَّحِيمِ
(Ислом Уммати ҳақида қайғурувчи ўзбекистонлик мусулмон биродаримиздан)
Ассаламу алайкум ва роҳматуллоҳ! Эй Ўзбекистондаги дин пешволари, сизларга эслатишни мусулмонлик бурчим деб билиб сизларга мурожаат қилябман. Мен беш вақт фарз намозларида, ҳамда Жума ва Ийд намозларида сизларга иқтидо қилиб намоз ўқиётган Ислом умматининг бир вакилиман. Бугун Жума намози ортидан истисқо(ёмғир сўраш) намозини ҳам жамоат бўлиб адо этдик. Мен бу намозни Роббимиздан уялиб, қалбан йиғлаб-йиғлаб, қаттиқ изтироб билан ўқидим. Боиси, бизга озгина озор етган эди, жамоат бўлиб Аллоҳдан ёрдам сўраб намоз ўқишга турдик. Икки йилу икки ойдан буён бизнинг бир бўлагимиз бўлган Ғазо аҳлини душманларимиз оммавий қирғин қилишяпти. Қариялар, аёллар, ҳатто гўдакларни ҳам аёвсиз қатл қилишяпти. Биродарларимиз очлик ва сувсизликдан қанча-қанчалари ҳалок бўлишди ва ҳалок бўлишяпти. Инсоният тарихида мисли кўрилмаган бу жирканч жиноятлардан бутун дунё аҳли хабардор бўлиб турибди, жумладан, сизлар ҳам хабардорсизлар. Шарқий Туркистондаги биродарларимизни аянчли ҳолидан ҳам хабардорсизлар. Мени изтиробга солаётган саволлар шуки: Нима учун биз Ғазо аҳлига, уйғур биродарларимиз ҳаққига Аллоҳдан ёрдам сўраб, душманларимизни мағлуб қилишини тилаб бирор марта ҳам масжидларимизда оммавий дуо қилмадик?! У мазлумлар биздан эмасми?! Ёки биз улардан эмасмизми?! Уларнинг ғами бизнинг ҳам ғамимиз эмасми?! Биз мусулмонлар ягона уммат эмасмизми?! Биз мўминлар бир тана каби бўлишга буюрилмаганмизми?!
Эй аҳли илмлар, дин пешволари! Сизлар ўз динингиздан бунчалар йироқлашиб кетдингиз! Тилингиздан ватанимиз, миллатимиз, миллий қадриятларимиз каби сўзлар тушмай қолди. Динни ҳаётдан ажратиш мафкураси асосига қурилган давлат белгилаб берган вазифангизни астойдил бажаришга киришиб кетдингиз. Яъни халқ онгига ватанпарварлик ва миллатчилик каби тор жоҳилий тушунчаларни тиқиштиришга катта ҳиссангизни қўшяпсиз. Аллоҳдан қўрқмайсизларми?! Аслида, сизлар миллатчилик тушунчасининг ҳаромлигини умматга етказишдан, Ислом ва мусулмонлар бирлигига чақиришдан масъулсизлар-ку! Ислом ва мусулмонларга нисбатан худди душмандек муомалада бўлаётган дунёвий давлат – ўзбек режими буйруқларини сўзсиз бажариб, яна уларнинг ҳақларига “хайрли” дуолар қиляпсиз, “Аллоҳим буларнинг шундай бошчилигини тепамизда бардавом қил, ишларига ривож бер” деб маддоҳлик қилиб, ўзларингни ҳам, уларни ҳам ҳалокат сари олиб кетяпсизлар.
Уларни яхшиликка буюриб, ёмонликдан қайтариш аввало сиз аҳли илмларнинг бурчингиз-ку! Аллоҳ унга кўра яшашимиз ва одамларни унга кўра бошқаришимиз учун нозил қилган қонунларни қўйиб, ўзлари томонидан қонунлар тузиб бошчилик қилаётган ҳамда судхўрлик, ароқхўрлик, фаҳш каби ёмонликларни ривожлантираётган, Қуръон ўқитиш, исломий таълим бериш каби яхшиликларни тақиқлаётган, соф исломий даъватни кўтариб чиққан йигитларни таъқиб қилиб қамоққа олаётган бошқарувдаги кимсаларни қўллаб-қувватлашингиз Қиёматда ўша золим ва зўравонлар сафида туришингизга ҳужжат бўлади.
Эй аҳли илмлар! Сизлар жуда катта синов устида турибсиз! Сизлар Фиръавн сеҳргарларидек синовдасиз! Фиръавннинг сеҳргарлари ҳақни кўргач уни тасдиқладилар. Фиръавннинг таҳдидларига парво қилмадилар. Улар ҳақда собит турдилар ва нажот топдилар.
Эй аҳли илмлар! Сизлар ҳам бу синовли дунёда Роббимизнинг синовларидан тўғри ўтиб олиш ғамида бўлинглар! Исломдан озгина хабардор бўлган киши бугунги дунёвий тузумларни Исломга зид эканини аниқ билади. Бу ботил тузум ўрнига исломий бошқарувни қайта тиклашдан барча мусулмонлар масъулдирлар. Аллоҳга ҳамдлар бўлсинки, бугунги кунимизда бу шарафли масъулиятни идрок қилиб, уни гўзал суратда адо этаётган Ҳизб ут-Таҳрир жамоаси бор. Бу уюшма соф шаръий ижтиҳод асосидаги манҳажига кўра, Исломий ҳаётни қайтадан бошлаш йўлида фикрий ва сиёсий кураш олиб боряпти. Бу уюшманинг йигитлари Аллоҳдан ўзгадан қўрқмай, бошқарувдагиларга ялтоқланмай, чиройли кўринишга уринмай, ҳақни баралла айтяптилар.
Эй дин пешволари! Сизлар ҳам Ҳизб йигитлари каби ҳақни етказинглар! Уммат тепасида турган кишиларга одамларни Аллоҳнинг қонунлари асосида бошқаришлари уларга вожиб эканини етказинглар! Исломда қонун манбаи Қуръон ва Суннат эканини, барча муаммоларнинг ечимларини Абу Ҳанифа р.а. каби мужтаҳидлар Қуръон ва Суннатдан истинбот қилиб ишлаб чиқиши вожиблигини, бундан ўзгача усулда қонун ишлаб чиқиш ва ўша қонунлар билан бошқариш ҳаром эканини етказинглар! Оламнинг ислоҳи фақатгина Ислом билан бошқариш ва Ислом билан яшашда эканини баён қилиб беринглар! Аллоҳнинг қонунларидан юз ўгириб, парламентларида ботил қонун-қоидаларни тузаётганлар ва халқни шу қонун-қоидалар билан бошқараётганлар, бу қонун-қоидаларни ҳаётдаги ижросини таъминлаётган вазирликлар, суд, прокуратура ходимлари ва мана шу қонун-қоидаларни тарафдори бўлганлар тавба қилмай шу йўлларида ўлиб кетишса, абадий жаҳаннамда қолиб кетишларини айтинглар!
Эй аҳли илмлар! Бошқарувдаги кишиларга ҳақни етказишда қўрқоқлик қилманглар, тепамизда ҳукмрон бўлиб турган бу кишилар “Ана роббукумул аъла” деб турган Фиръавн ва унинг аъёнлари эмас, улар ҳам биз мусулмонлармиз, деб айтаётган кишилардир. Уларга ўз динларини тушуниб олишларида ва унга амал қилувчилар сафига киришларида ёрдам беринглар! Ҳақда собит туриб, ўзларингни ҳам, Умматни ҳам ҳалокатдан қутқарувчи бўлинглар!
Вассаламу алайкум ва роҳматуллоҳи ва барокатуҳ
04.12.2025й
