Захри қотил қарзларни тўлаш халқ бўйнига юкланмоқда

بِسْمِ اللهِ الرَّحْمٰنِ الرَّحِيم

Хабар: Хорижда ишлаётган ватандошлар оилаларини ижтимоий нафақа олувчилар рўйхатидан чиқариш кутилмоқда. Банклар билан келишувга эришилгач, хориждан пул олувчилар рўйхати шакллантириб, уларга “бола пули” бермаслик режаланган. Мутасаддилар бу яқин икки ой ичида амалга оширилишини билдиришди.

Ҳукумат йилдан-йилга ижтимоий ёрдам олувчилар сонини камайтирмоқда: 2012 йилда 8,1 миллион киши ижтимоий ҳимоя дастурларидан фойдаланган бўлса, жорий йилда пенсия ва нафақа олувчилар сони 3,9 миллионни ташкил этади. Бугунги кунда мамлакат аҳолиси (34 миллион 700 минг)нинг фақат 11,2 фоизи ҳукуматдан ижтимоий ёрдам олади. (Озодлик, 04.06.2021й)

Изоҳ: Хорижда ишлаётган одамларнинг оилаларини ижтимоий нафақа олувчилар рўйхатидан чиқариш ҳаракатлари бошланганлиги ҳозирги татбиқ этилаётган тузумнинг нақадар шафқатсизлигини яна бир бор исботламоқда. Ваҳоланки, халқ очидан ўлар даражага келиб қолаётган бир пайтда ҳукуматнинг бундай ҳаракати ярага туз сепиш ҳисобланади. Чунки ҳукумат шу йўл билан халқаро молиявий ташкилотлар ва давлатлардан олинган қарзларни узмоқчи бўляпти, яъни халқнинг камбағал қатламига ажратиладиган маблағларни қисқартириш эвазига. Марказий банк маълумотига кўра, Ўзбекистоннинг ташқи қарзи сўнгги бир йилда 37,4 фоизга ошиб, 33,8 млрд. долларга етган. Аслида, бу қарзлар иқтисодиётни жонлантириш учун олинган эди. Бироқ бу деярли ҳеч қандай натижа бермади. Аксинча, шундай ҳам оғир аҳволдаги мамлакат бюджетига қўшимча юк бўлиб тушди.

Ушбу маблағларнинг маълум қисми халққа риболи қарз сифатида тарқатилди. Бу ишларнинг тепасида эса, президент Мирзиёевнинг ўзи турди. У шу йўл билан халқ олдидаги обрўсини кўтармоқчи бўлди. Яна қиммат бинолар қуриш, Тошкент сити каби ҳар хил фойдасиз лойиҳаларга сарфланди. Бир сўз билан айтганда, бир шахснинг пиар кампанияси халққа қимматга тушмоқда, мана энди бу қарзлар унинг ўзидан ундирилмоқда. Юртдаги одамларнинг аҳволи эса, жуда ачинарли ҳолатда. Жумладан, ЮНИСЕФнинг “2019/2020: Ўзбекистондаги болалар вазиятининг таҳлили” ҳисоботида айтилишича, 2018 йилда Ўзбекистон аҳолисининг 11,4 фоизи миллий камбағаллик даражасида яшаган. Камбағал оилаларнинг 52 фоизи ижтимоий ҳимоя тизимидан ҳеч қандай ёрдам олмаслиги таъкидланади. Бу ҳали расмий маълумотлар, асл ҳолат бундан-да ёмонроқ.

Буларнинг барчасига одамларни шафқатсизлик билан эксплуатация қилаётган капиталистик тузум айбдор. Биз мусулмонлар ушбу тузумнинг адолатсиз қонунларига рози бўлиб яшар эканмиз, асло ночорликдан қутула олмаймиз. Бизга ўз боласидек ғамхўрлик қиладиган тузум зарур. Албатта бу Ислом тузумидир. Бундай тузум инсонпарварликда тенгги йўқ бўлиб, инсон ўзини муҳтож эканлигини исботлаши учун бир дунё қоғоз талаб қилинмайди ва уни ёрдам сўраб мурожаат қилиши ҳам кутиб ўтирилмайди. Балки муҳтожларга ёрдам беришни Аллоҳ Таоло буюрганлиги учун бу ишни пайсалга солмай тез ва ўрнида ҳал қилинади. Аслида, биз мусулмонларнинг энг катта муҳтожлигимиз мана шундай низомнинг татбиқ қилинишидадир.

وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ

«Ким Менинг эслатмамдан юз ўгирса, бас, албатта унинг учун танг – бахтсиз ҳаёт бўлур ва Биз уни қиёмат кунида кўр ҳолда тирилтирурмиз».                                                    (Тоҳа-124)

Ҳизб ут-Таҳрирнинг Ўзбекистондаги матбуот бўлими аъзоси Фаррух

07.06.2021й