بِسْمِ اللهِ الرَّحْمنِ الرَّحِيمِ

Жаханнамга тушишни хоҳлайсизми?

Албатта бу саволга хеч ким “ха” деб жавоб бермайди, баъзи бирлар хатто “ақлинг жойидами?” дея жахл ҳам қиладилар.

Хар биримиз ўзимизни мусулмонман деб биламиз, иймон шартларини, харом ва халолни фарқига борамиз, агар Аллоҳ истагандай яшасак Жаннатини мукофот қилиб беришини, ёки ўз нафсимизга қулоқ солиб залолатга юз тутсак Жаханнамига дохил бўлиб қолишимизни жуда яхши англаймиз. Энг муҳими Жаннатни ҳамма хоҳлайди, Жаханнамга киришни хеч ким истамайди. Лекин ҳамма “Жаннатга етиш учун нима қилаяпман?” деган саволни ўзига берармикан? Аллоҳ бутун борлиқни ва шу билан бирга инсониятни яратди, хар бир махлуқотни маълум бир харакатланиш қонун қоидаси ёки хусусияти билан яратган бўлса, инсонни ҳам табиий хусусиятлари билан яратди ва яшаши учун буйруқ ва қайтариқлардан иборат чегарани белгилаб берди. 

Мана шу чегаралар борасида қандай фикрдамиз? Бу чегараларни эътиборга олмай яшасак ҳам Жаннатга кира оламизми? 

Аслида барчамиз Аллоҳнинг борлигига ҳамда У Зотни ягона ва бутун борлиқни яратувчисилигига ва Муҳаммад саллоллоҳу алайхи ва саллам Аллоҳнинг Пайҳамбари эканлигига, албатта хар бир инсон бу хаётни тарк этганидан кейин мана шу дунёдаги қилган амаллари бўйича хисоб китоб қилиниб Жаннат ёки Жаханнамга ташланишига ишонамиз.

Ишонамиз шундайми? Менимча кўпчилигимиз ишонмаймиз, орамизда ишонмайдиганлар ҳам борга ўхшайди, чунки агар ишонганда Яратувчини ўз хожаси деб билиб, У Зотга қул эканлигини хис қилган бўлар эди. бор вужуди билан Аллоҳники эканлигини қалбининг тубидан тан олган инсон қандай қилиб Аллоҳни рози қилишни ўйламасин. 

Аллоҳнинг розилигини истаган одам қандай бўлади? Тасаввур қилинг бирор идорада ишлайсиз ва ишдаги бошлиғингизни доимо сизнинг қилаётган ишларингиздан хурсанд бўлишини хохлайсиз, хатто уйдаги баъзи зарур ишларингизни ташлаб ҳам хўжайин буюрган ишларни битиришга харакат қиласиз. Бу орада онамиз ва отамизга ишимиз зарурлигини тушунтиришга харакат қиламиз, кўпинча оиламиздагиларнинг ўзлари бошлиғимизни биздан хурсанд бўлишини хоҳлашади. Шунинг учун оналаримиз қўлларидан келганча қўллаб қувватласа оталаримиз маслаҳатлар беришади, агар оналаримиздан илтимос қилсак хўжайинни хурсанд қилишимиз учун ширин ва ажойиб таомлар тайёрлаб беришади. Уйларида юмушлари бўлса буларни ҳам битиришга харакат қиламиз, ахир бошлиқ биздан доим хурсанд бўлишини, бизнинг харакатларимиздан ғазабланмаслигини хохлаймиз. Бошлиқнинг характерига, хохиш истакларига қараб муомала қиламиз, ёқмайдиган иш қилиб қўйишдан ўзимизни тийишга харакат қиламиз. Буларнинг барчаси нима учун бир инсонни рози қилиш қилиб у орқали келадиган манфаат учунми?!

Аллоҳ Таъолони рози қилиш учун нима қилябмиз, Аллоҳ Ўзининг рози бўладиган чегарасини белгилаб берди, лекин нима учун доим биз бу чегарани бузиб ўтса бўлади деб хисоблаймиз. Лекин бошлиғимиз инсон бўлса ҳам унга ёқмайдиган амал қилишдан сақланаётган эдик, хурсанд бўлиши учун ўз хоҳишларимиздан вақтинча бўлса ҳам воз кечаётган эдик, Аллоҳ учун нимага ўз хохишларимиздан воз кеча олмаймиз, вахолангки Аллоҳнинг чегаралари ўзимизнинг бахтли бўлишимиз учун ҳам фойдали хисобланади.

Биродарим булар тўғрисида фикрлашингизни хоҳлайман, мақсадим албатта Аллоҳнинг мукофотларига лойиқ бўлиб, Жаннатида яшашингиз учун керакли амалларни қилишингизга чорлашдир. Сухбатимизни яна давом этишини Аллоҳдан сўраб қоламан, Аллоҳ бизларни Ўзи рози бўладиган йўлдан юргизиши учун лойиқ бўлайлик.

Ҳизб ут-Таҳрирнинг Ўзбекистондаги медиа офиси Абдуллоҳ

03.07.2014