Ҳафталик муҳим воқеалар таҳлили
Ҳафталик муҳим воқеалар таҳлили
بِسْمِ اللهِ الرَّحْمٰنِ الرَّحِيمِ
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (gazeta.uz 16.09.2025й): Ўзбекистон ва Афғонистон ҳукуматлари Тути-Майдон газ конини ўзлаштириш ишларини бошлади.
Изоҳ: Хабарга кўра, лойиҳани амалга ошириш бўйича 25 йил муддатли шартнома Ўзбекистоннинг Eriell KAM компанияси томонидан имзоланган. Келишув шартларига кўра, пудратчи биринчи йилда 100 миллион доллар, ўн йил мобайнида эса 1 миллиард долларгача сармоя киритади. Илк икки йилда қазиб олинган газдан 100 мегаватт электр энергияси ишлаб чиқариш режалаштирилган. “Тути-Майдон” конларидаги газ захиралари тахминан 7000 квадрат километр майдонни қамраб олган. Эътиборли жиҳати, Ўзбекистондаги газ конларига асосан Россия эгалик қилади. Ўз юртининг табиий газига эгалик қилолмаган ҳукумат қандай қилиб Афғонистонда газ конларини ўзлаштириши мумкин, деган табиий савол туғилади. Шунинг учун ушбу шартнома ортида, катта эҳтимолга билан, Россия турибди. Чунки юқорида номи тилга олинган компания асосан Россияга боғлиқ ҳолда фаолият юритади. Ўзбекистон эса қайси давлат туришидан қатъий назар, унга “кўприк” вазифасини бажараётган бўлади. Афсуски, Тошкент йирик кучлар ўйинида “геосиёсий кўприк”ка айланмоқда. Исломий юрт бўлмиш Афғонистоннинг замини ҳам, табиий бойликлари ҳам Уммат мулкидир. Ўзбекистон ҳукумати бу бойликларга Ислом ва мусулмонлар душманларининг кириб бориши учун геосиёсий кўприк сифатида хизмат қилиши мусулмон биродарликка ва Уммат манфаатларига зид қадам ҳисобланади. Афғонистон ва Ўзбекистон исломий юртлар бўлиб, халқлари битта Умматнинг ажралмас бўлакларидир. Шунинг учун уларнинг ўзаро муносабатлари мустамлакачи кофирлар орқали эмас, балки Аллоҳнинг шариатига таянган бир уммат сифатида қурилиши керак. Шундай экан, бу халқларнинг тақдирини ҳал қилувчи масала битта, у ҳам бўлса, Рошид Халифалик давлатининг тикланишидир! Зеро, Халифалик бугунги сунъий чегараларни бартараф этиб, уларни ягона вужуд каби бирлаштиради, хатарлардан ҳимоя қилиб, бойликларини фақат мусулмонлар манфаатига йўналтиради ва аввалгидек Буюк Уммат даражасига кўтаради.
Хабар (qalampir.uz 19.09.2025й): Ўзбекистон Республикаси Дин ишлари бўйича қўмитаси 2025 йил 2 сентябрь ҳолатига кўра, экстремизм ва терроризм ғоялари билан йўғрилган деб топилган, республика ҳудудига олиб кириш, тайёрлаш, тарқатиш ва намойиш этиш тақиқланган материаллар рўйхатини эълон қилди.
Изоҳ: Хабарга кўра, 1 400 дан ортиқ контент радикал мазмунда, деб топилган. Эътибор берилса, бу рўйхатни эълон қилиш бошлангандан то ҳозиргача унга бирорта бошқа динга оид контент ёки Исломий бўлмаган ташкилот киритилмайди. Гўё барча ёмонлик ва хавф-хатар Исломий контентдан келадигандек. Ўзбек режимининг бундай ёндашуви унинг хавотири асосан Исломдан, мусулмонларнинг уйғонишидан эканлигини яна бир бор тасдиқлайди. Шу даражадаки, ҳатто бир неча йиллар олдин кимдир диний маърузага “класс” босган бўлса ҳам унга жиноий иш қўзғаб қамоққа ташлаяпти, ҳеч шафқат қилмаяпти. Ўзбек режимининг бундай абсурд ишлари халқимизни қўрқитиб, унинг Исломий уйғонишига қарши телбаларча курашаётганига ёрқин далил эмасми?! Бироқ Аллоҳнинг неъмати бўлмиш динимиз шундай хусусиятга эгаки, унга қарши курашилгани сари одамларнинг Исломга бўлган интилиши фақат кучаяди холос. Шунинг учун ҳам, мусулмон халқимизга айтамизки, ҳукуматнинг “қора рўйхат” деган бундай таҳдидлари ва қўрқитувларига парво қилманг! Бу унинг заифлиги ва сизнинг ҲАҚ тарафида туришингиздан қўрқаётгани ифодасидан бошқа нарса эмас! Чунки у кучини фақат сизга, яъни ўз халқига кўрсатади, Россия, Америка, Хитой каби кучлилар олдида эса ўзини қўйдек ювош тутади. Унинг бу уринишлари, Аллоҳнинг изни ила, албатта, бесамардир. Аллоҳ таоло айтади:
يُرِيدُونَ أَن يُطْفِئُوا نُورَ اللَّهِ بِأَفْوَاهِهِمْ وَيَأْبَى اللَّهُ إِلَّا أَن يُتِمَّ نُورَهُ وَلَوْ كَرِهَ الْكَافِرُونَ
– “Улар Аллоҳнинг нурини оғизлари билан ўчирмоқчи бўлурлар. Аллоҳ эса, гарчи кофирлар ёқтирмаса ҳам, ўз нурини батамом қилишдан бошқа ҳар нарсадан бош тортади”. (Тавба:32)
Хабар (qalampir.uz 19.09.2025й): Ўзбекистон бензин нархи бўйича дунёдаги рейтингини янгилади.
Изоҳ: Жорий йилнинг 14 сентябр ҳолатига кўра, Ўзбекистон энг арзон ёнилғи бўйича дунёнинг 127 давлати орасида 30-ўринни эгаллади. Ўзбекистонда бир литр бензиннинг ўртача нархи 0,98 долларни ташкил қилди. Бу тахминан 1 литр бензин – 11,9 минг сўм дегани. Миллий статистика қўмитаси томонидан эълон қилинган маълумотда 2025 йил январ-июн ойларида ўртача ойлик иш ҳақи қарийб 6 млн сўмни ташкил этгани айтилган эди. Масалан, АҚШда ўртача иш ҳақига 2000-2500 литр бензин сотиб олиш мумкин. Россияда ҳам 1000 литрдан кўпроқ. Ўзбекистонда эса нари борса 500 литр холос. Шунинг учун ҳам бензинни юртимизда асосан бойлар ишлатади, аҳолининг кўп қисми метан газидан фойдаланади. Юқоридаги рейтингда гўё Ўзбекистон бензин нархи бўйича юқорироқ ўринда кўрсатилган бўлса-да, аслида аҳоли даромадига нисбатан олганда ёқилғи нархи жуда қиммат. Бундай қимматчиликнинг сабаби эса аён: ёқилғи бозори монополлаштириб олинган ва Ўзбекистон ўзини-ўзи тўлиқ таъминлай олмайди. Албатта, бу табиий ҳолат эмас, балки ёқилғи бозори бир тўда юқори элита томонидан сунъий бошқариб келинади. Нархлар ҳам сунъий равишда қиммат ҳолатда ушлаб турилади. Бунинг жабрини эса, албатта, шу халқимиз тортяпти. Сунъий пайдо қилинган ёқилғи етишмовчилиги ва қимматлиги одамларнинг энг оғриқли муаммоларидан бирига айланган. Ҳозирги яроқсиз капиталистик тузум ва унинг иқтисодий низомининг оқибати бу. Бу тузумда ҳар қандай нарсага манфаат, фойда олиш эътиборидан қаралади ва одамлар манфаатининг сариқ чақалик қиймати бўлмайди. Исломда эса бунинг тамоман акси. Бензин каби ёқилғи маҳсулотлари умумий мулк туркумидан бўлган нефтдан олинар экан, демак, бензин ишлаб чиқаришга кетадиган харажатларни ўзи ҳисобланади. Бу эса мусулмонлар юқори сифатли ва жуда арзон бензинга эга бўлишларини англатади. Росулуллоҳ ﷺ дедилар: “Умматим уч нарсада шерикдир: сув, олов ва яйловда”. Шунингдек, ёқилғи бозорини бир тўда зўравонлар томонидан эгаллаб олинишига ҳам мутлақо йўл қўйилмайди.
Хабар (xabar.uz 22.09.2025й): ДХХ инсон органлари савдоси билан шуғулланган жиноий гуруҳни фош этди.
Изоҳ: Хабарга кўра, Тошкент шаҳри ва Тошкент, Фарғона, Бухоро ҳамда Қашқадарё вилоятларида яшовчи 12 нафар фуқародан иборат жиноий гуруҳ ижтимоий тармоқлар орқали жиноятларини амалга оширишган. Эътиборли томони, ДХХ томонидан бу жиноят фош бўлгани кенг тарқалмоқда, бироқ инсон тана аъзолари савдосини келтириб чиқараётган асосий омил нима эканлиги ҳақида эса лом-мим дейилмаяпти. Ваҳоланки, азиз ва мукаррам қилиб яратилган инсон тана аъзолари устида савдо қилишдан ҳам хунукроқ жиноят борми?! Бунинг асл сабаби битта, у ҳам бўлса, бугунги капиталистик тузум – инсон ўйлаб топаётган яроқсиз қонунлардир. Чунки капиталистик тузумда тиббиётнинг ривожи ҳам фақат манфаатга қараб йўналтирилади. Инсон танаси аъзоларини кўчириб ўтказиш тиббиёт ютуқларидан саналса-да, бироқ бугун ундан ҳам қайсидир томонларнинг манфаатдор бўлиши асосий ўринга қўйиляпти. Шунинг учун трансплантация ҳозирда – у қонуний бўладими ё ноқонунийми – анчайин катта бизнесга айланиб улгурди. Бу бизнесда, умумий ҳисобда, йилига ўн миллиардлаб долларлар айланади. Бунда асосий фойдани монополист фарм-компаниялар қўлга киритади. Қолаверса, инсон органлари норасмий савдосининг дунё бўйича статистикасига қарасак, бу ҳолат кўпроқ Нигерия, Кения, Сомали, Гана каби халқи иқтисодий қийинчиликда кун кечираётган давлатларда кенг тарқалгани кузатилади. Соддароқ қилиб айтганда, камбағаллар бойлар учун тана аъзоси “етказиб берувчи”лари ҳисобланади. Афсуски, Ўзбекистонда ҳам худди шундай манзара. Бироқ ҳеч ким ўз органини сотган одамлардан нима учун бундай қалтис ишга қўл урганига қизиқмайди. Бунинг сабаблари эса оддий: иқтисодий қийинчилик ва қарзлар. Бундай иллат Ўзбекистонда ҳам кўпайиб бораётгани жуда ташвишланарли ҳолат бўлишига қарамай, ҳукумат бунга жиноий жавобгарликка тортиш билан чора кўргандек бўляпти холос. Аслида, биринчи навбатда, буни келтириб чиқараётган сабабларни бартараф этиш устида бош қотирилиши лозим! Бунинг ҳақиқий ечими эса, фақат Исломдадир. Унга кўра, биринчидан, бундай амалиёт шаръий ҳукмлар асосида тўғри тартибга солинади; иккинчидан, одамларнинг асосий эҳтиёжлари тўлиқ таъминланади ва қолган камолий эҳтиёжларини таъминлашлари учун ҳам шароитлар муҳайё қилиб берилади. Шунингдек, Исломда барчага юқори даражадаги тиббий хизмат таъминлаб берилади ва ҳеч кимнинг тана аъзосини сотишдек аянчли аҳволга тушиб қолишига йўл қўйилмайди.
Хабар (president.uz 23.09.2025й): 23 сентябрь куни Ўзбекистон Республикаси Президенти Шавкат Мирзиёев ва Америка Қўшма Штатлари Президенти Дональд Трампнинг музокаралари бўлиб ўтди. Учрашув БМТ бош қароргоҳида, ташкилот Бош Ассамблеясининг 80-юбилей сессияси доирасида бўлиб ўтди.
Изоҳ: Таъкидлаш жоизки, Мирзиёевнинг Америкага сафари Ўзбекистондаги маҳаллий нашрлар томонидан жуда фаол ёритилди. Уларнинг айримларида “Мирзиёев нуқтага ургани, Трампнинг кўнглига йўл топгани” ҳақида мақола чоп этилди. Чунончи, Мирзиёев Нью-Йоркка ташрифи давомида Американинг йирик компаниялари вакиллари билан учрашувлар ўтказгани ва умумий ҳисобда 105 миллиард долларлик лойиҳаларни муҳокама қилгани ҳақида хабар берилди. Жумладан, Трамп Шавкат Мирзиёевнинг “Boeing” компанияси билан тузган 8 миллиард долларлик шартномасини олқишлаб, Truth Social тармоғида пост қолдирди ва Мирзиёевни “бир сўзли одам” деб мақтади. Мирзиёев ва Трамп учрашуви давомида ҳам икковлон бир-бирини мақтовга кўмиб ташлашди. Трамп Мирзиёевни буюк етакчи деган бўлса, Мирзиёев Трампга қарата “Арманистон-Озарбайжон орасидаги низога ечим топдингиз… Нобель мукофотига сиздан кўра лойиқроқ одам йўқ” дея мақтади. АҚШ президентининг Жанубий ва Марказий Осиё бўйича махсус вакили Сержио Гор эса, Шавкат Мирзиёевга энди у учун Оқ уйга тўғридан-тўғри мурожаат йўли очиқ эканини маълум қилди. Ҳа, эҳтимол бу ташриф давомидаги шартномалар шахсан Мирзиёев ва унинг ҳокимияти учун муваффақият ва ютуқ сифатида кўрилаётган бўлиши мумкиндир, бироқ мусулмон халқимиз учун бунда бирор яхшилик аломати кўринмаяпти. Чунки келишувлар АҚШ томони фойдасини кўзлаб тузилгани шундоқ аён бўлиб турибди. Буни Трампнинг “буларда нефт ва пул кўп”, деган гапидан ҳам англаш қийин эмас. Шунингдек, Трамп иқтидорга келганидан озгина ўтиб, Саудия, БАА ва Қатарга сафар уюштириб, у ерлардан бир неча триллион маблағни олиб чиқиб кетганига қарамай, яқиндагина Қатарга яҳудий вужуди томонидан қилинган авиазарбаларни ёдга олиб ўтмоқ нақадар ўринлидир! Шундай экан, Мирзиёевга ўхшаган Исломий юртлар ҳукмдорлари яҳудий вужудини Ғазодаги ваҳшиёна қирғинлари билан бирга ҳимоя қилаётган Трамп олдидан куч-қудрат, азизлик излашни ўзига ор билмай, балки фахр ва мақтовга сазовор иш сифатида кўрсатишдан тортинмаётгани, афсуски, ўта ачинарли ҳолдир. Уларнинг ҳокимияти ўзларининг мусулмон халқларига эмас, Америкага ўхшаган мустамлакачи давлатлар бераётган “ваъда ва кафолатлар”га таянмоқда. Бинобарин, бундай золим бошқарувларнинг тақдири доим қил устида туради ва яқин кунларда, Аллоҳнинг изни ила, тарих ахлатхонасига улоқтирилади. Ҳақиқий куч-қудрат ва азизлик эса, ёлғиз Аллоҳдандир ва У буни лойиқ бўлган бандасига беради!
الَّذِينَ يَتَّخِذُونَ الْكَافِرِينَ أَوْلِيَاءَ مِن دُونِ الْمُؤْمِنِينَ ۚ أَيَبْتَغُونَ عِندَهُمُ الْعِزَّةَ فَإِنَّ الْعِزَّةَ لِلَّهِ جَمِيعًا
– “Улар мўминларни қўйиб кофирларни дўст тутадилар. Улар ўша кофирлар олдидан куч-қудрат излайдиларми?! (Овора бўладилар!) Зеро, бор куч-қудрат Аллоҳникидир”. (Нисо:139)
Хабар (daryo.uz 23.09.2025й): Ўзбекистонга Хитойдан 100 дона электробус жўнатилди.
Изоҳ: Хабарда айтилишича, 2025 йилда жами 200 дона электробус ва улар учун қувватлаш ускуналарини харид қилиш режалаштирилган. Таъкидланишича, аввалроқ Транспорт вазири ўринбосари Илҳомжон Абдугафаров Хитойнинг Экспорт-импорт банки бошқарув раиси Чен Хуайюй бошчилигидаги делегация билан учрашган. Учрашувда томонлар 200 та электробус сотиб олиш бўйича қарз шартномасини келишиш ва имзолашни тезлаштириш масаласини муҳокама қилган. Шунингдек, қўшимча 1000 та автобус сотиб олиш бўйича лойиҳа юзасидан ҳам фикр алмашилган. Ўтказилган танловда Хитойнинг “YUTONG BUS Cо., Ltd.” компанияси ғолиб бўлиб, компания билан тегишли шартнома имзоланган. Бироқ тузилган шартнома шартлари, жумладан, унинг қиймати, муддати, фоиз ставкалари ёки қай тарзда тўланиши ҳақида маълумот берилмаган. Хитойнинг Экспорт-импорт банки орқали автобуслар учун маблағ ажратилса, аниқки Ўзбекистоннинг шундоқ ҳам кўпайиб бораётган ташқи қарзига яна қўшилади. Шунингдек, электробуслар қарзга олингани ҳисобига, катта эҳтимол билан, йўлкира ҳақлари ҳам ошади… Шу ўринда, нима учун бу каби электробуслар юртимизда ишлаб чиқарилмайди, деган ўринли савол туғилиши табиий. Бунинг сабаби шуки, “мустақиллик”ка 30 йилдан ошган бўлса ҳам, юртимизда оғир саноат йўлга қўйилмади ва бугун ҳам бунга ҳеч қандай уринишлар бўлмаяпти. Шунинг учун ҳам Ўзбекистон техника-технологиялар борасида Хитой каби саноатлашган давлатларга қарамлигича қоляпти. Бундан фақат Хитой каби саноатлашган давлатлар иқтисоди ютади, аммо бизники эмас. Аслида, юртимизда барча хомашё турлари мавжуд, фақат ўз оғир саноатимизга эга бўлсак бас, ҳар турли техника ва станокларни ишлаб чиқаришга кенг имконият пайдо бўлади. Мана шунда соҳаларнинг техник эҳтиёжларини маҳаллий саноат деярли тўлиқ таъминлай олади. Бироқ бунинг учун давлат оғир саноат барпо қилишга йўл бермайдиган бугунги халқаро тартиб кишанларидан озод бўлиб, мустамлакачи давлатлар таъсиридан холи ўз мустақил сиёсатини юритишга ўтиши шарт. Бу эса, албатта, Ислом ва унинг саноатга доир аҳкомларини тўлиқ татбиқ қилиш билангина амалга ошади!
Хабар (daryo.uz 24.09.2025й): “Сизнинг қарорингиз туфайли уйсиз қолдик”. Норин ҳокимининг контейнер уйига шу мазмунда хат қолдирилди.
Изоҳ: Хабарга кўра, ҳокимга қолдирилган хат муаллифи Салима Қўлдошева туман раҳбарининг нотўғри қарори сабаб оила уйсиз қолганини, укаси ҳамон “ватан”сиз эканини ёзган. Қўшимча қилинишича, кўп ўтмай Салима Қўлдошева “Аёллар дафтари”га киритилган. Укасини хориждан қайтарилиб, айни пайтда яшаб турган хонадонига мерос ҳуқуқи бериладиган бўлган. Бугун уй-жой масаласи халқимизни қийнаётган энг оғриқли муаммолардан бири. Маълумки, халқимиз аввалдан кенг ҳовли-жойларда яшашга кўникиб қолган. Чунки аҳолининг аксари катта оилали бўлиб, бир ҳовлида жамулжам яшаш одатий ҳол. Бироқ ҳозирда қурилиш-материаллар ва уй-жойларнинг ниҳоят даражада қимматлаб кетаётгани туфайли, кўпчилик тор ва диққинафас “чумолихона”ларда яшашга мажбур бўляпти. Чунки ер олиб уй қуриш ёки тайёрини сотиб олишга кўпчиликнинг қурби етмай қолган. Шунинг учун одамлар ноилож уй-жойларни риболи ипотека кредитлари орқали олишга мажбур бўляпти. Табиийки, кредитни тўлаш учун ҳам тузукроқ даромад топиш керак. Даромади йўқлар ноилож арзон ижара уйларда яшашдан бошқа чора топишолмайди. Шунга ҳам қурби етмаганлар эса, юқоридаги хабарда айтилганидек, сарсончиликда, оғир шароитларда яшайди. Халқимиз мана шундай қийинчиликлар билан курашаётган бир вақтда, юртимиз раҳбарлари, вазирлару ҳокимлар ҳеч хижолатсиз ҳашаматли қасрларда яшашмоқда. Бу, албатта, капиталистик демократия тузумининг оқибатидир. У ҳокимият эгалари ва капиталист бойларга хизмат қиладиган тузум. Бу тузумда инсонларнинг асосий эҳтиёжларини таъминлашга эътибор берилмайди. Ҳар бир инсоннинг асосий эҳтиёжлари таъминланиши фақат Исломдагина кафолатланади. Чунки Исломда бу давлат зиммасидаги фарз ҳисобланади. Сабаби, асосий эҳтиёж таъминланмаслиги инсон ҳаётини хавф остига қўяди. Бу эҳтиёжларга уй-жой, озиқ-овқат ва кийим-кечаклар киради. Пайғамбаримиз ﷺ айтдилар: “Ҳар бир инсонга керакли нарса – бу уй-жойи, озиқ-овқати ва кийимидир. Агар бунда қониқса, у бахтлидир”. (Саҳиҳ Бухорий, 2/24)
Форуқ
28.09.2025й
