Ҳафталик муҳим воқеалар таҳлили

بسم الله الرحمن الرحيم

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Хабар (uza.uz 06.06.2023й): Ўзбекистон Республикаси президенти Шавкат Мирзиёевнинг таклифига биноан, Қатар амири шайх Тамим бин Ҳамад Ол Соний давлат ташрифи билан Ўзбекистонга келди. Шунингдек, икки давлат мудофаа вазирлари ҳарбий соҳада келгусида амалга оширилиши режалаштирилаётган масалалар борасида ҳам ҳамкорликни давом эттиришнинг истиқболли йўналишлари ҳақида фикр алмашишди.

Изоҳ: Ғарб давлатлари (Америка ёки Англия) Ўзбекистонда Россия ва амбициялари улканлашиб бораётган Хитой таъсирини заифлаштириш мақсадида навбатдаги юришини амалга оширди. Бу юриш Қатарни ҳам ўйинга қўшиш кўринишида бўлди. Ўзбекистон иқтисодий жиҳатдан Хитойга имкон қадар камроқ қарам бўлиши учун Қатар ва Ўзбекистон ўртасида 12 миллиард долларлик инвестициявий лойиҳалар борасида келишувга эришилган бўлса, Ўзбекистоннинг ҳарбий эҳтиёжларини – ҳозир Россия қондиришдан ожиз бўлиб турган вақтда – Қатар орқали қондириш кўзда тутилганлигини тахмин қилиш мумкин. Бу билан Ғарб Марказий Осиё юраги бўлган Ўзбекистонни Туркия йўналишидан ташқари энди Қатарни ҳам ишга солиб ўзига боғлаб олишни кўзлаяпти. Шунинг учун ҳам кўринишидан кўпвекторлига ўхшаган бундай сиёсатни кўпроқ беқарор сиёсат, деб номлаш тўғрироқ бўлади. Ҳукумат бундай ташқи сиёсат билан катта давлатлар, манфаат талашаётган кучлар босимидан ўзи якка ҳолда ҳеч қачон қутулолмайди. Мустамлакачиликнинг олтин қоидаси бўлмиш “парчалаб ташла, ҳукмронлик қил”нинг тасдиғи ўлароқ бугунги вазиятида, Ислом Умматининг бошқа қисмлари қатори муаммолар гирдобида қолиб кетаверади. Нажот йўли ягона – бутун Уммат Хилофат давлатида битта бўлмоғи ва Исломга бутунича амал қилмоғидир.

Хабар (qalampir.uz 09.06.2023й): АҚШ бошчилигидаги ИШИД гуруҳига қарши кураш коалицияси Марказий Осиё республикалари билан ҳамкорликни кенгайтиришни режалаштирмоқда. 8 июнь куни Саудия Арабистони пойтахтида АҚШ давлат котиби Энтони Блинкен иштирокида коалициянинг вазирлар йиғилиши бўлиб ўтган. Ар-Риёдда бўлиб ўтган йиғилишда Тожикистон ва Ўзбекистоннинг кузатувчи сифатида иштирок этишига келишиб олинган.

Изоҳ: ИШИДга қарши халқаро коалиция 2014 йил 4-5 сентябрь кунлари Уэльсда (Буюк Британия) ўтказилган НАТО саммитида АҚШ ташаббуси билан тузилган. Коалиция ташкил этилганидан сўнг ИШИД ташкилотига қарши ҳаводан ва ердан уюштирилган ҳужумлар сони кескин ортди. Шаҳарларни буткул вайрон қилган бу ҳужумлар ортидан ИШИД ташкилоти 2019 йилга келиб барча ерларини бой берди ва тарқалиб кетди. Бу ташкилот буткул тугатилганига қарамай, ИШИДга қарши коалиция фаолияти кенгайтирилаётгани куфр давлатлари ва уларнинг мусулмонлардан бўлган малайлари Исломга қарши курашда ИШИДни баҳона қилишда давом этаётганини яққол кўрсатмоқда. Украина ботқоғига ботаётган Россия Марказий Осиёдаги нуфузини сақлаб қолиш учун террор хавфини пайдо қилишга уринар экан, бу билан минтақа давлатларини расмий Москва билан хавфсизлик ва ҳарбий соҳада ҳамкорликни кучайтиришга ундамоқда. Россия қўлидаги бу воситани ҳам йўққа чиқариш учун Америка ИШИДга қарши кураш коалицияси фаолиятини Марказий Осиёга қаратишни режалаштирмоқда. Нима бўлганда ҳам биз мусулмонлар огоҳ бўлишимиз керакки, бу мустамлакачилар ўз геосиёсий мақсадларини амалга ошириш мақсадида турли номлар ниқоби остида бизнинг динимиз ва эътиқодимизга қарши курашади. Каримов даврида “терроризм”га қарши кураш баҳонасида Америка, сўнгра ва ҳозиргача Россия топшириғи ва кўмаги билан Ислом ва мусулмонларга қарши қанчалик қарши курашилгани ҳеч кимга сир эмас. Ҳатто ҳозирда ҳам “нашид тарқатди ёки …ни молиялаштирди ва ёки ноқонуний диний адабиёт сақлади ва ҳоказо”лар каби арзимас баҳоналар билан йиллаб қамоқ жазоси қўлланаётгани ҳам “терроризм ва экстремизм”га қарши кураш билан тавсифланади. Шу сабабдан мусулмонлар ҳозирданоқ Ўзбекистон ва Тожикистон ҳукуматининг бу коалициядаги иштирокига бефарқ ёки рози бўлиб қолмасликлари лозим. Акс ҳолда Ислом ва мусулмонларга қарши уюштириладиган турли фитна ва зулмларнинг барчасига шерик бўлишади.

Хабар (president.uz 09.06.2023й): Ўзбекистон Республикаси Президенти Шавкат Мирзиёевнинг Италия Республикасига тадбирларга бой тарихий ташрифи якунига етди. Давлатимиз раҳбари Римда Италия Президенти Сержо Маттарелла ва Бош вазири Жоржа Мелони билан самарали музокаралар ўтказди. Икки мамлакат ўртасида стратегик шериклик муносабатларини ўрнатиш тўғрисида қўшма декларация қабул қилинди.

Изоҳ: Италия халқаро сиёсатда катта ўрин тутадиган давлат эмас. Унинг Европа Иттифоқида тутган мавқеини ҳам юқори деб бўлмайди. Аммо саноати ривожланган G7 давлатларидан бири сифатида ЕИ доирасида Франция ва Германиядан кейинги мавқени айнан Италия эгаллайди. Ғарб давлатлари халқаро сиёсатда Хитой ва Россия таъсирини чеклашга бўлган мустамлакачилик кураши ва Россиянинг Украина уруши туфайли заифлашаётгани оқибатида Марказий Осиёда очилаётган имкониятлардан Италия ҳам фойдаланишни истамоқда. Шавкат Мирзиёевнинг Италияга ташрифида ҳам иқтисодий алоқаларни кучайтириш ва Афғонистон масаласи асосий муҳокама мавзуси бўлди. Маълумки, Италия дунёга ривожланган енгил саноати, хусусан дизайнерлик мактаби ва чарм-пойафзал соҳасидаги илғор технологиялари билан машҳур. Табиийки, Ўзбекистон ҳам икки давлат алоқалари доирасида айни шу соҳаларда шартномалар имзолашни кўзлайди. Аммо бундай шартномалар учинчи дунё давлатларидан ҳисобланмиш Ўзбекистон учун қанчалик истиқболли деган саволга келсак, бу мамлакатнинг на саноат ва на иқтисод жиҳатдан ўсишига ёрдам бермайди. Чунки ундай давлатлар учинчи дунё давлатларини келажакда рақобат қиладиган саноатлашган мамлакатлар эмас, балки ўзлари ишлаб чиқарган маҳсулотларга бозор бўлиб қолишини исташади. Шунинг учун улар мабодо ишлаб чиқариш корхоналари, енгил саноат фабрикалари бўйича шартномалар имзолаган тақдирда ҳам, ҳеч қачон энг сўнгги ва ривожланганларини эмас, 20-30 йиллик эскирган технологияларни олиб киради. Натижада экспорт импортдан ошиб ўтолмайди ва иқтисод ўша қолоқлигича қолиб кетаверади. Қолаверса, улар ўша эскирган технологияни ҳам шериклик асосида олиб киради ва асосий назорат пакетини ўзида ушлаб қолади ҳамда киритган инвестициясидан кўзлаган фойдани арзон ишчи кучи эвазига қоплашни ўйлайди холос. Чет эл инвестори учун халқаро бозор талабларига жавоб берадиган рақобатбардош маҳсулот ишлаб чиқариш ва бунинг ортидан мамлакат экспорт салоҳиятини ривожлантириш умуман аҳамиятсиздир. Булар кўп исбот талаб қиладиган нарсалар эмас. Қолаверса, Италия мода, дизайнерлик соҳасида нафақат Европада, балки бутун дунёда етакчи давлат ҳисобланади ва бундаги ҳамкорлик “замонавий модалар” ниқоби остида мусулмон ёшларга бузуқ Ғарб дунёқараши ва маданиятини жадал олиб киришга ҳаракат қилади. Тошкентда жорий йил май ойида бўлиб ўтган Uzbekistan Fashion Week мода ҳафталиги ҳам фикримизга ёрқин далилдир. Демак, хулоса ўрнида айтиш мумкинки, Ўзбекистон учун АҚШ, Россия, Хитой ва Европа каби очкўз, мустамлакачи давлатлар билан ҳар қанақа турдаги ҳамкорлик шартномалари ҳеч қандай муваффақият келтирмайди ва бу мусулмон халқ ўша давлатларнинг аҳолисига хизматкор, қора ва арзон ишчи кучи сифатида қолиб кетаверади. Давлат ҳақиқий маънода саноатлашган, иқтисодий томондан ривожланган, халқи фаровон мамлакатга айланиши учун – ваҳоланки, буни ҳамма истайди – ягона йўл ҳаётнинг барча соҳасига мукаммал ечим берган Исломга бутунича қайтиш, яъни Хилофат давлатини қайта тиклашдир. Ана шунда биз нафақат енгил, балки оғир саноатга ҳам эга бўламиз ва барча соҳалар қатори иқтисодда ҳам етакчи кучга айланамиз.

Хабар (kun.uz 10.06.2023й): Навоийлик кекса аёлга 5 йил олдин диний маърузага “класс” босгани учун 3 йилга озодликни чеклаш жазоси берилди. У 2018 йилда “Одноклассники.ру” ижтимоий тармоғида профиль очган ҳамда ўзбекзабон шахснинг “бенамозлик” ҳақидаги 5 дақиқалик видео маърузасига “класс” босган.

Изоҳ: Сўнгги пайтларда куч ишлатар тизимлар фаолиятида кескин бурилиш кузатиляпти. Расмий имомларнинг маърузаларини тарқатиш, жума айёми билан табриклаш, ҳатто Исломий хайр-хўшлашиш ҳам жиноят сифатида малакаланаётганига гувоҳ бўляпмиз. Айни пайтда мусулмон халқимизнинг эътиқоди ва қадриятларини таҳқирлаётганлар ҳамда фаҳш ва бузуқликка тарғиб қилувчи материалларга “класс” босаётганлар ҳеч қандай жазо олмаётганини ҳам кўриб турибмиз. Бундай аҳмоқона сиёсат охирги пайтларда коммунистча зеҳниятдаги Россияда кузатилган эди. Шундан тахмин қилиш мумкинки,  Россия манфаатларига ишлаётган кадрлар мусулмон халқнинг ўз Исломига омматан қайтишига чек қўйиш учун шундай кескин чоралар кўришмоқда. Бу билан Америка бошлиқ Ғарбнинг эътиқод эркинлиги ва инсон ҳуқуқлари талаб ва мажбуриятларинии бузиш орқали Ғарб билан Ўзбекистон ҳукумати орасига зиддият солишни мақсад қилишган. Бу икки кофир мустамлакачиларнинг манфаат талашиб олиб бораётган курашида қурбон бўлаётганлар эса, яна мусулмонлар бўляпти. Бу ёвуз давлатларнинг юртларимизга ўрнатган тузумлари ва уларга сидқидилдан хизмат қилувчи кадрлар ҳокимиятда қолар экан, мусулмонларга ҳеч қачон эмин-эркин ҳаёт бўлмайди. Мусулмонлар Исломни бутунича қабул қилиб, унга тўғри амал қилиш орқали Рошид Халифаликни тикламас эканлар, Уммат устидаги зулмлар турли шаклда давом этаверади.

Ҳизб ут-Таҳрир Ўзбекистон матбуот бўлими аъзоси Абдураҳмон

13.06.2023й