Ҳафталик муҳим воқеалар таҳлили

بسم الله الرحمن الرحيم

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Хабар (qalampir.uz 28.08.2023й): “Euromonitor International” тадбиркорлик бўйича халқаро статистика агентлиги дунёнинг 105 та давлатида аҳоли қанча пулини озиқ-овқат маҳсулотларига сарфлаши ҳақидаги статистик маълумотларни тақдим этди. Ўзбекистон рейтингнинг охирги ўнлигига киритилган. Унга кўра, ўзбекистонликлар маошининг 46,5 фоизини озиқ-овқатга сарфлайди.

Изоҳ: Бундай статистикага юзаки қараган одам ўзбекистонликлар озиқ-овқатга жуда ўч, ейиш-ичишдан бошқасини билмайди, дея хулоса чиқариши мумкин. Бироқ бу ҳақида атрофлича ўрганган одам, рақамларда жуда оғриқли муаммолар ўз аксини топганини тушуниб етади. Мазкур рейтингда ўз даромадининг 6,7 фоизини озиқ-овқатга сарфлайдиган Америка халқи биринчи ўринда қайд этилган. Хўш, бундан америкаликлар ўзбекистонликлардан анча кам ейди ёки жуда тежаб харажат қилади, деган хулоса келиб чиқадими? Йўқ, албатта. Чунки одамлар – улар қайси миллат бўлишидан қатъий назар, деярли бир хил еб-ичадилар, истеъмол қиладилар. Бу ердаги фарқ шуки, америкаликнинг даромади ўзи яшаётган жамиятдаги озиқ-овқат нархларидан сезиларли даражада баланд. Аксинча, ўзбекистонлик топаётган даромад ўзи яшаётган жамиятдаги озиқ-овқат нархларига таққослаганда жуда кам эканлигидир. Яъни халқимизнинг яшаш даражаси шунчалик пастки, биргина озиқ-овқатга бўлган эҳтиёжини қондириш учун даромадини деярли ярмини сарфлашга мажбур бўляпти. Шунда ҳам ейиш-ичиши жуда тўкис эмас, ҳатто ўртамиёнага ҳам етиб бормайди. Халқимиз топаётган даромад инфляция ва нархларнинг тўхтовсиз ўсиб бораётгани натижасида ҳеч нарсага ярамай қоляпти. Буларга параллел равишда борган сари пулнинг харид қобилияти пасайиб кетяпти. Даромаддаги ўсиш нарх ва инфляция ўсиши даражасидан пастлигича қоляпти. Бу масалани юртимиздаги баъзи иқтисодчилар ҳам кўтариб чиқиб, бирор чора кўришга чақиришяпти. Бироқ на уларда ва на бошқасида тўғри ечимнинг ўзи йўқ. Чунки улар ҳам, ҳукумат ҳам – гарчи ўзини халқнинг аҳволидан ташвишланаётганга солаётган бўлса-да – ечимни капиталистик иқтисоддан қидиришяпти. Агар улар ечимни Исломдан қидиришганда эди, инсоннинг ҳар қандай муаммосига энг тўғри ечимларни топишган бўларди. Афсуски, улар Исломни ўрганиш ўрнига унга беэътиборлик билан қарашяпти, ҳукумат эса халқимизни Исломдан узоқлаштиришга уриниб келяпти.

Хабар (uza.uz 31.08.2023й): АОКАда ўтказилган брифингда Тоғ-кон саноати ва геология вазирлиги бошқарма бошлиғи Нурбек Пўлатовнинг маълум қилишича, 2024 йил 1 январдан счётчикларсиз ер ости сув олиш иншоотларидан фойдаланиш тақиқланади.

Изоҳ: Маълумки, Ўзбекистон ҳукумати моддий манфаатни асос қилувчи демократик тузумни қабул қилганлиги сабабли аҳолини томорқа экинларига зарур бўлган сув билан таъминлаш тугул рўзғори учун керакли бўлганларини ҳам ҳал қилиб беролмаяпти. Давлат айниқса туман ва қишлоқ жойлардаги аҳолини сув билан тўла таъминлай олмагач, халқимиз ўзи харажат қилиб уйларидан сув чиқариб олишга мажбур бўляпти. Одамларнинг сув неъматига эришишларида ҳеч қандай иштироки бўлмаган ҳолатда ҳукуматнинг сув учун солиқ жорий қилиши очиқ зулмдир. 2024 йилдан амалда бўладиган қонунга кўра, ҳисоблагич ўрнатган кишилар исталган миқдорда иншоотлар ўрнатиши ва ер ости сувларини хоҳлаганча қазиб олиши мумкин бўлар экан. Шубҳасиз, ҳукумат бу сиёсати билан сув ресурсларини асрашни ҳам, уни тўғри тақсимлашни ҳам кўзлаётгани йўқ. Аксинча, Америка таъсири остидаги халқаро молиявий ташкилотлар сувни товарга айлантириш бўйича қўйган талабини бажариш йўлидан боряпти. Бунга яқинда ХВЖ директори Кристалина Георгиеванинг “сувнинг бозор нархи шаклланмагани” ҳақидаги гапларини келтириш мумкин. Шундан кўп ўтмай сувнинг нархи сезиларли даражада кўтарилди. Мана энди ким уйидан сув чиқариб олса ҳам, бошқа ердан сув чиқарса ҳам ҳисоблагич ўрнатиб, солиқ тўлаши шарт бўлади. Шунга кўра айтамизки, халқимиз анави ХВЖ каби ташкилотларнинг юртимиз иқтисодини назоратга олиб, ҳатто текинликда “сув текинга” дея масалга айланган сувни ҳам фойда кўриш манбасига айлантираётганини тушуниши лозим. Барча балоларнинг боши аслида татбиқ қилинаётган капиталистик иқтисод низоми эканлигини ҳам англаш вақти аллақачон етиб келди.

Хабар (qalampir.uz 31.08.2023й): Шу кунларда ижтимоий тармоқларда Навоий вилояти Қизилтепа туманининг Тўдакўл сув ҳавзасида ўтказилиши кутилаётган “Стихия” фестивали жамоатчиликнинг салбий фикрлари ва муҳокамаларига сабаб бўлмоқда. Вилоят ҳокимлиги мазкур ҳолат юзасидан муносабат билдирди. Раҳбарият маънавиятга зид, менталитетга хос бўлмаган ҳар қандай тадбирга қарши эканлигини маълум қилган.

Изоҳ: Маҳаллий ҳокимият бу каби тадбирларга қарши эканлигини айтган бўлса ҳам уни ўтказишга рухсат берган. У одамларнинг кескин норозилигига ҳам қараб ўтирмади. Бундан аввал ушбу фестивал 2021 йил 14-15 май кунлари Қорақалпоғистоннинг Мўйноқ шаҳрида ўтказилган ва ўшанда ҳам одамлар норози бўлишганди. Бунга фестивалда турист аёлларнинг яланғоч рақсга тушгани видеоси тарқалиши сабаб бўлганди. Ўшанда ҳам маҳаллий ҳокимият бу видеонинг фестивалга алоқаси йўқлигини айтиб чиққанди. Ҳукумат нафақат бу каби бузуқ фестивалларни ўтказишга бирор тўсиқ қўймаяпти, балки тунги клублар, барлар каби фаҳш ва жиноятлар уяси бўлган жойларнинг кеча-ю кундуз ишлашига рухсат беряпти. Бу борада ҳеч қандай назорат йўқ. Ҳукуматни фақат булар солиқни ўз вақтида тўлаяптими ёки йўқми, деган масала ташвишлантиради холос. Шундан кейин ҳам ҳукумат ва унинг сиёсатини қўллаётган имом-домлалар бугунги ёшларимизнинг тарбиясиз, ахлоқсиз ва илмсиз эканлигини айтиб айюҳаннос солишлари одамни энсасини қотиради. Булардан маълум бўладики, ёшларимизнинг ҳозирги аҳволи ҳақидаги бу даъволар ёлғондир. Агар улар бу даъволарида ростгўй ва холис бўлганларида, ҳукумат бундай бузуқ тадбирларни тақиқлаган, тунги клуб ва барлар каби шайтон уйларини бутунлай ёпиб бартараф қилган бўларди. Имом-домлалар эса, ҳукуматни ҳам, ёш авлодни ҳам бундай ишларнинг хунук оқибатларидан огоҳ этиб инсофга чақирган ва муҳосаба қилган бўларди. Бугун эса бунинг акси ўлароқ, ҳукумат ҳам, диний идора ва қўмита ҳам мусулмон ёшларни соф Исломдан узоқ тутишга қаттиқ уриниб келмоқда. Шунга кўра айтамизки, ҳозирги демократик тузумни татбиқ қилаётган ҳукуматдан ёшларимизни илмли, энг асосийси Аллоҳни танийдиган, ҳалол-ҳаромни ажратадиган мусулмон шахслар қилиб тарбиялашини кутиш нодонликдир. Шунинг учун келажагимиз асоси ҳисобланадиган ёшларнинг тарбияси ва тақдири катта хавф остида турибди. Уларни бундай хавф-хатардан фақат Ислом тузумини ҳокимият тепасига олиб келишгина қутқара олади.

Хабар (state.gov 31.08.2023й): АҚШ давлат котиби Энтони Блинкен расмий Вашингтон номидан Ўзбекистон халқини Мустақиллик куни билан табриклади. Энтони Блинкеннинг қайд этишича, 32 йил давомида АҚШ ва Ўзбекистон ҳамкорлиги Ўзбекистон мустақиллиги, суверенитети ва ҳудудий яхлитлигига умумий садоқат асосида қурилган. 

Изоҳ: Америка расмийларининг “мустақиллик куни” муносабати билан ҳар йили Ўзбекистонга табрик йўллашлари одатий ҳол бўлишига қарамай, бу сафар ўзбек ҳукуматига бошқачароқ, аниқроғи юқорироқ даражада “ҳурмат-эътибор” кўрсатилди. Масалан, Вашингтон шаҳри мэри Муриел Баузер жорий йилнинг 1 сентябрини АҚШ пойтахтида “Ўзбекистон Республикаси Мустақиллигининг 32 йиллиги куни” деб расман эълон қилди. Эътиборлиси, Google қидирув тизими ўз логотипини “Ўзбекистон мустақиллигининг 32 йиллигига бағишланган” дудл билан вақтинча ўзгартирди. Буларнинг барчаси мустақиллик деган нарса – мустамлакачилик қуроли сифатида – мустамлакачи давлатлар, айниқса, Америка учун қанчалик муҳим эканини ва ўзбек ҳукуматига сохта обрў олиб бериш орқали ўзига янада кўпроқ оғдиришни мақсад қилганини кўрсатади. Блинкеннинг мустақиллик, суверенитет ва ҳудудий яхлитлик ҳақидаги гапларига келсак, бу Американинг нақадар иккиюзламачи эканлигини яна бир бор тасдиқлайди. Зеро, айнан Америка Ироқ, Афғонистон каби Исломий юртлар ва бошқа мамлакатларнинг суверенитетини ер билан битта қилиб, ўзлари ўйлаб топган халқаро меъёрлар ва қонунларни оёқости қилган ҳолда у ерларга бостириб кирган эди. Ёки Индонезияга қарашли Шарқий Тимор ва Судандаги Дарфур каби кўпроқ аҳолиси насронийлардан иборат провинцияларда мустақиллик ҳаракатларини юзага келтириб, уларнинг суверенитетини оёқости қилганига ҳали ҳеч қанча вақт бўлгани йўқ. Агар Ўзбекистон ҳам Американинг мустамлакачилик талабларига умуман жавоб бермайдиган бўлса, эртага Қорақалпоғистонга ўхшаган ҳудудда фитна чиқариб, мустақиллик ҳаракатларини яна қайта жонлантириши ҳам мумкин. Шундай экан, ушбу мустамлакачи кофир давлатлар бизнинг душманимиз бўлганлиги учун уларнинг ҳеч бир гапига ишониб бўлмайди. Айниқса, юртимиздаги иймон аҳли – уларнинг сохта табриклари ва мунофиқона жилмайишларига ишониб – улар ҳақида бирор яхши гумонга боришлари асло жоиз эмас. Зеро, бу борада Аллоҳ Таоло бизга аниқ-равшан йўлланма бериб, кофирларнинг сўзларидан уларнинг мусулмонларга нисбатан нафрати ошкора билиниб туриши, қалбларидаги нафрат эса, ундан-да қаттиқроқ эканини баён қилган.

Ҳизб ут-Таҳрир Ўзбекистон матбуот бўлими аъзоси Форуқ

04.09.2023й