Ғарб учун Исломдаги муаммо нимада?
بِسْمِ اللهِ الرَّحْمٰنِ الرَّحِيم
Ғарб учун Исломдаги муаммо нимада?
Ғарб учун капиталистик системага хавф соладиган давлат системасининг мавжуд бўлиши муаммога айланган бўларди. Ғарб учун шундай бир ҳолат муаммо туғдирадики, у моддий манфаатни ҳамма нарсадан устун қўядиган капиталистик система ва унинг қийматларини савол остига қўяди. Ғарб одамлар чўнтагига солинган қўлини кесиб ташлайдиган алтернатив система келишидан қўрқади. Замонавий дунёда бирор нарсани сотиб олиш ёки айирбошлашда муаммо йўқ, муаммо асло бунда эмас. Муаммо шундаки, сенга муайян нархни, муайян савдони, муайян ўйин қоидаларини тиқиштиришади, мол-мулкингни юзсизларча тортиб олишади, ўзинг хоҳламаган нарсани сотиш ёки харид қилишга мажбурлашади. Мана муаммо нимада. Агар ўзининг мустақил қарорига, иқтисодиёт, ижтимоий алоқалар, сиёсат ва бошқарувга нисбатан ўз нуқтаи назарига эга бўлган мустақил давлат системаси юзага келса, бу Ғарб учун муаммо туғдиради. Агар кимдир соқол қўйса ёки исломий шиорларни кўтариб чиқса, бу Ғарб учун муаммо эмас.
Биринчи Жаҳон уруши тугаши арафасида Британия Боғдодни босиб олганда, Британия қуролли кучлари қўмондони шаҳарда чақирилаётган азонни эшитиб, “У нимани куйлаяпти”, деб сўрайди. Унга: “У ибодатга чақиряпти”, деб жавоб беришади. Шунда у: “Унинг чақирувида бизнинг бу ерда мавжуд бўлиб туришимизга норозилик борми?”, деб сўради. Унга: “Йўқ”, деб жавоб беришди. У эса, “Ундай бўлса у азон чақираверсин, унинг чиройли овози бор экан”, деган экан. Тасаввур қиляпсизми, у бу бечорага азон чақиришга рухсат беряпти. Шунинг учун, агар бугун Ислом, азон ва масжид Американинг мусулмонлар ерларида мавжуд бўлиб туришига қарши чиқмас экан, унда мана шундай Ислом давом этаверсин. Лекин агар Ислом ўзига хос сиёсий ва иқтисодий система бўладиган бўлса, агар у бизнинг ерларимизда ХВЖ (Халқаро валюта жамғармаси), ЖСТ (Жаҳон савдо ташкилоти), Жаҳон банки филиаллари ва капитализмнинг бошқа институтларини жойлашишига барҳам берса, унда биз билан Ғарб ўртасида муаммо чиқиши аниқ. Шунингдек, одамлар Исломга фитрий, ғаризавий, ақлий жиҳатданми, хуллас қандай йўл билан бўлса ҳам интилар эканлар, Ғарб бу жараёнга аралашади.
Ғарб Исломни ўз манфаатларига мувофиқ равишда мўътадиллаштиришга ҳаракат қилади ва шундай дейди: “Келинглар, биз Исломни озгина ўзгартирамиз. Биз ҳаммамиз диндош биродарлармиз, шундай маънодаки, биз ҳаммамиз Иброҳим а.с. авлодларимиз, демакки, насронийлар, яҳудийлар ва мусулмонлар бир-бирлари билан тенгдирлар. Тўғри, ҳаммани дини ҳар хил, лекин ҳаммамизнинг илдизимиз бир, бу Мусо а.с. дан бошланиб Исо а.с. билан давом этган ва Муҳаммад с.а.в. билан якунланган. Демак, учала дин бир хилдир”. Улар динлараро диалогдан мана шундай фикрни кўзлайдилар, бу билан улар Исломни унинг ҳаётий низомидан айиришни хоҳлайдилар ва бошқа қуруқ руҳий динларга тенглаштирмоқчи бўладилар.
Ғарб яқинда бўлиб ўтган мусулмонлар қўзғолонларини йўқ қилди ёки ўзгартириб юборди. Биз Америка ва Европа давлатлари ҳукмронлиги остида бўла туриб инқилоблар уюштирдик, ҳатто ғарб давлатларининг разведка хизматлари ҳам бу инқилобларни олдиндан кўра олмади. Инқилоблар бошланиши билан Ғарб уларни йўлдан уришга ҳаракат қилди. Унисини сотиб олди, бунисига пул тўлади, бошқасини ҳаракатга келтирди ва шундай йўллар билан ниятига эришди. Ўтмишда Ғарб Исломни сиёсий доиралардан йўқ қилди, унинг ўрнини эса, бошқа фикрлар билан тўлдирди. Масалан, социализмни Ислом билан аралаштирди, уни шундай номлашди ҳам, яъни социалистик Ислом деб номлашди. Нимага социалистик Ислом? Чунки саҳоба абу Зарр р.а. заиф ва камбағалларга яхши муносабатда бўлган. Социализм ҳам заиф ва камбағалларга яхши муносабатда бўлади. Демак, Ислом социалистикдир. Кейин улар капиталистик Исломни эътироф этишди. Нимага капиталистик Ислом? Чунки саҳоба Усмон р.а. йирик сармояга эга бўлган, тадбиркорлик қилган, демак, саҳобалар орасида капитализм бўлган. Энди улар демократик Исломни гапиришмоқда. Нимага демократик Ислом? Чунки Исломда Шўро мажлиси бор. Ҳатто янги термин ҳам ўйлаб топишди – Шўрократия. Исломни бузиб кўрсатиш ва уни асл моҳиятидан мосуво қилиш Ғарбнинг энг сўнгги ҳимоя чизиғига айланди.
Мен яна бир бор такрорлайманки, биз Ислом ҳақида гапираётганимизда сиёсий низомни назарда тутамиз. Пайғамбаримиз Муҳаммад с.а.в. Маккадалик пайтларида Макка ўзининг адолатсизлиги, золимлиги ва репрессияси билан замонавий Америкага ўхшарди. Расулуллоҳ с.а.в. тарозидан уриб қолувчиларга танбеҳ бердилар ва шундай дедилар: “Тарозидан уриб қолувчиларнинг ҳолига вой”. Шу тарзда Расулуллоҳ с.а.в. нафақат тарозидан уришни ўзига, балки шу иш билан шуғулланувчиларга ҳам ҳужум қилдилар. Улар тарозидан урадиганларга бало-мусибат етишини таъкидладилар. Шундай йўл билан у зот жамиятда ҳукмронлик қилаётган буд-санамларга сиғинишга қарши ҳужум қилдилар. Улар айнан уларнинг фикрлаш услубига ҳужум қилдилар.
Бугун биз ҳам худди шундай капиталистик фикрлаш услубига, муросасозлик ва Исломнинг бир қисмидан воз кечиш фикрига ҳужум қилишимиз лозим. Агар сен уларнинг фикрлаш услубига эргашадиган бўлсанг, мақсадингдан чалғиб кетасан. Ислом Расулуллоҳ с.а.в. га туширилиши бошлангандаёқ одамлар турмуш тарзини бутунлай ўзгартириш учун бизга революцион йўл билан келди. Расулуллоҳ с.а.в. Маккада одамларни қул қилаётган абу Суфён ҳукмронлигига норози эдилар, абу Жахл, Волид ибн Муғийра ва унга ўхшаганларнинг ҳукмронлигига норози эдилар. Тарозидан урадиганларнинг ҳукмронлигига, қизларни тириклай кўмилишига, моддий манфаат учун одамлар ҳуқуқларини чеклайдиган кимсаларнинг ҳукмронлигига норози эдилар. Ислом шу ҳолатни ўзгартириш учун келди, у билан ҳисоблашиш учун эмас. Американинг бундай Исломни кўришга тоқати йўқ ва шу сабабли у одамлар орасида динлараро диалогни ўзи истаган йўсинда йўлга қўймоқда. У бу ишни ягона мақсад – Исломни асл моҳиятидан маҳрум қилиш учун қилмоқда, худди 60-70 йилларда социализмни янгидан национал-социализм деб тарғиб қилиб, уни асл моҳиятидан маҳрум қилганидек. Ўша пайтда француз социализми деган шиор кўтарилди, француз социализми ўзи қаердан пайдо бўлди? Францияда социалистик партиялар ташкил қилинди, улар социалистик шиорларни кўтариб чиқишди ва одамлар уларни яхши кўрдилар. Бу иш одамларнинг Собиқ Иттифоқдаги коммунистик партияга эргашиб кетмасликлари ва унинг Европага таъсирини олдини олиш учун қилинган эди. Натижада социализм ғояси Европада асл моҳиятини йўқотди.
Бугун Ислом инсониятни капитализм ҳукмронлигидан халос қилиш кучига эга бўлмаслиги учун Ғарб худди шундай йўл билан Исломни асл моҳиятидан маҳрум қилмоқчи.
Доктор Муҳаммад Малковий нутқидан
