«Қатъийлик бўрони» Ҳусийларни йўқ қилиш учун эмас қутқариш учун келган
بِسْمِ اللَّـهِ الرَّحْمَـٰنِ الرَّحِيمِ
Роя газетаси:
«Қатъийлик бўрони» Ҳусийларни йўқ қилиш учун эмас қутқариш учун келган
Ҳижрий 1438 йил 27 жумодус-соний, милодий 2017 йил 26 март якшанба куни «Арабийя нет» сайтида «Бундан икки йил аввал худди шу куни «Қатъийлик бўрони» нима мақсадда таъсис этилган эди?» сарлавҳаси остида мақола чоп этилди. Мақолада бундай дейилади:
«Риёз вақти билан кеч соат 12ларда араб давлатлари коалицияси баёнот чиқариб, Яманнинг мутлақ қонунийлигини қўллаб-қувватлаган ҳолда, давлат тўнтаришига қарши қатъийлик бўрони амалиёти бошланганини билдирди.
Баёнотда фақат уруш эълон қилингани йўқ. Балки маҳаллий ва халқаро жамоатчиликка айни қарорнинг чиқиши сабаблари, шарт-шароитлари ҳам маълум қилинди».
Баёнотда айтилишича, «Қатъийлик бўрони» амалиёти, Ямандаги қонуний ҳукумат талаби билан бошланди, чунки тинчлик ечимига эришиш учун Яман ва унинг халқини қутқариш йўлида олиб борилган регионал ва халқаро саъй-ҳаракатлар муваффақият келтирмади. Зеро, Ҳусий инқилобчилар бунга қарши чиқиб, ўзларининг ҳужум амалиётларида қаттиқ туриб олишди.
Бу қарор қалтис бир пайтда, яъни Ҳусийлар Хавфсизлик кенгаши томондан қилинган талабларга қарамай, ўз иттифоқчилари билан биргаликда Лаҳж ва Адан томон ҳаракатланиб, жанубга ҳужум қилишга куч тўплаётган ҳамда ҳукумат муассасаларини ишғол этишда ва янги минтақаларни қўлга киритишда даъвом этаётган бир пайтда эълон қилинди, дейилади баёнотда.
Коалиция баёнотида яна айтилишича, «Қатъийлик бўрони» амалиётидан фақат Яманнигина эмас, балки – Эроннинг минтақада ортиб бораётган ҳарбий сафарбарлигига қарши туриш орқали – бутун минтақани қутқариш мақсад қилинган. Зеро, Эрон Яман устидан ўз ҳукмронлигини ўрнатишга ва ўзининг минтақадаги нуфузини кенгайтириш учун Яманни ўзининг базасига айлантириб олишга ҳаракат қилмоқда.
Бу амалиёт Ҳусийларнинг нафақат Яманга, балки қўшни давлатларга, хусусан, Саудияга таҳдид солаётганига қарши реакция сифатида бошланди. Зеро, жангарилар Ямандаги қонуний ҳукуматнинг назоратисиз оғир қуроллар, қисқа ва узоқ масофага мўлжалланган ракеталар билан қуролланган бўлиб, Яманга қўшни бўлган давлатлар барқарорлигини издан чиқаришни мақсад қилишган эди».
Роя газетаси шарҳи:
«Қатъийлик бўрони»ни бошлашдан мақсад мустамлакачи давлатлар сиёсатига хизмат қилувчи ахборот воситалари кўрсатаётган нарса эмас. Яъни, бундан президент Абдуроббиҳ Мансур Ҳодий қонунийлигининг ғалаба қозониши мақсад қилинмаган. Зеро, Саудия, Бирлашган Араб Амирликлари, Америка ва Британиядан иборат халқаро тўртлик Керри ташаббусига имзо чекди. Бу ташаббус Ҳодий салоҳиятларини барча тарафлар эътироф этган ноибга олиб бериш ва Ҳусийларни Яман бошқарувига шерик қилишни тақозо қилади. Бу шуни англатадики, Саудиянинг биринчи галдаги ташвиши, Ҳодий қонунийлигини таъминлаш ҳам, унинг бошқарувда давом этиши ҳам бўлмаган, шунингдек, Саудия Ҳусийларни Яман бошқарувига шерик қилишга розидир. Ҳусийлар Яман бошқарувининг Саудия қўлида бўлишига мудом рози эканлар, демак, Саудия уларнинг ҳукуматга келишига монелик қилмайди. Чунки Саудия Америка томонидан ўзи учун минтақада, хусусан, Яманда Эроннинг ўрнига алоҳида рол берилишидан умидвор. Шундай экан, «Қатъийлик бўрони» ортида АҚШнинг мақсади ётибди. Яъни Америка инглизларнинг яккаҳокимлигига ва Али Солиҳнинг қайтишига йўл қўймасликни кўзлаган. Али Солиҳ эса, инглизлар буйруғи билан, гўё ўзини Ҳусийларга иттифоқчи қилиб кўрсатяпти. Аслида эса, уларни юртнинг у чеккасидан бу чеккасига қадар чўзилган уруш оловига тиқиб, ҳолдан тойдириб, сўнг яксон қилишни кўзламоқда. Бунга далил, Саудия Ҳусийлар билан мулоқот олиб боряпти, аммо Али Солиҳ билан мулоқот олиб боришдан ўзини олиб қочяпти. Али Солиҳнинг ўғли Аҳмад уруш бошланганда Риёзга бориб, улардан қўллаб-қувватлашларини ва Ҳусийларни Саъдада инларига киритиб юборишни таклиф қилган бўлса ҳам Саудия Али Солиҳ билан мулоқот олиб боришни истамаяпти… Бирлашган Араб Амирлигига келсак, у инглизларга хизмат қилади, бироқ у ҳам «Қатъийлик бўрони»дан фойдаланди. Яъни Али Солиҳ қанотини ва унинг кўпчилик оиласи билан бирга Амирликда истиқомат қилаётган ўғлини Ҳодий қанотига қарши қайта бошқарувга олиб келиш мақсадида фойдаланди. Ҳодий бўлса, кўпроқ Ҳизбул Ислоҳ (Ихвонул Муслимин)га орқа қилмоқда.
Хуллас, «Қатъийлик бўрони» АҚШ урушидир. Америка бу урушдан Ҳусийларни мазлум қилиб кўрсатиб уларга нисбатан хайрихоҳлик пайдо қилишни, кейинчалик уларни Яман бошқарувига шерик қилишни мақсад қилган. Ҳусийлар пойтахт Санъога кириб, юртнинг қолган ерларини тарқоқ шаклда бошқаргани ҳамда юртни идора қилишда омадлари чопмагани учун Америка шундай қилишга мажбур бўлмоқда.
Роя газетасининг 2017 йил 29 март чоршанба кунги 123-сонидан
