بِسْمِ اللهِ الرَّحْمٰنِ الرَّحِيمِ

Ботил дунёсида ҳеч қачон умид туғилмайди

Инсоният тарихи давомида умид ҳеч қачон иллюзия ва ёлғонлар устига қурилган куфр дунёсида туғилмаган. Аксинча, умид ҳақ дин, ҳақиқат ва ростгўйлик асосида туғилган. Уни Аллоҳ таоло томонидан юборилган пайғамбарлар инсонларга етказганлар. Уларнинг охиргиси – саййидимиз Муҳаммад ﷺ бўлиб, У зот инсониятга Ислом динини етказдилар. Ислом ақиданинг, шунингдек, бошқарув, иқтисод, ижтимоий ҳаёт, таълим сиёсати ва ташқи сиёсат каби ҳаётнинг барча жабҳаларига оид мукаммал тузумнинг кенг қамровли баёнини ўз ичига олади. Бу тузумда салтанат соҳиби бўлган мусулмонлар ёки уларнинг вакили бўлган куч эгалари ўзларидан бўлган бир кишига мусулмонлар халифаси сифатида байъат берадилар. Ана шунда Халифалик тузуми барпо бўлиб, Ислом соясида муносиб ҳаётга умид туғилади. Бу қуйидагилар орқали амалга ошади:

Биринчи: Халифа мусулмонларни кофир Ғарбдан киритилган ва унинг мутахассислари орқали амалга оширилган вазъий тузумлардан бутунлай халос қилади ва далилнинг қувватига таянган ҳолда ваҳийдан олинган Ислом тузумини татбиқ этишга киришади.

Иккинчи: Халифа дарҳол муовинлар, волийлар ва бошқа ҳукмдорлар ҳамда уларга ёрдамчи шахсларни тайинлаб, фуқароларнинг муаммоларини ҳал қилишга киришади. Бу ишлар ҳеч қандай квота ёки ўзаро манфаат талашишдан мутлақо йироқ ҳолда амалга оширилади. Чунки шаръан ҳокимият қурол кучига эга бўлганлар ёки хориж билан алоқада бўлганларники эмас, балки Умматникидир.

Учинчи: Мусулмонлар халифаси кофир Ғарбнинг юртларимиздаги таъсирини илдизи билан йўқ қилади ва давлат муассасаларини унинг воситаларидан тозалайди. Шунингдек, Ислом давлати олти юз йил давомида дунёда биринчи давлат бўлганидек, Халифалик давлатини яна ўша улуғ мақомга кўтариш учун Умматнинг фикрий ва моддий бойликларидан зинапоя сифатида фойдаланади.

Тўртинчи: Мусулмонлар халифаси татбиқ этадиган Ислом сиёсий майдонни мустамлакачи кофир Ғарбнинг малайлари ва воситаларидан, шунингдек, давлат фуқароларини бўлиб ташлайдиган ирқчилик шиорлари ва жоҳилият даъволаридан тозалайди. Шу тариқа давлатнинг барча фуқаролари ишларини адолат ва мурувват билан бошқариш ғояси – «маълум шахс ёки жамоанинг жамиятдаги фаол иштирокини чеклаш» каби кофир Ғарб тузумлари соясида шаклланган тушунчаларни йўққа чиқариш учун етарли бўлади.

Бешинчи: Мусулмонлар халифаси давлатдаги барча қуролли кучларни ягона куч сифатида бирлаштиради ва ҳар янги тонгда янги кўнгилли тузилмалар ҳосил қилишга қаратилган беҳуда уринишларга барҳам беради. Чунки бундай кўнгилли тузилмаларнинг энг ёмон жиҳати шундаки, уларнинг айримлари ташқи давлатларда тайёргарликдан ўтади. Бу каби қуролли кучлар соясида муносиб ҳаётни умид қилиш мумкинми?!

Бу Ислом аҳкомлари уммонидан фақат бир томчи, холос. Агар биз уларни Умматга лойиҳа сифатида тақдим этсак, улар иззатли ҳаётга умид уйғотади. Улар амалда татбиқ этилган кун эса ҳаётимиз бутунлай ўзгаради. Шунда умид ортидан амал келади, амал эса бизни аввал бўлганидек шон-шараф чўққиларига етаклайди. Бу Аллоҳ учун қийин эмас.

Роя газетасининг 2025 йил 30 июл, чоршанба кунги 558-сонидан