Божхона ва солиқларнинг хавф-хатарларига эътибор қаратиш учун Порт-Судандаги катта бозорда қилинган сиёсий мурожаат
Матбуот бўлими
Божхона ва солиқларнинг хавф-хатарларига эътибор қаратиш учун Порт-Судандаги катта бозорда қилинган сиёсий мурожаат
Ҳизб ут-Таҳрир – Судан вилояти (ҳижрий 1446 йил 30 жумодулаввал, милодий 2024 йил 2 декабр, душанба куни) Порт-Судандаги йирик ғарбий бозорда сиёсий маъруза ўтказди. «Солиқлар ва божхоналар бу дунёда ҳалокат, охиратда эса зиёндир» номли ушбу тадбирда Ҳизб ут-Таҳрир аъзоси устоз Яъқуб Иброҳим маъруза қилиб, солиқлар ва божхоналарнинг ҳаромлиги тўғрисидаги шаръий ҳукмга тўхталиб ўтди. Солиқ солганнинг ҳам, уни йиғганнинг ҳам гуноҳи азимга ботишини, бу қилмишнинг оқибати хатарли бўлиб, танг-бахтсиз ҳаёт ва қимматчилик келтиришини баён қилди ҳамда бунга Имом Аҳмад ривоят қилган Набий ﷺнинг
«لَا يَدْخُلُ الْجَنَّةَ صَاحِبُ مَكْسٍ»
«Макс соҳиби (ноҳақ солиқ солувчи) жаннатга кирмайди», деган ҳадисини далил қилиб келтирди. Устоз, шунингдек, Ғомидия ҳадисини ҳам далил қилди. Яъни ғомидлик бир аёл зино гуноҳини қилиб қўйиб, тавба қилади ва Росулуллоҳ ﷺ унга жазо қўллайдилар, сўнг
«لَقَدْ تَابَتْ تَوْبَةً لَوْ تَابَهَا صَاحِبُ مَكْسٍ لَغُفِرَ لَهُ»
«Аёл шундай (холис) тавба қилдики, агар макс соҳиби шундай тавба қилганда, унинг ҳам гуноҳи кечириларди», дейдилар. (Муслим ривояти). Ҳадисдаги макс соҳиби божхона ва солиқларни ундирувчи давлатдир.
Устоз Яъқуб, шунингдек, Ислом мулкчилик турларини аниқ белгилаб берганини, давлат жамоат мулкидан иқтисодий муаммоларни ҳал қилиш ва халқ фаровонлигини таъминлаш учун фойдаланиши мумкинлигини, лекин фуқаролари мулкини тортиб олмаслигини, молда фақат закот ҳаққи борлигини ёритиб берди.
Устоз Ислом иқтисодиётининг буюклигини, бугун у Пайғамбарлик минҳожи асосидаги рошид Халифалик давлатида татбиқ этилса, бутун инсонлар муаммосини ҳал этишга қодирлигини баён қилди ҳамда Судан йирик бойликларга эга эканлигини, фақат бунда мамлакат ва фуқаро муаммоларини ҳал қилиш учун тўғри йўлдаги раҳбарият кераклигини таъкидлади.
Маърузани тинглаганлар, унинг ўзаро мулоқот бўлимида мамнуният ва яхши муносабат билдирдилар. Умматнинг ўз ҳуқуқ ва бурчлари ҳақида хабардорлигини ошириш учун бундай чиқишларни тез-тез ўтказиб туриш кераклигини таъкидладилар. Улар, шунингдек, Устоз Яъқубдан бу доно тузумни татбиқ қилишлари учун давлат амалдорларига мурожаат қилишини сўрадилар.
Иброҳим Усмон (Абу Халил)
Ҳизб ут-Таҳрирнинг Судан
вилоятидаги расмий нотиғи
