بِسْمِ اللهِ الرَّحْمٰنِ الرَّحِيمِ

Дания ҳукумати суриялик қочқинларни ўлимга қайтишга мажбурламоқда

Дания суриялик қочқинларни ўз юртларига қайтаришга тайёргарлик кўриб, улардан яшаш ҳуқуқларини бекор қилиш тўғрисида қарор чиқарди. Бу қарорини Дамашқда «хавфсизлик вазиятининг яхшиланган»лиги билан дастаклади. Дания иммиграция вазири Маттиас Тесфайега кўра, унинг мамлакати илгари суриялик қочқинларга яшаш учун рухсат вақтинчалик берилганини айтган. Шундай қилиб, Дания суриялик қочқинларни яшаш ҳуқуқидан маҳрум қилган биринчи Европа давлатига айланди. Алҳол Данияда яшаётган суриялик қочқин Акрам Батҳиш яшаш ҳуқуқлари бекор қилингани ҳақидаги хабарни эшитиши ортидан тўсатдан юрак хуружидан жон таслим қилди.

Роя:

Бу хабардан Сурияда бўлаётган уруш Ислом ва мусулмонларга қарши халқаро салибчилик уруши эканлиги яна бир бор исботланди. Чунки Умматнинг Суриядаги қўзғолонини бўғизлаш ва Пайғамбарлик минҳожи асосидаги иккинчи рошид Халифалик давлати барпо этилишига йўл қўймаслик курашида бутун дунё давлатларининг каттасию кичиги бирлашди. Ушбу жиноятчилар олами курашга ўзларининг Эрон ва унинг ҳизби, Россия, Туркия, Саудия ва бошқалар каби халқаро ва минтақавий барча воситаларини сафарбар қилишмоқда, нопок пулларини жўнатишмоқда. Мана, Дания бугун Сурия қочқинларини қонхўр режимга топширмоқчи, ваҳоланки, улар шу қонхўрнинг қирғинларидан, қамоқларидан, қийноқларидан ва портловчи бочкаларидан қочиб келганлар. Бу инсоният устидан масхаралаб кулувчи кўз-қарашнинг айни ўзидир. Бу кўз-қараш бутун Европа Иттифоқидаги қочқинлар сиёсатини тавсифлайди. Европанинг либерал маданияти ўнлаб йиллардан буён инсонпарварлик ва инсон ҳуқуқлари, деган нарсани ўзига ниқоб қилиб олган. Аммо у ҳозирда ёрилиб-бўлиниб, унинг ахлоқсизлиги ва ирқчилиги ҳаммага очилиб қолди.

Роя газетасининг 2021 йил 21 апрел чоршанба кунги 335-сонидан