Эй, биродар, қани айтингчи…
بسم الله الرحمن الرحيم
Эй, биродар, қани айтингчи…
(Туркум мақолалар)
Эй, биродар, қани айтингчи, сизнинг ўз фикрлаш тариқатингиз борми? Буни аниқлаш учун, аввало фикрнинг ўзи нима эканлигини аниқлаб олсак. Фикр – воқеликка чиқарилган ҳукмдир. Бундан келиб чиқадики, битта воқеликка битта ягона ва тўғри ҳукм бўлиши мумкин экан, қолганлари эса раъйлардир, яъни бир воқеликка битта фикр берилиши мумкин. Масалан, ҳукумат ўзи қабул қилган конституциядаги бир моддага зид иш қилди – бу воқелик, унга чиқариладиган ҳукм эса – демак, президент ва ҳукуматнинг ўзи қонунбузар экан, қандай қилиб халқдан қонунларни бузмасликни талаб қилиши мумкин? Кўриб турганимиздек, битта воқелик – битта ҳукм. Бунга кимлардир, керак бўлса бузса ҳам бўлаверади ёки унга аввал ўзгартириш киритиш керак эди, деган ўз раъйларини билдиришлари мумкин. Лекин бу каби раъйлар воқеликка тўғри келмайди, улар фақат раъй холос, фикр ҳисобланмайди, аммо истилоҳда фикр дейилаверади. Мана шундай фикрлаш давомли бўладиган бўлса, ўша одамда тўғри фикрлаш тариқати юзага келади.
Ҳозирда фикрнинг ҳар қандай қуролдан устун эканлигини воқелик кўрсатиб турибди. Бўлаётган воқеаларга тўғри ҳукм чиқара оладиган, яъни тўғри фикр юритадиган инсонни ҳеч ким ва ҳеч нарса ўзи танлаган йўлдан адаштира олмаяпти. Лекин одамларни тўғри йўлдан буриб юбориш ёки ўзи нотўғри йўлда бўлганларни янада тубанлаштириш сиёсати, айнан фикрий қолоқликдан жуда унумли фойдаланмоқда. Тасаввур қилинг, шундай инсонни қўлига қурол берилса, душман қолиб дўстни нишонга олиши, бойлигини душманнинг эмас, дўстининг зарарига сарфлаши мумкин. Шунинг учун, бугун энг долзарб масалалардан бири мусулмонларни фикран ўстиришдир. Агар умматда тўғри фикрлаш тариқати юзага келадиган бўлса, уни ҳеч қандай куч ўзи танлаган тўғри йўлдан қайтара олмайди ва уммат ўз мақсади йўлида хатто ўлимни ҳам писанд қилмайдиган ҳолатга келади.
Тўғри фикрлаш тариқатининг зарурлиги шундаки, мусулмонлар ўзларини аслида қандай уммат эканликларини, бунинг ортидан ўз ҳақ-ҳуқуқларини қандай талаб қилиш керак эканлигини англаб етадилар. Бунга эришиш учун, биринчи навбатда, мусулмонлар Исломни ўрганишлари керак албатта. Чунки шаръий ҳукмларни билмай туриб, мусулмон тўғри фикрлаш тариқатига эга бўла олмайди, демакки, ҳаёт майдонида қоқилмай юра оладиган даражага чиқа олмайди.
Эй, биродар, қани айтингчи, юқоридагилардан келиб чиққан ҳолда сиз тўғри фикрлаш тариқатига эга бўлишга ҳаракат қиласизми? Бу ишни қилиш нафақат ўзингиз, балки яқин одамларингиз учун ҳам фойдалидир.
Ҳизб ут-Таҳрирнинг Ўзбекистондаги медиа офиси Фаррух
21.04.2015й.
