Эй Ислом Уммати! Сизда ҳали ҳам яхшилик бор!

بِسْمِ اللهِ الرَّحْمٰنِ الرَّحِيم

Ҳа, бугун Ислом Уммати заиф аҳволда. Ҳа, бугун Ислом юртлари парокандаликка юз тутган. Ҳа, бугун мусулмонларнинг жони энг арзон товарга айланган… Буни яна давом эттиришингиз мумкин. Буларнинг барчаси бор ҳақиқат, бундан кўз юмиб бўлмайди. Бироқ яна бошқа муҳим ҳақиқатлар борки, буни тез-тез ёдга олиб туришимиз лозим. Айниқса, ҳозирги оддий бўлмаган ҳолатимизда бу жуда зарур. Агар ҳозирги ҳолатимизга қараб тушкунликка тушаётган бўлсангиз, асло бундай қилиш бизга ярашмайди. Чунки биз кимсан ИСЛОМ УММАТИМИЗ! Сизни тушкунлик кайфияти қамраб олаётган бўлса, тарихни ёдга олинг, бошқа биродарларингизга ҳам кўп-кўп эслатиб туринг. Бизнинг аслимиз ким эканлиги ҳеч ҳам ёдимиздан чиқмасин. Чунки биздан олдин ўтган аждодларимиз ҳам кўп синов ва мусибатларни бошларидан кечирганлар. Бундай ҳолатларда улар тушкунликка тушишга шошмаганлар. Аллоҳдан сабр сўраб, Росулуллоҳﷺ бошлаб берган буюк йўл қаршисида чиққан барча қийинчиликларни енгиб ўтишда давом этганлар. Ва Аллоҳ уларга ёрдам берган.

Уларнинг олдидаги вазифа билан бизнинг олдимиздаги вазифа ҳам ўша-ўша, фақат бизники юкининг оғирроқ эканлиги билан фарқ қилади. Лекин мукофот ҳам шунга яраша берилади. Ва яна бу ҳар биримиз учун Аллоҳ томонидан берилган шундай имкониятки, бу аждодларимизга насиб қилмади, балки айнан бизнинг авлодимизга насиб қилди. Бу ҳам бўлса Исломнинг яна ғариб ҳолга қайтиши ва уни яна дунёга ҳукмрон қилиш имкониятидир. Бу кимлар учундир ғалатироқ эшитилар, бироқ мўминлар буни жуда яхши тушунадилар. Бизнинг оддий бўлмаган ҳолатимиз ҳам аслида шундан иборат. Яъни бизнинг бошимизга тушган савдо аввал кузатилмаган эди. Бу уммат учун янги тажриба ва имкониятдир. Бу умматнинг бошига Аллоҳ томонидан келган навбатдаги синовдир. Эсингиздан чиқмаган бўлса биз синовли дунёда яшаяпмиз. Ҳозирги даврни ҳам Ислом Уммати бошидаги буюк синовлардан яна бири сифатида тушунишимиз лозим. Аллоҳ Ислом Умматининг гуноҳларини дув-дув тўкиш учун шундай синовлар бераётганини фақат мўминларгина тушуна оладилар. Демакки, ундан пок ва мустаҳкам иймон билан ўта оламиз.

Шуларни англаган сиз азиз мусулмон биродарларимга айтаманки, эй уммат ўғлонлари, маҳзун бўлманг! Ўзингизга ишонинг! Бу ишонч шундан иборатки, биз ҳақ ва адолат тарафдамиз, Аллоҳ биз билан. Биз зулм ва ботилга қаршимиз, шайтон тарафида эмасмиз! Бизнинг ёрдамчимиз ва дўстимиз Аллоҳдир!

Эй мусулмон биродарим, тарихга боқинг. Бу уммат Византия ва Форс империясини тиз чўктирган умматдир. Бу уммат салибчиларни 200 йил эгаллаб турган ерларидан қувиб чиқарган умматдир. Бу уммат унга нисбатан қилган ёмонликларига қарамай монголларни мағлуб қилган умматдир. Шундан сўнг бу уммат Европага қараб от сурди ва Ислом армияси отлиқларининг овози Вена деворлари олдида янгради. Ва бугун ҳам Аллоҳнинг марҳамати ила бу уммат устидаги хорлик чангларини қоқиб яна оёққа туражак! Сиз мана шундай умматнинг ўғлонисиз!

Биз Росулуллоҳﷺ нинг Пайғамбарлик минҳожи асосидаги Халифалик қайтиб келиши тўғрисидаги ваъдаларини тасдиқлаймиз. Биз Халифалик муборак Фаластин ерларини қайтариб олишини, Рум фатҳ қилинишини ҳам тасдиқлаймиз. Биз кун ва тун қаергача етиб борса, Ислом ҳам ўша ергача етиб боришини тасдиқлаймиз. Биз бу уммат ичида пок ва олийжаноб эр йигитларининг кўплигига ҳамда улар умматга бош бўлиб, уни Аллоҳ сифатлаган азиз уммат даражасига ва Халифаликни дунёдаги биринчи давлат мақомига олиб чиқишига ишонамиз.

Ҳизб ут-Таҳрирнинг Ўзбекистондаги медиа офиси. Абдуллоҳ  

28.11.2020й