Конституцияни амалдагисининг ҳам, янгисининг ҳам Ислом ва мусулмонларга ҳеч қандай алоқаси йўқ
“Инсоннинг ноқис конституциясига – ЙЎҚ! Қуръон ва Суннат асосидаги дастурга – ҲА!” номли кампания доирасида
Конституцияни амалдагисининг ҳам, янгисининг ҳам Ислом ва мусулмонларга ҳеч қандай алоқаси йўқ
(4-қисм)
بسم الله الرحمن الرحيم
4. Илоҳий низомга асосланмаган қонунларни манфаатга қараб ўзгартириб-алмаштириб олиш мумкин.
Инсоннинг ноқис ақлидан келиб чиқадиган тузумлар жуда ишончсиздир. Чунки бир гуруҳ инсонлар томонидан ўйлаб топилган низомни бошқа бир гуруҳ келиб ўзгартириб олаверади. Ундан кейингиси бунисиникини ўзгартириб олади ва ҳоказо. Буни охири йўқ. Бунга эришиш учун етарли ҳокимиятга эга бўлиш кифоя қилади. Ва ҳеч ким бунга қаршилик қила олмайди. Одатда бундай ўзгартириш киритишларга сабаб қилиб сийқаси чиққан халқ хоҳиши, ҳозирги мураккаб халқаро вазият каби важ-карсонлар келтирилади. Ва бундан анави ҳокимият эгалари ҳеч ҳам уялмайдилар. Мана, Мирзиёев ҳам шундай шармандали ва безбетлик йўлидан бориб аввалги золим президент қилган ишни қиляпти. Ўз вақтида яҳудий Каримов ҳам безбетларча бир эмас, икки марта ўз ваколат муддатини чўздириб олганди. Бу ҳокимият эгалари куфр ва ҳаром конституциясини муқаддаслаб, уни бош Қомусимиз, дея халқдан унга итоат этишни талаб қилиб, айни вақтда эса, ўзлари уни оёқости қилиб юборишди. Уни хоҳлаганларича ўзгартириб олиб, яна халқдан шу янги қонунга бўйсунишни талаб қилишади. Улар худдики сизлар биз хоҳлаган қонунлар бўйича яшайсизлар, агар эртага бу қонунлар бизга ёқмай қолса, биз уни яна ўзгартирамиз ва сиз уларга бўйсуниб итоат қиласизлар, дейишмоқда.
5. Инсон ақлидан келиб чиққан низомлар эскиришга ва ислоҳ қилинишга доимий муҳтож бўлади.
Инсоннинг ноқис ақлидан келиб чиқадиган низомларнинг бирортаси мукаммал эмас, мукаммал бўла олмайди ҳам. Табиийки, мукаммал бўлмаган нарса эскиради, ривожланишга ва ислоҳга муҳтож бўлади. Капитализм ёки демократия ҳам инсон ўйлаб топган низомдир. Шунинг учун ҳам демократик бошқарувни қабул қилган дунё давлатларининг конституциялари ҳам доимий равишда ўзгариб келяпти. Олий Мажлис Қонунчилик палатаси Спикерининг биринчи ўринбосари Акмал Саидов бу ҳақида жумладан шундай деганди: “…Охирги 25 йилда 100дан ортиқ давлатда конституциявий ислоҳотлар бўляпти. Фақатгина XXI асрда 57 та давлатда конституция қабул қилинди. Ҳозир бирор давлатда ўзгартириш киритилмаган конституция қолмади”. Дунёдаги энг мукаммал ҳисобланадиган Америка конституциясига ҳам шу вақтгача 27 марта ўзгартириш киритилган. Ўзбекистон ҳам бу борада ортда қолаётгани йўқ. Унинг конституцияси 30 йил ичида 15 марта ўзгартирилган. Бироқ бундай ўзгаришлар инсониятга бахт келтирмаяпти, унинг ҳаётини яхшилаб, қалбини хотиржам қила олгани йўқ. Зеро, Уинстон Черчиллнинг мана бу гапи айни ҳақиқатдир: “Демократия – бошқарувнинг энг ёмон шаклидир, бироқ инсоният бундан яхшироғини ҳали ўйлаб топгани йўқ”. Албатта шундай, чунки инсон томонидан ўйлаб топилган низомлар унинг фитрати-табиатига зид бўлиб, янги пайдо бўлаётган муаммоларга тўғри ечимлар бера олмайди, қалбига хотиржамлик бера олмайди. Чунки унинг инсон ғаризалари ва узвий эҳтиёжларини тартибга солиш ҳақидаги тушунчаси тафовут, хилма-хиллик, қарама-қаршилик ва ўзи яшаб турган муҳитдан таъсирланишга маҳкум. Шунинг учун ҳам инсон Яратувчининг низомини қўйиб, ўз ақли билан қонун ишлаб чиқишга муккасидан кетгани сари унинг ҳаёти жаҳаннамга айланиб боряпти.
6. Фақат Қуръон ва Суннат асосида ишлаб чиқилган Давлат дастури (Конституция)гина ҳавойи нафсга қараб ўзгаравермайди ва ислоҳга муҳтож бўлмайди.
Юқоридагилардан кўриниб турибдики, қонун чиқариш инсон салоҳияти ва ақли етадиган иш эмас ҳамда унга бундай ҳақ берилмаган. Инсоният учун мос келадиган ва қалбига хотиржамлик бера оладиган низомни тузиб бериш шу ишга қодир ва лойиқ бўлган Зот – Аллоҳ Таолонинг ҳаққидир. Чунки Яратувчигина Ўз бандаларига нима яхши ва нима ёмонлигини била олади, бошқа бирор кимса бунга қодир эмас. Ёлғиз Аллоҳгина нарсаларни ҳалол ёки ҳаром деб ҳукм чиқаришга лойиқ Зотдир! Дарҳақиқат, қонун чиқариш ҳуқуқини Аллоҳ Таоло фақат Ўзига хослаб, бундай деган:
إِنِ الْحُكْمُ إِلاَّ لِلّهِ
– “Ҳукм юритиш ёлғиз Аллоҳникидир”. (Юсуф:67)
Ва Аллоҳ нозил қилмаган нарса билан ҳукм юритмаганларни қаттиқ мазаммат қилиб фосиқ, золим ва кофир бўлишини баён қилган.
وَمَنْ لَمْ يَحْكُمْ بِمَا أَنزَلَ اللَّهُ فَأُوْلَئِكَ هُمُ الْكَافِرُونَ
– “Кимки Аллоҳ нозил қилган шариат билан ҳукм юритмаса, бас, улар кофирлардир”. (Моида:44)
وَمَنْ لَمْ يَحْكُمْ بِمَا أَنزَلَ اللَّهُ فَأُوْلَئِكَ هُمُ الظَّالِمُونَ
– “Кимки Аллоҳ нозил қилган шариат билан ҳукм юритмаса, бас, улар золимлардир”. (Моида:45)
وَمَنْ لَمْ يَحْكُمْ بِمَا أَنزَلَ اللَّهُ فَأُوْلَئِكَ هُمُ الْفَاسِقُونَ
– “Кимки Аллоҳ нозил қилган шариат билан ҳукм юритмаса, бас, улар фосиқлардир”. (Моида:47)
Шунга кўра айтамизки, Ўзбекистоннинг амалдаги ва янги конституциясининг Ислом ва мусулмонларга ҳеч қандай алоқаси йўқ. Чунки бу конституция динни ҳаётдан ажратишга асосланган бўлиб, бундай асос Ислом Шариатига тамоман зиддир. Ушбу конституция Аллоҳ ҳалол қилган нарсаларни ҳаром, Аллоҳ ҳаром қилган нарсаларни ҳалол қилиб беради. Исломни фақат шахсий масалага айлантириб, уни жамият ҳаётидан узоқлаштиради. Юртимиз ботиб қолган барча муаммоларнинг манбаси мана шу ботил тузумдир.
Мусулмонлар ўз ақидалари буюрган низомни тўлалигича татбиқ қилиб яшайдиган Исломий ҳаётга қайтишлари зарур. Бунинг учун Ислом низомини ҳар бир шахс ва жамиятга татбиқ қиладиган, давлатнинг ички ва ташқи сиёсатини Ислом ақидаси асосида юргизадиган муборак давлатни тиклашга ҳаракат қилишлари лозим бўлади. Бу Пайғамбарлик минҳожи асосидаги Иккинчи Рошид Халифалик давлатидир. Ушбу муборак давлатни тиклашга куну тун ҳаракат қилаётган Ҳизб ут-Таҳрирга бу ишда елкадош бўлиб, уни қўллаб-қувватлашлари ва ёрдам беришлари вожибдир! Чунки бу Ҳизбда давлатни бошқаришда асос бўладиган Халифалик давлат дустури (конституцияси) лойиҳаси бор. Шунинг учун Ҳизбнинг даъватлари қуруқ гап эмас. Ушбу дустур лойиҳаси Қуръон ва Суннатдан тўғри ижтиҳод орқали ишлаб чиқилган бўлиб, у ғайриисломий унсурлардан холи ва Ислом ақидасига асослангандир. Масалан, давлат дустури лойиҳаси “Умумий ҳукмлар” бобининг 1-моддасида шундай дейилади:
1-модда. Ислом ақидаси давлатнинг асосидир, яъни унинг таркибида, жиҳози, муҳосаба қилиниши ёки унга тааллуқли барча ишларда бирор нарсанинг вужудга келиши учун фақат Ислом ақидаси асос қилинади. Бир вақтнинг ўзида Ислом ақидаси дустур ва шаръий қонунларнинг ҳам асосидир, яъни бу иккисининг ҳар қайсисига алоқадор бирор нарсанинг мавжуд бўлишига фақат Ислом ақидасидан келиб чиқсагина рухсат берилади.
Ушбу лойиҳанинг тўлиқ матни билан Ҳизб ут-Таҳрирнинг расмий манбалари орқали танишишингиз мумкин. Ислом Шариати замон ва макон танламайди, чунки у Яратувчимиз Аллоҳ Таоло тарафидан берилган низомдир. У эскирмайди ва ислоҳга муҳтож бўлмайди, чунки у мукаммалдир. Ҳеч бир кимса уни ўз нафсига кўра ўзгартириб-алмаштириб ололмайди. Чунки у инсон томонидан ижод қилинмаган. Шунингдек, бундай низом асосидаги бошқарувгина биз Ислом Умматини Америка, Россия, Англия, Франция, Хитой каби кофир мустамлакачи давлатларнинг қуллик кишанларидан озод қилиб, уларни мағлуб қилишимиз кафолатидир! Бас, хорлик, қашшоқлик ва заифлик келтирадиган низомларни улоқтириб, азизлик ва куч-қудрат, бахт-саодатга элтадиган низомни татбиқ бўлиши учун жидди жаҳд қилинг!
وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُونَ
– “Ҳолбуки, азизлик Аллоҳга, Унинг Расулига ва мўминларига хосдир. Лекин мунофиқлар билмаслар”. (Мунофиқун:8)
#Инсоннинг_ноқис_дастурига_ЙЎҚ_Қуръон_ва_Суннат_асосидаги_дастурга_ҲА
Ҳизб ут-Таҳрирнинг Ўзбекистондаги матбуот бўлими аъзоси
Форуқ
25.04.2023й
