Муслималарнинг рўмолини ечтириш улардан Исломдан, иффат ва ҳаёдан воз кечишни талаб қилишдир

بِسْمِ اللهِ الرَّحْمٰنِ الرَّحِيم

Блогер Олимжон Ҳайдаров ўзининг фейсбук саҳифасида Фарғона вилояти Қўқон шаҳридан келган мурожаатни эълон қилди. Унда айтилишича, арафа куни Қўқондаги халқ тилида “Янги бозор” (расмий номи Қўқон савдо комплекси) бозорига Фарғонадан 15 нафар аёллар келиб, бозор маъмурияти билан биргаликда “рўмол рейди” ўтказишган. Бозордаги қора рўмол ёки ҳижоб ўраган аёлларни рўйхатга олиб, бундай рўмол ўрамасликни таъкидлашган. Душанба куни қайта текширув бўлиши ҳақида огоҳлантиришган. Бир неча кун аввал эса, соқолли эркакларга рейд бўлган. Қўқон бозоридаги мусулмонлар бўлаётган воқеалардан ҳайрон, нега бундай қилинаётгани сабабини билишмоқчи.

Яна унинг саҳифасида Андижондаги тиббиёт техникумида рўмолли қизларни рўмолларини ечишмаса ўқишга киритишмаётгани, уларга ё рўмолни орқадан ўраш ёки ўқишга киритилмаслик шарти қўйилаётгани акс этган видео эълон қилинди. Муборак Рамазон ойининг 6-кунида эса, Андижон чет тиллар институтида фақат рўмол ўраган талаба қизларга диний экстремизм ва терроризм бўйича тадбир ўтказилганини хабар берган.

Намоз, рўза, закот, ҳаж ибодатлари ҳозирги кунимизгача қандай ўзгаришсиз келган бўлса, улар каби фарз ҳисобланган ҳижоб ҳам ўзгаришсиз келган. Бу рукн нақл қилинган мўътабар тафсирлар ва Росулуллоҳ ﷺнинг олдиларида аёлларнинг ҳижобланиш кўриниши шаклида бизгача келди ва қиёматгача шундай қолади. Дарҳақиқат, ҳижоб Ислом шиорларидан бўлиб, унинг фарзлигини инкор қилиш куфрдир. Аллоҳ Таоло айтади:

يَا بَنِي آدَمَ لاَ يَفْتِنَنَّكُمُ الشَّيْطَانُ كَمَا أَخْرَجَ أَبَوَيْكُم مِّنَ الْجَنَّةِ يَنزِعُ عَنْهُمَا لِبَاسَهُمَا لِيُرِيَهُمَا سَوْءَاتِهِمَا إِنَّهُ يَرَاكُمْ هُوَ وَقَبِيلُهُ مِنْ حَيْثُ لاَ تَرَوْنَهُمْ إِنَّا جَعَلْنَا الشَّيَاطِينَ أَوْلِيَاء لِلَّذِينَ لاَ يُؤْمِنُونَ 

– “Эй Одам болалари! Шайтон ота-онангизни авратларини ўзларига кўрсатиш учун устиларидан либосларини ечиб, жаннатдан чиқарганидек, сизни ҳам фитнага солмасин. Албатта, у ва унинг тўдаси сизни сиз кўрмайдиган томондан кўради. Биз, албатта, шайтонларни иймон келтирмайдиганларга дўст қилганмиз”.                           (Аъроф:27)

Ўзбекистон давлатчилиги демократия асосига қурилгани учун жамиятда дунёвийлик билан Ислом ўртасида кураш юзага келган. Мусулмонлар ҳар жабҳада кофирлар дунёқараши ва ғарб маданиятига қарши курашар экан, ҳукумат бу урушни куфр фойдасига ҳал қилишни истамоқда. Ҳижобни тақиқловчи қонунларни ўз кучида қолаётгани, ёзма ва оғзаки буйруқлар ўзгаришсиз тургани (талабаларнинг рўмолини ечтириш ҳам шунга киради) ва рўмоллиларга қарши бевосита куч қўлланаётгани ҳукуматни куфр тарафида турганини англатади.

Бу ишлар курашнинг амалий жиҳати. Ҳижобга қарши курашнинг фикрий ва таълимий жиҳатлари ҳам борки, уларнинг захарли таъсири қонун ва қарорларнинг таъсиридан ҳам кучлидир. Ўзбекистонда кўпчилик одамлар кино ва сериаллардаги ҳаёсиз саҳналардан шикоят қилишган эди. Бу норозиликлар қисман натижа берди. Бироқ динсизлик ҳукмрон бўлишини хоҳлайдиган раҳбарлар бу норозиликларни ҳазм қилишолмади. Халққа қўлингдан нима келади қабилида иш тутиб, телевидениеда буткул ҳаёсиз нарсаларни намойиш қилишяпти.

Дарё.уз сайти депутат Расул Кушербаевнинг тиббиёт ходимларига “ҳижоб ва бошқа диний кийим-бошларда юриш” бўйича тақиқ олиб ташланди, деган хабарини чоп қилган эди. Бироқ ўша куннинг ўзида Соғлиқни сақлаш вазирлигининг матбуот хизмати ҳолатга муносабат билдириб “шифокор ва ҳамширалар белгиланган меъёрлар асосида кийиниши қатъий белгилаб қўйилгани, тиббиёт ходимларининг одоб-ахлоқ кодексини тасдиқлаш ҳақидаги буйруқни нотўғри талқин қилмасликни сўраймиз” дейилган баёнотни эълон қилди.

Мустамлакачи ғарб қаерга борса илк ҳамласини аёлларга қаратади. Ҳижобли бўлиш Аллоҳнинг ҳукмларига итоатда туришни англатади. Бу эса, муслималарни демократия мафкураси олдидаги хатарли душманга айлантириб қўяди. Мустамлакачи ғарб – модомики Ўзбекистон ҳукумати демократик йўлни қабул қилган экан – ундан Исломий шахсларга қарши курашишни талаб қилади. Ғарб ўзининг бу талабини бажарилиши учун ҳар қандай услуб ва воситалардан фойдаланилишига рози бўлади. Ғарбнинг Ислом Каримов ҳақидаги “у диктатор эди, бироқ терроризмга (Исломга) қарши курашгани учун у билан ҳамкорлик қилишга мажбур эдик” деган эътирофлари Мирзиёев учун етарлича сигнал бўлган. Шунинг учун демократик тузум муҳитида барча муслималарнинг тўлиқ ҳижобланишини хаёл қилиш имконсиз ишдир.

Ҳижоб инсон фитратига (табиатига) тўла мувофиқ келувчи Ислом рукнидир. Унга амал қилинмаса, ҳадсиз-ҳисобсиз фасодлар келиб чиқаверади. Рўмол ва ҳижобга нисбатан уюштирилган ҳар қандай ҳужумга бефарқ қаралмаслиги керак. Ҳар жойда бундай жиноятга журъат қилганларни ҳикмат билан қоралаб гапириш ва ёзиш керак. Ҳуқуқий томонлардан ҳижоб ҳимояси учун курашиб, устимиздаги демократия куфр низоми бундан ортиғига рухсат бермаслигини, бу тузум бекор қилинмас экан, динимизга тўлиқ амал қилиш ва Исломимизга қовушиш имконсиз эканлигини ҳамма жойда гапириш лозим. Аллоҳ Таоло марҳамат қилади:

هُوَ الَّذِي أَرْسَلَ رَسُولَهُ بِالْهُدَى وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ

– “У (Аллоҳ) Ўз пайғамбарини ҳидоят ва ҳақ дин билан – гарчи мушриклар хоҳламасалар-да – барча динларга ғолиб қилиш учун юборган зотдир”. (Тавба:33)

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

15.04.2022й