Мустақиллик – мустамлакачилик қуроли
Мустақиллик – мустамлакачилик қуроли
بسم الله الرحمن الرحيم
Биз аввалдан таъкидлаб келаётганимиздек, Ўзбекистон Республикаси ҳеч қачон ички ва ташқи сиёсатда мустақил, ўзининг сиёсий иродаси ва қарорига тўла эга чиққан давлат бўлмаган. У Совет Иттифоқи парчалангандан кейин Марказий Осиёда пайдо бўлган мустамлака, картон давлатчаларнинг биридир. Балки бундай сўзлар кимларнингдир ғашига тегиб, жаҳлини чиқарар, лекин бор ҳақиқат шу. Қолаверса, ҳақ гап ҳаммага бирдек ёқмаса-да, воқелик талаб қилгани учун албатта гапирилиши шарт. Ушбу сўзларимизни қувватлайдиган далилларни кўплаб айтганмиз ва керак бўлса, ўрни келганда яна келтирамиз. Баҳс мавзуйимизга қайтсак, Марказий Осиёда бундай “мустақил” давлатчаларни пайдо қилиш – Россия томонидан минтақа устида юргизиб келинган “бўлиб ташла, ҳукмронлик қил” сиёсатининг давомидан бошқа нарса эмас. Аввал Чор Россияси МОни босиб олиб шундай сиёсат юргизган бўлса, унинг меросхўри ўлароқ юзага келган коммунистлар ҳокимияти инқирозга юз тутиб, сўнгра парчаланиб кетиши оқибатида минтақада бешта миллий “мустақил” давлатчалар пайдо бўлди. Аслида, буларнинг айни шу шаклда пайдо бўлишига Совет Иттифоқи тарафидан олдиндан замин яратилган эди, дейишимиз мумкин. Узоқни кўзлаб сиёсат юритган совет ҳокимияти Иттифоқ парчалангудек бўлса, ушбу минтақа – аҳолининг дини, маданияти ва урф-одатлари битта бўлганлиги сабабли – Туркистон давлати сифатида бирлашиб кетмаслиги учун, уларнинг ҳар бирига ўз чегарасини миллий унсурларга қараб чизиб чиққанди. 90-йиллар бошида советлар давлати парчалангач, МОда алоҳида ном ва чегарага эга бўлган бешта миллий давлат пайдо бўлди. Уларнинг “мустақил”лигини биринчилардан бўлиб Ғарб давлатлари тан олди. Чунки яна имкон бўлди дегунча Россия уларни ўз таркибига қайта қўшиб олмаслиги ва халқаро майдонда МОни ўз ҳудудида бирлаштирган кучли бир давлат бўй чўзмаслиги учун, бешта кичик ва заиф давлатчаларнинг пайдо бўлиши ҳар қайси томон олдидаги энг яхши вариант эди. Ўшандан то бугунги кунгача – ўтган 32 йиллик давр шуни кўрсатдики, битта давлат бўлиб бирлашиб кетиш қобилиятига эга миллатларнинг ҳар бирига алоҳида “мустақил” давлат мақомини бериш сиёсати мустамлакачи далатларнинг – хоҳ у Америка, хоҳ Россия бўлсин – бўлиб ташлаб, заифлаштириш ва ўз таъсир доирасини кенгайтиришдаги асосий қуролларидан бири эканлиги яна бир бор исботини топди.
Дарвоқе, Ғарб айниқса Ислом Умматини парчалаб, мағлуб халқларга айлантиришда айнан номига мустақил миллий давлатларни пайдо қилишдек айёрона сиёсатни аввал ҳам қўллаган. Мусулмонларнинг бирлигини ўзида акс эттирган Халифалик давлатининг заифлашаётганидан фойдаланган Англия унинг таркибидаги ерларни бирин-кетин босиб олиб, сўнг уларга сохта мустақиллик берган. Охири бориб Халифалик давлати 1924 йилда тугатилган ва унинг ўрнида 50 дан ортиқ майда давлатчалар пайдо бўлган. Халифаликнинг заифлашувидан нафақат Англия, балки Чор Россияси ҳам фойдаланиб, Украина, Қрим, МО каби аслида Ислом давлати ҳудуди ҳисобланган минтақаларни босиб олган, жумладан Ўзбекистонни ҳам. Ҳа, у ҳамон маълум даражада Россиянинг мустамлакаси ҳолида қоляпти. Чунки юртимиз устига 1991 йилда келган золим Каримов ҳукумати ҳам, 2016 йилда келган Мирзиёев бошчилигидаги иккинчи ҳукумат ҳам гоҳ Россиянинг, гоҳ Ғарб, хусусан Американинг қош-қовоғига қараб сиёсат юритиб келди. Ҳозирга келиб бу ҳукумат Хитойни ҳам – унинг уйғур мусулмонлари устидаги геноцидига қарамасдан – рози қилишга ҳаракат қиляпти. Шунинг учун бу кофир давлатнинг мусулмонлар устидаги жирканч ишларига кўз юмишда давом этмоқда. Ҳолбуки, ҳеч бўлмаганда бунга қарши норозилик муносабатини билдириш, Қуръони каримни ёқишларига қарши билдирилган муносабатдан кўра аҳамияти кам эмасди…
Бундан ташқари, ҳукуматнинг ўз қарори ва кучли сиёсий иродага эга эмаслиги Мирзиёевнинг чиқишларидан ҳам маълум бўлиб қолди. АҚШ давлат котиби Энтони Блинкеннинг жорий йил март ойидаги ташрифидан сўнг, Сурхондарё вилоятида ўтказилган йиғинда катта давлатлар ундан “нейтралликни бас қилиб, у ёки бу томонга ўтишни” талаб қилишаётганини очиқлагани ҳаммамизнинг ёдимизда. Бундай оғир саволга жавоб бериш Мирзиёев учун анча қийин бўлгани унинг сўзларидан ҳам билиниб турди. Чиндан ҳам, нуқул тобелик зеҳниятидан келиб чиқиб фикр юритадиганлар учун – гарчи у давлат раҳбари бўлса ҳам – бундай саволлар жуда оғир келади. Зеро, ички ва ташқи сиёсати, иқтисодиёт ва ҳарбий соҳаси катта давлатларга қарам бўлган юрт учун мустамлакачиларнинг “марҳамати”га кўз тикишдан бошқа йўл қолмайди, гўё халқимиз олдида икки ёмоннинг яхшироғини танлашдан бошқа чора йўқдек. Худди бугунги кунда одамлар орасида ўрис яхшироқми ёки хитойларми, Ғарб билан бўлсак яхшироқми ёки бошқаси биланми, деган баҳслар кўзга ташланаётгани каби.
Албатта, ўз ақидасини яхши тушуниб етмаган, уни фақат руҳий ва ахлоқий ақида сифатида тасаввур қиладиган мусулмонларда бундай баҳсларнинг бўлиши табиий. Ўзи яшаётган юрти ҳақида “Янги Ўзбекистон” каби ҳеч қандай асоси йўқ, қуруқ шиорларни ҳали ҳам текширмасдан қабул қилиб, алданиб келаётганлар сони қанча!? Агар мусулмон халқимиз Исломни соф ҳолда, яъни унинг сиёсат ва бошқарувни тўлиқ қамраб оладиган, инсоннинг барча муаммоларига тўғри ечим берадиган мафкуравий ақида сифатида тушунишни бошласа, ушбу баҳсларга ҳеч қандай ҳожат қолмасди. Чунки яхши нарса турганда, ким ҳам ёмонини танлайди? Ахир, Халифалик давлати барпо бўлганида умуман янгича ҳаёт юзага келиши, бу давлат ҳар қандай ёвуз мустамлакачиларнинг танобини тортиб қўйиши, мусулмон одам куч-қудратда тенги йўқ ягона давлат соясида умргузаронлик қилиб, ер юзида азиз ва мукаррам бўлишини тасаввур қилгач, яна бундан бошқа нимани хоҳлаши мумкин?! Асосийси, ўзи эътиқод қилган Исломига амал қилиш орқали ҳам бу дунё саодатини, ҳам Аллоҳнинг розилигини топишдан-да буюкроқ қандай ғоя бор?!
Аллоҳга ҳамдлар бўлсинки, бугун халқимиз азизлик Исломда эканлигини кун сайин тушуниб, унга тобора кучлироқ интилмоқда. Мавжуд ҳукуматнинг ёлғон ваъдалари-ю, авраб-алдашларига аввалгидек учиб кетмаяпти. У секин-аста бўлса-да, бўлаётган ишларга Ислом нуқтаи назаридан қараб, тўғри фикр юритмоқда ва натижада уйғониш сари илдам одимламоқда. Албатта, уйғониш Ислом асосида бўлсагина тўғри бўлади. Халқимиз Ислом ақидаси асосида уйғониш орқали мавжуд ҳукуматнинг ўз халқидан кўра, мустамлакачи “оға”лари билан яқинроқ экани ва улар томонидан тортиқ қилинган “мустақил”лик аслида халқларни қул қилишдаги бир восита эканини аниқ-равшан кўра бошлайди. Бошқача айтганда, ҳукуматнинг сиёсатига Ислом нуқтаи назаридан туриб баҳо бера бошлайди. Шунингдек, халқимиз мустамлакачилар ичидан ёмонлиги камроғини танлаш эмас, балки бутунлай бошқа танлов ҳам борлигини кўра бошлайди. Янада аниқроғи, Ислом Уммати битта имом-халифа бошқаруви остида ягона Давлатда яшашлари лозимлиги, ўртада ҳозирги сохта чегаралар бўлиши мумкинмаслиги ва улар устида фақат Аллоҳнинг қонунлари татбиқ қилиниши вожиблигини англай бошлайди ва Аллоҳ таолонинг ушбу сўзларини янада теранроқ тушунади:
وَاعْتَصِمُواْ بِحَبْلِ اللّهِ جَمِيعاً وَلاَ تَفَرَّقُواْ وَاذْكُرُواْ نِعْمَتَ اللّهِ عَلَيْكُمْ إِذْ كُنتُمْ أَعْدَاء فَأَلَّفَ بَيْنَ قُلُوبِكُمْ فَأَصْبَحْتُم بِنِعْمَتِهِ إِخْوَاناً وَكُنتُمْ عَلَىَ شَفَا حُفْرَةٍ مِّنَ النَّارِ فَأَنقَذَكُم مِّنْهَا كَذَلِكَ يُبَيِّنُ اللّهُ لَكُمْ آيَاتِهِ لَعَلَّكُمْ تَهْتَدُونَ
– “Барчангиз Аллоҳнинг ипини маҳкам тутинг ва бўлиниб кетманг. Ва Аллоҳнинг сизга берган неъматини эсланг: бир вақтлар душман эдингиз, бас, қалбларингизни улфат қилди. Унинг неъмати ила биродар бўлдингиз. Оловли жар ёқасида эдингиз, ундан сизни қутқарди. Шундай қилиб, Аллоҳ сизга Ўз оятларини баён қилади. Шоядки ҳидоят топсангиз”. (Оли Имрон:103)
Шу зайлда Ислом Уммати вужуди бугунгидек тилка-пора аҳволда қолишига норозилик ҳисси уйғонади ва мусулмон халқлар алоҳида миллий давлатларга бўлинган ҳолда мавжуд бўлишига асло йўл қўйиб бўлмаслигини, бу Аллоҳнинг ҳукмларига тамоман зидлигини идрок қилади. Ушбу Абу Саид Худрийдан ривоят қилинган Расулуллоҳ ﷺнинг:
«إِذَا بُويِعَ لِخَلِيفَتَيْنِ فَاقْتُلُوا الْآخَرَ مِنْهُمَا»
«Агар икки халифага байъат берилса, улардан кейингисини ўлдиринглар», (Муслим ривояти) деган қатъий буйруқларини англагач, Исломда бўлинишнинг қаттиқ қораланишини ҳис қила бошлайди.
Шуларга кўра айтамизки, Исломда, оят ва ҳадисларда қаттиқ қораланган бўлинишдан мурод – мусулмонларнинг Халифа бошқарувидаги давлатдан ажраб чиқиб кетишидир. Демак, мусулмонлар учун бугунгидек бир-биридан айро, ўрталарига сохта чегаралар тортилган ҳолда яшашлари асло ҳалол бўлмайди.
Ҳизб ут-Таҳрир Ўзбекистон матбуот бўлими аъзоси Форуқ
31.08.2023й
