«Нью-Йорк таймс» газетаси АҚШ ва Британиянинг Яман устидаги тил бириктирувларидан бир қисмини фош этди
بِسْمِ اللهِ الرَّحْمٰنِ الرَّحِيم
Роя газетаси:
«Нью-Йорк таймс» газетаси АҚШ ва Британиянинг Яман устидаги тил бириктирувларидан бир қисмини фош этди
Ҳижрий 1438 йил 10 зул-ҳижжа, милодий 2017 йил 1 сентябр жума куни «Ал-Жазира нет» сайти «Саудиянинг Яманга қилган уруши борасида АҚШ-Британ тил бириктируви» сарлавҳаси остида тарқатган хабарда бундай дейилади:
«Нью-Йорк Таймс газетаси яманлик аёллар, болалар ва оилаларнинг даҳшатли ачинарли суратларини нашр қилди. Унда Қўшма Штатлар билан Саудиянинг бу манзарани ҳеч ким кўрмаслигини исташгани айтилади ҳамда Саудиянинг АҚШ-Британ қўллаб-қувватлови ва тил бириктируви остида Яманда уруш жиноятлари содир этаётгани қўшимча қилинади.
Яна таъкидланишича, БМТ қошидаги Жаҳон Озиқ-овқат Дастури, БМТнинг ЮНЕСКО болалар ташкилоти, Жаҳон соғлиқни Сақлаш ташкилоти каби халқаро ташкилотлар раҳбарлари ғайриоддий қўшма баёнот чиқарганлар, унда Яман очарчилик жарлиги ёқасида экани, яманликларнинг 60 %и оч аҳволда қолган бўлиб, навбатдаги озиқ-овқат қаердан келишини билмаётганлари айтилган.
Газетада Яман аслида камбағал давлат ҳисобланиши, лекин унинг муаммоси уруш бошлангандан буён ғоят мураккаблашгани, 2015 йил март ойи охирида Саудия етакчилиги остидаги араб давлатлари коалицияси олиб бораётган уруш ҳали-бери тугамайдиганга ўхшаётгани таъкидланади.
Газетада изоҳланишича, Саудия оддий яманлик аҳолини мунтазам равишда бомбардимон қиляпти, ҳаво бўшлиқларини ёпиб қўйиб, уларни қамалда ушлаб турибди ва шу орқали Ҳусийлар назорати остидаги минтақаларни очликдан қийнашга уриняпти. Шубҳасиз, бундай ҳолат яманлик оддий фуқароларнинг, шу жумладан, болаларнинг ҳам бомбардимонлар остида, ҳам очарчилик исканжасида ҳалок бўлаётганини англатади.
Газетада ўтган ҳафта Саудия олиб борган ва 14 нафар фуқаро ҳалок бўлган ҳаво ҳужуми оқибатида бутун оиласи орасида ёлғиз ўзи тирик қолган Басина исмли қизчанинг сурати чоп қилинган.
Газета хабарида қўшимча қилинишича, Хьюман Райтс Вотч ташкилоти Саудиянинг яманликларга қарши содир этган бир неча ҳаво ҳужумлари эҳтимолли уруш жиноятлари даражасига кўтарилганини бир неча бор тинимсиз таъкидлаб келган.
Хабарга кўра, айни жиноятларда Қўшма Штатлар ҳам шерик. Чунки у Саудиянинг ҳарбий самолётларини ҳавода ёнилғи қуйиб бериш вазифаси билан шуғулланади ҳамда объектларни нишонга олишлари учун саудиялик учувчиларни разведка маълумотлари билан таъминлайди, Саудия ҳаво кучларига кўплаб қурол-аслаҳалар етказиб беради.
Хабарда таъкидланишича, Саудия журналистлар ва ахборот ходимларининг Ҳусийлар назорати остидаги минтақаларни ёритишдан ва у ерларга боришга уринишдан таъқиқлаган. Чунки ўзининг даҳшатли жиноятлари очилиб қолишидан чўчийди… Саудияликлар очликдан қийналиб ўлаётган болалар суратларидан бирортасини ҳам кўришни исташмайди.
Газетада Американинг «CARE» ташкилоти раисаси Мишел Наннинг Ямандаги вазият халқаро ҳамжамият пешонасига тушган доғдир, деган сўзлари келтирилади. Мишел Нан 20 миллион яманликнинг зудлик билан фавқулодда ёрдамга муҳтож эканини, у ерда ҳар беш дақиқада биттадан бола ҳалок бўлаётганини таъкидлади.
Газетада Саудиянинг Ямандаги курашга ортиқча даражада аралашаётгани ҳақида сўз борар экан, вафот этаётган яманлик болаларнинг 65 %ига Риёз етакчилигидаги коалиция жавобгардир, дейилади.
Яманда кенг тарқалаётган холера эпидемиясига ҳар куни беш минг яманлик чалинаётгани ҳам газетада қўшимча қилинади.
Мишел хоним Яманда ҳар куни қон тўкилаётгани ва очарчилик вазияти, холера эпидемияси тўғрисида америкаликлардан жуда озчилиги хабардорлигини билдирди.
У Саудия Яманга чанг солишни бас қилиши учун биз бу давлатга берилаётган барча ёрдамларни тўхтатмоғимиз лозим», дея таъкидлади.
Роя газетасининг 2017 йил 6 сентябр чоршанба кунги 146-сонидан
