Матбуот баёноти

Озарбайжон ва Ўзбекистон мустамлакачи кофирларга хизмат қилишда чегара билмаяпти!

بِسْمِ اللهِ الرَّحْمٰنِ الرَّحِيمِ

Озарбайжон президенти Илҳом Алиев 23-24 август кунлари Ўзбекистонга қилган икки кунлик ташрифидан сўнг Ўзбекистон Миллий ахборот агентлигига берган интервьюсида шундай деди: «Қардош давлатлар бўлмиш Озарбайжон ва Ўзбекистон ўртасидаги муносабатлар муштарак тарих, маданият, тил ва маънавий қадриятларга, шунингдек, халқларимиз асрлар давомида асраб-авайлаб, авлоддан-авлодга ўтказиб келаётган чуқур ўзаро хайрихоҳликка асосланади… Ўзбекистон Президенти, азиз биродарим Шавкат Мирзиёев билан мени боғлаб турган самимий дўстлик, ўзаро ҳурмат ва ишонч Озарбайжон-Ўзбекистон қардошлигини мустаҳкамлашда, давлатлараро муносабатларни ҳозирги даражага кўтаришда ва иттифоқчилигимизни ривожлантиришда алоҳида роль ўйнайди. Бу менинг охирги беш йил ичидаги мамлакатга учинчи ташрифим ва умуман олганда ушбу қардош юртга еттинчи ташрифимдир. Гўзал ва бетакрор Ўзбекистонга ташриф буюриш менга ҳамиша мамнуният бағишлайди ва у ерга қилинган ҳар бир сафар мен учун алоҳида аҳамиятга эга. Мен 2024 йил август ойида Ўзбекистонга давлат ташрифини амалга оширган эдим, Ўзбекистон Президенти эса 2025 йил июль ойида Озарбайжонга расмий ташриф буюрди. Ушбу икки томонлама ташрифлар давомида имзоланган кўплаб ҳужжатлар, хусусан, Стратегик шерикликни чуқурлаштириш тўғрисидаги декларация ва Иттифоқчилик муносабатлари тўғрисидаги шартнома икки мустақил, қудратли ва суверен давлатимиз ўртасидаги табиий иттифоқчиликни расман мустаҳкамлади. Шу билан бирга, 2023 йил август ойида ташкил этилган Олий давлатлараро кенгаш Озарбайжон ва Ўзбекистон ўртасидаги стратегик шериклик ва иттифоқчилик муносабатларини чуқурлаштиришнинг муҳим институционал механизмига айланди. Кенгашнинг илгари Тошкент ва Бокуда ўтказилган иккита йиғилиши икки мамлакат ўртасидаги муносабатлар қанчалик жадал ривожланаётганини, сиёсий мулоқотнинг изчиллигини ва икки давлатнинг ўз қарашларига мувофиқ биргаликда ҳаракат қилиш қатъиятини кўрсатади». (Озарбайжон Давлатининг расмий газетаси, 2026 йил 27 август).

Маълумки, Каспий денгизи орқали ўтадиган Ўрта коридор — бу Озарбайжон ва Арманистон ўртасидаги тинчлик битими асосида юзага келган ҳамда АҚШ воситачилигида барпо этилаётган, «Трампнинг тинчлик ва фаровонлик йўли» (TRIPP) деб аталган коридордир. 2025 йилги келишувларга кўра, Америка Арманистоннинг Мегри ҳудудидан ўтувчи ушбу стратегик аҳамиятга эга қисқа йўлни — Зангезур коридорини 99 йил муддатга эксклюзив бошқариш ҳуқуқини қўлга киритди. Шунга кўра, бу коридор шунчаки транзит йўли эмас, балки Россия ва Эронни тўлиқ четлаб ўтиб, Марказий Осиёни Европа билан боғлайдиган Америка дарвозасидир. Шу тариқа, Вашингтон бу ерда Панама каналига ўхшаш назорат ҳудудини ташкил этиш орқали минтақадаги энергия ресурслари ва фойдали қазилмалар оқимини эгаллаб олишни мақсад қилган. Сиёсий экспертларнинг таъкидлашича, ушбу коридор Жанубий Кавказ харитасини қайтадан чизади ва минтақани Ғарбнинг, аниқроғи Американинг доимий ҳарбий ва иқтисодий назорати остига ўтказади.

Шунга қарамай, Ўзбекистоннинг иштирокисиз Марказий Осиёнинг Россияга нисбатан позициясини шакллантириш ва унинг таъсирини имкон қадар чеклаш жуда қийин бўлиб кўринади. Шу сабабли, Америка Мирзиёевни Россияга нисбатан янада журъатлироқ позиция тутишга ундаш учун Озарбайжон билан яқин муносабатларни сақлаб қолишни хоҳлайди. Бу контекстда Озарбайжон ҳаммага, айниқса Ўзбекистонга ёрқин намуна бўла олади. Шунингдек, Америка сўнгги пайтларда Путин режимининг ташқи сиёсатда сезиларли даражада заифлашгани ва ҳарбий қудрати етарли эмаслиги сабабли, Россия Озарбайжоннинг ўзига нисбатан тутаётган қатьий позициясига худди шундай қатъият билан жавоб қайтара олмаслигини англаб етмоқда. Шу сабабли, Америка Ўзбекистонни ўзига оғдириб олиш ва уни Марказий Осиёда Россияга қарши қаратилган сиёсатида АҚШ томонида бўлишини таъминлаш учун Озарбайжон ва Ўзбекистон ўртасидаги муносабатларни мустаҳкамлашга ҳаракат қилмоқда. Ушбу контекстда 2023 йил август ойида ташкил этилган Олий давлатлараро кенгаш Озарбайжон ва Ўзбекистон ўртасидаги стратегик шериклик ва иттифоқчилик муносабатларини чуқурлаштиришнинг муҳим институционал механизмига айланди. Озарбайжон [президенти] 2024 йилда Ўзбекистонга давлат ташрифини амалга оширди, шунингдек, Ўзбекистон Президенти 2025 йил июль ойида Озарбайжонга расмий ташриф буюрди. Ушбу икки томонлама ташрифлар давомида кўплаб ўзаро ҳужжатлар, хусусан, Стратегик шерикликни чуқурлаштириш тўғрисидаги декларация ва Иттифоқчилик муносабатлари тўғрисидаги шартнома имзоланди.

Хулоса қилиб айтганда, ушбу икки томонлама ташриф ортида айнан Америка турмоқда; чунки Озарбайжоннинг ягона ўзи Россияга қарши чиқиши амримаҳол. Шу сабабли, Американинг қўллаб-қувватлашига эришишга интилаётган Озарбайжон Марказий Осиё давлатларини, жумладан Ўзбекистонни Россиядан узоқлаштириш вазифасини ўз зиммасига олгандек кўринади. Шу боис, Марказий Осиёдаги барча мусулмонлар, биринчи навбатда Озарбайжон ва Ўзбекистон халқлари англаб етиши керак бўлган ҳақиқат шундан иборатки, Алиевнинг: «Қардош давлатлар бўлмиш Озарбайжон ва Ўзбекистон ўртасидаги муносабатлар муштарак тарих, маданият, тил ва маънавий қадриятларга, шунингдек, халқларимиз асрлар давомида асраб-авайлаб, авлоддан-авлодга ўтказиб келаётган чуқур ўзаро хайрихоҳликка асосланади…» деган гапи мусулмон халқларнинг туйғуларини суиистеъмол қилиш ва Аллоҳ уларга инъом этган бойликларни мустамлакачи кофирларга топширишга қаратилган фирибдан бошқа нарса эмас.

Эй Марказий Осиё мусулмонлари! Ҳукмдорларингизга Америка ва бошқа мустамлакачи давлатларнинг манфаатларига хизмат қилишига йўл қўйманг; чунки Марказий Осиё халқлари оғир иқтисодий қийинчиликларни бошдан кечираётган бир пайтда, бу нарса бойликларингизнинг мустамлакачи кофирлар қўлига ўтиб кетишига олиб келади!

Ўз тахтлари ва шахсий манфаатлари йўлида бойликларингизни мустамлакачи кофирларга хизмат сифатида тақдим этаётган ушбу хоин ҳукмдорлардан қутулишнинг ягона йўли — Исломга юзланиш, унга бўйсуниш, унинг асосида бирлашиш ва уни Халифалик сояси остида татбиқ этишдир. Ана шунда кофирларнинг мусулмонлар устидан ҳукмронлигига тўлиқ чек қўйилади ва Аллоҳнинг нусрати биз билан бўлади.

﴿وَلَن يَجْعَلَ اللَّهُ لِلْكَافِرِينَ عَلَى الْمُؤْمِنِينَ سَبِيلاً﴾

«Ва Аллоҳ ҳаргиз кофирлар учун мўминлар устига йўл бермагай». (Нисо:141)

Ҳизб ут-Таҳрирнинг Марказий Медиа бўлими