بِسْمِ اللهِ الرَّحْمٰنِ الرَّحِيمِ

Пейжерлар портлатилиши Эрон ҳизби учун оғриқли зарба бўлди

Муҳандис Муждий Али

2024 йил 17 сентябр, сешанба куни тушдан кейин соат 3:35да, Ливан кўчаларида, айниқса, пойтахт Байрутда, хусусан, Эрон ҳизбининг таянч нуқтаси бўлган Ливаннинг жанубий чеккасида ва Ливан жанубидаги Сайдо шаҳрида қонли саҳналар кузатилди. Ўқ отилганини эслатувчи овоз эшитилар экан, одамлар мотоцикл ҳайдовчиси ёки сабзавот сотиб олаётган киши ёки машина бошқариб кетаётган йигит ёки уяли телефонлар дўконидаги сотувчининг ғалати бир манзарада қулаганига гувоҳ бўлдилар. Уларнинг қайсидир бирига ўқ отилдими ёки яҳудий вужудининг дрони уни ўлдирдими?! Кимнидир бармоқлари узилиб кетди, яна кимнидир юзи, кўзи ёки бели шикастланди. Тахминан ярим соат давомида одамлар нима бўлганини тушунишмади. Кейин, юз берган ҳолатлар сабабчиси пейжерлар – мобил телефонлар пайдо бўлишидан олдин ишлатилган эски технология – экани маълум бўлди. Яна бир энг муҳим умумий жиҳат шундаки, жабрланганларнинг барчаси қайсидир маънода Эрон ҳизбининг аъзолари бўлган. Чунки Эрон ҳизби бузиб кириш осон бўлган мобил телефонлардан воз кечишга ҳаракат қилар экан, ўз аъзолари ва бўлинмаларини ушбу қурилмалар билан таъминлаган.

Бунинг ғалати технологиядан фойдаланилган ҳолда йўналтирилган режали зарба экани аниқ бўла бошлади. Айтилишича, бу қурилма Эрон ҳизбининг 4000га яқин одамига шикаст етказган. Айни шу қурилмани кўтариб юрган Эрон элчиси ҳам ўз офисида ўтирган пайтида шикастланган. Кейин, эртаси куни, Эрон ҳизбининг бошқа гуруҳлари фойдаланувчи рацияларнинг портлаши содир бўлиб, 500га яқин киши яраланди.

Хос турдаги технология билан амалга оширилган бу операция яҳудийларнинг Ливанга қарши кенг кўламли уруш очиш ҳақидаги таҳдидлари кучайганидан икки кун ўтгач амалга оширилди. Айни шу пайтда, жиноятчи Нетаняху билан бу урушни бошлашдан бош тортган унинг мудофаа вазири Галант ўртасида келишмовчилик борлиги ҳақида гап-сўзлар кўтарилди. Ҳолат Галантнинг ишдан бўшатилиши ҳақидаги гап-сўзларгача етиб борди. Бу зарбадан икки кун олдин минтақада аниқ уруш сигнали бор эди. Миш-мишларга кўра, кенг кўламли урушга, жумладан, қуруқлик кучлари Ливан жанубининг 22 километр ичкарисига киришга қарор қилинган. Афтидан, мана шу нарса Эрон ҳизбини ўз аъзолари ва логистик кадрларини чақириб-йиғиш осон бўлиши учун, мана шу қурилмалардан фойдаланишга ундаган кўринади. Аммо тўсатдан бошқа турдаги ҳалокатли кибер уруш юз берди. Бу уруш бирон бир яҳудий аскарнинг жанг майдонига киришига ҳожат қолдирмасдан, бир тугмани босиш билан Эрон ҳизбининг 5000дан ортиқ аъзосини бартараф қилди. Бу сон фақат эълон қилингани холос.

Ушбу операция Эрон ҳизбининг таъминот тармоқларига қанчалик кенг даражада кириб борилганини фош этди. 2024 йил 20 сентябр жума куни унга йўлланган кучли зарба ҳам, унинг тармоқларига кириб борилгани оқибатларидан бири бўлиши мумкин. Бу зарба Байрутнинг жанубий чеккасидаги ҳудудда йиғин ўтказаётган Ризвон кучлари раҳбарларининг ўлдирилишига олиб келди. Бу ҳужумда Ризвон кучлари қўмондони Иброҳим Ақил ва у билан бирга ушбу бўлинманинг 15 нафар етакчиси ўлдирилди.

Эҳтимол, бу «Яҳудийлар кенг кўламли уруш олиб боришнинг янги турини топишди. Энди улар ҳақиқий жангга киришга эҳтиёж сезмасдан, янги турдаги бу уруш орқали минглаб жангчини ўлдиришга ва ярадор қилишга эриша олади», деб айтишга ундаши мумкин. Яҳудийлар, айниқса, Ғазо тажрибасидан кейин, ҳақиқий жангда заифлик қилишларини билишади.  Аллоҳ Таоло уларни  сифатлаб айтади: ОЯТ… Шунинг учун Ливан жанубини бомбардимон қилишни ҳамда имкон топилганда дронлар ва самолётлар ёрдамида суиқасдларни амалга оширишни давом эттиришмоқда.

Гарчи Эрон ҳизби, унинг бош котиби пейжер ва радио алоқа ҳужумлари ортидан қилган мурожаатида маълум қилганидек, яҳудийларнинг – ўзларини нима кутаётганини кўриб олишлари учун – Ливан жанубига киришларини умид қилаётганини айтган бўлса-да, бироқ Нетаняху ва унинг аппарати бу каби операциялар орқали Эрон ҳизби ва унинг ортидагиларга қарши инсоний тўқнашувларга имконият қолдирмасдан олиб бориладиган уруш турининг янги сценарийларини тузган бўлишлари мумкин. Шунингдек, Нетаняху бу билан Эрон ҳизбига қарши кенг қамровли анъанавий уруш олиб борилишини талаб қилаётган экстремистик яҳудий жамиятига навбатдаги номани йўллади. Чунки Нетаняху Ғазо тажрибасидан кейин бундай анъанавий урушнинг қимматга тушишини билади. Нетаняхунинг бу номаси «Биз тўғридан-тўғри тўқнашувларга эҳтиёж қолдирмасдан Эрон ҳизбига зарба бериб, уни йўқ қилишга қодирмиз», деган маънони ифодалайди. Шубҳа йўқки, Нетаняху бу билан очко қўлга киритиб, ичкарида ва экстремист яҳудийлар орасида ўз обрўсини тиклаб олди. Шундай қилиб, Нетаняху йиллар давомида гибрид уруш номи билан танилган урушни амалга ошириш орқали урушни ноанъанавий урушга кенгайтирди.

Эроннинг позициясига келсак, у «Ливан бундай синовни енгиб ўтишга қодир, яҳудийлар минтақани урушга тортмоқда», дея тасалли берди. Эроннинг Бирлашган Миллатлар Ташкилотидаги вакилига кўра, Эрон максимал даражада ўзини тутади ва яҳудий вужудининг аҳмоқона хатти-ҳаракатларидан огоҳлантиради. Эрон ҳизбининг позицияси эса, бош котибининг ушбу зарба ортидан қилган мурожаатида ўз ифодасини топди. У ўз мурожаатида жавоб зарбаси йўлланиши билан таҳдид қилди. Унга кўра, жавоб зарбасининг табиати яширин бўлади ва унинг тафсилотлари, ҳатто партия ичида ҳам, жуда тор доира ичида қолади. Бироқ, у бу таҳдид ортидан «Ризвон кучлари» қўмондонлиги штабига қаратилган оғриқли зарбага учради.

Америкага келсак, Sky News агентлиги 2024 йил 18 сентябрда берган хабарга кўра: «АҚШ давлат котиби Энтони Блинкен Қўшма Штатларнинг Ливандаги «Ҳизбуллоҳ» аъзолари фойдаланган минглаб пейжер қурилмаларининг портлашига олиб келган (Исроил) ҳужумига алоқадорлигини ёки у ҳақда олдиндан хабардор бўлганлигини рад этган». «Қўшма Штатлар бу воқеалар ҳақида билмаган ва уларга алоқадор эмас. Биз ҳали ҳам маълумот ва фактларни тўпламоқдамиз», деди у Қоҳирадаги матбуот конференциясида.

Бундай бўлиши эҳтимолдан йироқ эмас. Чунки Америка яҳудийларга кўрсатаётган барча ҳарбий ёрдамларга қарамай, Нетаняху Моссаднинг разведка фаолиятига оид маълумотларни Америкадан яширгани бир неча ҳолатларда исботланган. Ҳурра канали веб-сайти 2024 йил 19 майда Ахиос ахборот агентлиги веб-сайтидан иқтибос олиб берган хабарга кўра, «Нетаняху Вашингтонга тақдим этилган маълумотларни назорат қилиш ҳамда ўз режасига зид келадиган маълумотлардан Американинг хабардор бўлишига тўсқинлик қилиш учун Моссад ва Шин Бет раҳбарларини Энтони Блинкен, АҚШ сенатори Марко Рубио, Сенат разведка қўмитаси аъзоси ва бошқалар билан учрашишларига тўсқинлик қилган». Аммо яҳудий вужудининг омон қолишини таъминлаб келаётган Американинг одати шуки, у унинг ғайритабиий фаолиятларига ҳам рози бўлаверади. Агар бундай иш мусулмонлар томонидан яҳудий вужудига қарши амалга оширилган бўлса, Америка буни терроризм деб атайди ва бутун дунёни унга қарши сафарбар қилади.

Воқеалар шуни кўрсатдики, мусулмонлар Ғарб саноатларидан, айниқса, ҳарбий сиёсатга алоқадор саноат тармоқларидан мустақил йўлдан боришлари зарур. Албатта, бу бугунги режимлар ва малай ҳукмдорлар даврида амалга ошмайди. Балки яқинда – Аллоҳнинг изни ила – барпо бўлажак Пайғамбарлик минҳожи асосидаги рошид Халифалик даврида амалга ошади.

Роя газетасининг 2024 йил 25 сентябр чоршанба кунги 514-сонидан