Рамазон Ҳайити муборак бўлсин!

Аллоҳу Акбар, Аллоҳу Акбар, Аллоҳу Акбар лаа илаҳа иллаллоҳ!

Валлоҳу Акбар, Аллоҳу Акбар ва лиллаҳил ҳамд!

Росулуллоҳ ﷺ дедилар:

«إِذَا رَأَيْتُمُوهُ فَصُومُوا، وَإِذَا رَأَيْتُمُوهُ فَأَفْطِرُوا، فَإِنْ غُمَّ عَلَيْكُمْ فَاقْدُرُوا لَهُ»

“Агар ойни кўрсангиз, рўзани бошланглар. (Шаввол) ойини кўрганда эса, рўзадан чиқинглар. Агар ҳаво булутли бўлса, ойни ўттиз кун қилиб белгиланглар”. (Бухорий ривояти)

Ҳижрий 1445 йилнинг Рамазон ойини ниҳоялаб Рамазон Ҳайити кунини қарши оляпмиз. Албатта, бу ойда қилган ибодатларимиз ва дуоларимиз қабул бўлишини Аллоҳ субҳанаҳу ва таолодан сўраб қоламиз.

Ислом Уммати бу йилги Рамазон Ҳайитини ҳам қувонч ва ғам-алам аралаш кутиб олмоқда. Айниқса, бу сафарги байрамимиз мусулмонлар устидаги зулм ва зўравонликлар чўққисига чиққан бир пайтга тўғри келмоқда. Ислом Уммати ҳар қачонгидан ҳам оғир дамларни бошидан ўтказмоқда. Кофир мустамлакачи давлатлар ва уларнинг Исломий юртлар тепасига ўрнатиб қўйган малайлари ўзаро тил бириктириб, мусулмонларни шунчалар хор аҳволга солмоқдаки, уларнинг зулму зўравонликларини таърифлашга тил ожизлик қилмоқда. Уларга хизмат қилишда жонбозлик кўрсатаётган сарой муллалари сабр ва шукрга чақиришдан нарига ўтмай, ушбу золим режимларга сўзсиз итоат этишга, муте бўлишга буюришмоқда. Муборак Фаластин заминида Аллоҳнинг лаънатига учрагур сионист яҳуд режимининг мусулмонларга қарши геноциди юракларимизни эзиб ташлади. Уларнинг дод-фарёдлари, аламларига малҳам бергувчи, ёрдам сўраб қилган нолаларига “лаббай” дегувчи мардлар топилмаяпти. Ён-атрофдаги, узоқ-яқиндаги мамлакатлар мусулмонларининг ўз биродарларига ёрдам беришга ошиқиб қилаётган ҳаракатларини анави хоин ва қўрқоқ режимлар бостириш билан банд… Дунёнинг турли бурчакларидаги мусулмонларнинг ҳам аҳволи жуда ачинарли. Улар очлик, қашшоқлик, хорлик, вайронагарчилик, зулмлардан азият чекишда давом этишяпти. Ислом Умматининг бундай аччиқ воқелиги ҳар бир иймон эгасини иштаҳасини бўғмоқда, кўзидан уйқусини қочирмоқда. Бунга чек қўйиш учун имконидаги барча куч-ҳаракатини ишга солишга ундамоқда. Умид қиламизки, ўзини мусулмон ҳисоблаган ҳар бир инсон Ислом Уммати бошидан ғам-андуҳ ва аламларни кетказиб, уни яна аввалгидек азиз ва қудратли қиладиган Халифалик давлатини тиклаш учун моли-ю жонини сарфлаб жидду жаҳд билан ҳаракатини қилиб қолади. Шундагина биз мусулмонлар байрамларимизни шоду ҳуррамлик ила, кўзимизда фақат қувонч кўз ёшлари билан кутиб оламиз.

Ҳурматли муслим ва муслималар! Сизларга Рамазон Ҳайити муборак бўлсин! Чин қалбдан сизларга яхшиликларни сўраб қоламиз. Ва, албатта, ният қиламизки, Уммат учун бу Рамазон Халифасиз ўтказилган охирги Рамазон бўлсин! Кейинги байрамларимиз ва Рамазонларимизни қалқонимиз, ҳимоячимиз бўлган Халифалик соясида кутиб олайлик. Аллоҳ таоло тез кунларда бу умматни мазлумлик ва хорликдан азизликка олиб чиқадиган, кофир ва золимлардан ҳимоя қиладиган, Исломни ҳар қандай қаршиликларни енгиб бутун дунёга ёядиган Давлатга Ўз нусратини берсин!

وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّـهِ ۚ يَنصُرُ مَن يَشَاءُ ۖ وَهُوَ الْعَزِيزُ الرَّحِيمُ

– “Ўша кунда мўминлар Аллоҳнинг нусрати сабабли шодланурлар. (Аллоҳ) Ўзи хоҳлаган кишига нусрат берур. У қудрат ва раҳм-шафқат эгасидир”.                              (Рум:4-5)

Ҳизб ут-Таҳрир Ўзбекистон матбуот бўлими

10.04.2024й