Собиқ сиёсий маҳкумлар устидан ўтказилаётган суддаги сохталиклар фош бўлмоқда
Матбуот баёноти
Собиқ сиёсий маҳкумлар устидан ўтказилаётган суддаги сохталиклар фош бўлмоқда
بسم الله الرحمن الرحيم
Ўзбек режими аввалда 20 йиллаб қамоқ жазоларини ўтаб чиққан собиқ сиёсий маҳкумларни яна қайта қамоққа тиқишдек разил ишга қўл урди. Аввалига 15 нафар пок-тақволи йигитларга туҳмат ва ёлғон айбловлар билан узоқ йиллик озодликдан маҳрум қилиш билан боғлиқ ўқилган суд ҳукмлари апелляция судида деярли ўзгаришсиз қолдирилди. Ҳозирда улар устидан тафтиш суди кетмоқда. Бу судда уларнинг адвокатлари судьяга мурожаат қилиб, эълон қилинган барча айбловларни бекор қилишни ва уларни озод этишни сўрашган.
Ва яна 31 нафар йигит устидан ўтказилган навбатдаги суд ҳақида ишончли манбалардан келган хабарларга кўра, уларга қарши гувоҳликка чақирилганларнинг сохта, балки ёлланма эканлиги фош бўлиб қолган. Берилган маълумотлардан тушуниладики, Тошкентда ўтган судда Сирдарё ва Андижон вилоятларидан бир нечта шахс гувоҳ сифатида иштирок этган. Таъкидлаш керакки, улар судда бевосита эмас, онлайн алоқа орқали кўрсатма беришган. Бироқ бу алоқа ҳам суд тарафидан сифатли қилиб таъминлаб берилмаган. Ахир, гап одамлар тақдири устида борар экан, гувоҳнинг сўзлари аниқ-тиниқ ва тушунарли бўлиши ўта зарур ишлардан ҳисобланади-ку! Мана шундан Ўзбекистон судларининг, демакки, ўзбек режимининг инсонлар тақдирига қанчалар беписанд муносабатда эканлигини тушуниб олиш қийин эмас. Бундан ташқари, судланувчиларга давлат тарафидан ажратилган адвокатлар ҳам 4 ойдан бери ойлик олмаганлари юзасидан судьяга шикоят қилиб, судда иштирок этмасликларини билдиришган. Ҳақиқатдан ҳам ушбу судга адвокатларнинг ярми келмаган.
Энди гувоҳларнинг сохталиги фош бўлганига келсак, масалан, андижонлик “гувоҳ”нинг судланувчилардан уч нафари унинг уйига бориб, ҳизб фаолиятини муҳокама қилганлари ҳақида айтган гаплари жуда беўхшов чиққан. Шунингдек, сирдарёлик Илҳом исмли “гувоҳ”нинг айтишича, Маманазаров Абдужаббор исмли биродаримиз масжидда “Аллоҳу Акбар” дея бақир-чақир қилибди. Қизиқ, Аллоҳ Буюкдир, дея баралла жар солиб, Роббимизни улуғлаш қачондан бери жиноят ҳисобланадиган бўлиб қолган?! Биродаримизни “оғир жинояти” шуми?! “Гувоҳ”ларнинг мана шундай пала-партиш ва беўхшов гапларидан сўнг судья танаффус эълон қилиб юборган. Албатта, қораловчи ва айтиш мумкинки, судьялар ҳам бундай омадсизликдан мулзам аҳволга тушишган. Сўнгра судья барча “гувоҳ”ларга кейинги судда ҳозир бўлишлари кераклигини уқтирган. Бироқ улар судга кела олмасликларини, уларга “судга бормайсан” деб айтилганини билдиришган. Бундай тақиқ уларга катта эҳтимол билан хавфсизлик идоралари ходимлари тарафидан қўйилганини англаб олиш қийин эмас. Аммо судья уларга судда бевосита иштирок этишдан бошқа йўл йўқлигини, агар бундан бош тортишса ёлғон гувоҳлик бериш ёки гувоҳликдан бош тортиш бўйича жиноий жавобгарлик борлигини эслатган. Хуллас, Аллоҳнинг дўстларига қарши қаратилган фитна ва ёлғонга тўла бу қинғир ишлар, Аллоҳнинг ёрдами ила, ҳар лаҳзада фош бўлиб бормоқда.
Афсус ва яна афсус, бизнинг чуқур хавотирларимиз амалда ўз тасдиғини топиб бормоқда. Яъни собиқ сиёсий маҳкумларнинг биринчи гуруҳига нисбатан қўлланган фитна ишлар бу йигитлар устида ҳам қўлланмоқда. Чунки мақсад бу йигитларнинг ҳақиқатдан ҳам бирор жиноятга қўл урганми йўқми, шуни аниқлаб, адолатни қарор топтириш эмас. Агар мақсад шундай бўлганида, биринчи навбатда, золим Каримов режими томонидан уларга етказилган азоб-уқубатлар учун ҳозирги ҳукумат узр сўраб, жисмоний ва руҳий яраларига малҳам қўйган бўларди. Бироқ ҳозирги ўзбек режими ҳам кофир мустамлакачи давлатларни рози қилиш йўлидан бориб, бу беайб йигитларни яна қамоққа ташлашдан уялмаяпти. Бу йигитларга ҳатто ўзларини ҳимоя қилишлари учун тузук-қуруқ шароит ҳам яратиб бермаяпти. Чунки уларни яна қайта қамаш бўйича “буюртма” ўзбек режимининг энг юқори сиёсий доираларидан келган.
Бу йигитларга ёрдам бериш мақсадида Ҳизб ут-Таҳрир томонидан ижтимоий тармоқларда кампания, қатор намойишлар уюштирилди, Ўзбекистоннинг қатор давлатлардаги элчихоналарига талабномалар топширилди. Бундай адолатсиз ва ноҳақ ишлардан оммани хабардор қилишни талаб қилиб бир қатор маҳаллий ва хорижий ОАВга хатлар юборилди… Аммо шу вақтгача булардан бирортаси мурожаатларга жавоб бермади.
Биз Ўзбекистоннинг мусулмон халқи учун жонини фидо қилишга тайёр бўлган, ҳозирги хор ва қолоқ аҳволдан чиқишнинг тўғри йўлини кўрсатиб, фақат Аллоҳнинг розилигини кўзлаган ушбу тақволи ва мард эр кишиларга нисбатан зулму зўравонликни яна бир бор қаттиқ қоралаймиз! Ўзбек режимини бундан тийилишга яна бир бор чақирамиз! Буни кўра-била туриб кўз юмаётган барча инсон ҳуқуқларини ҳимоя қилиш ташкилотлари ва ОАВни ҳам мана шу золимларга шерик бўлиб қолишдан қаттиқ огоҳлантирамиз! Золим ва унинг зулмига шерик бўлиш бу дунёда ҳам, Аллоҳнинг олдида ҳам юзи қаролик эканлигини яна эслатамиз!
وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ
– “Золим кимсалар қандай оқибатга қараб кетаётганларини яқинда билиб олурлар”. (Шуаро:227)
Ҳизб ут-Таҳрир Ўзбекистон матбуот бўлими
