بِسْمِ اللهِ الرَّحْمٰنِ الرَّحِيمِ

Судандаги ҳокимият учун курашнинг бадали Аллоҳ ҳаром қилган қонларни тўкишдан иборат бўляпти

Суданда армия билан тезкор қўллаб-қувватловчи кучлар ўртасида содир бўлган қонли воқеалар ортидан Ҳизб ут-Таҳрирнинг Судан вилоятидаги расмий нотиғи устоз Иброҳим Усмон (Абу Халил) 2023 йил 16 апрел якшанба куни нашр қилган ўз баёнотида бундай деди: «Кутилмаганда Хартум ва унинг атрофида ҳижрий 1444 йил 24 рамазон, милодий 2023 йил 15 апрел шанба куни эрталабдан Судан Қуролли кучлари билан Тезкор қўллаб-қувватловчи кучлар ўртасида шиддатли жанглар бошланиб кетди. Бундай ўзаро ҳаром жанг ушбу баёнот ёзилгунга қадар ҳар иккала томондан юзлаб қурбонлар ва ярадорларни келтириб чиқарди. Ҳатто бу қирғинбарот курашга умуман алоқаси бўлмаган қуролсиз оддий фуқароларгача етиб борди».

Устоз Абу Халил қўшимча қилиб бундай деди:

«Ҳақиқатдан, бу жангнинг мусулмонлар ўртасида бўлгани, ҳатто тақво билан Аллоҳга тавба-тазарру қилинадиган улуғ ойда содир этилгани таассуфли ҳол. Ахир, бу Аллоҳнинг калимасини олий қилиш ёки шариатини татбиқ қилиш йўлида эмас, балки ботил устида қилинаётган жанг бўлса! Ҳокимият учун бошланган бу урушга мустамлакачи қарор берди ва уни ўзининг тама-истагига мувофиқ йўналтирди, ҳукм юритишга ким ҳақлию, кимнинг ҳаққи йўқлигини у белгилаб, шу орқали курашнинг ҳомийси ва фаолига айланиб олди. Судандаги сиёсий жараённи тўла шу мустамлакачи кофирлар идора қилиб келишганига қарамай, тўқнашувлар келиб чиқиб, ҳаром қон оқизилган пайтда мисоли иблис каби «содир бўлган ҳодисалар юртнинг ички иши», деган баёнотларни беришяпти! Бу сўзлар, Ҳадас телеканали хабарига кўра, АҚШ Давлат котиби Энтони Блинкеннинг оғзидан чиқди. Бундан мустамлакачи кофирларни дарё бўлиб оққан қонлар умуман ташвишлантирмаслигини, балки уларда юрт ресурсларини ўзлаштириш ва бойликларини талон-тарож қилишдан бошқа ғам-ташвиши йўқлиги яна бир бор исботланди».

Устоз Иброҳим Усмон сўзини қуйидагича давом эттирди:

«Биз Ҳизб ут-Таҳрир – Судан вилояти аъзолари оқизилган ва оқизилаётган қонларнинг гуноҳини Судан Қуролли кучлари билан Тезкор қўллаб-қувватловчи кучлар қўмондонлари зиммасига юклаймиз ва қуйидагиларни таъкидлаймиз:

Биринчи: Армия билан Тезкор қўллаб-қувватловчи кучлар ўртасидаги бу жанг шаръан ҳаром бўлиб, унда ўлдирган ҳам, ўлдирилган ҳам дўзахга тушади. Зеро, Набий ﷺ

«إذَا الْتَقَى الْمُسْلِمَانِ بِسَيْفَيْهِمَا فَالْقَاتِلُ وَالْمَقْتُولُ فِي النَّارِ»

«Қачон икки мусулмон ўзаро қилич билан тўқнашса ўлдирган ҳам, ўлдирилган ҳам дўзахи бўлади», деганлар.

Иккинчи: Исломда армиянинг вазифаси мусулмонлар юртини мудофаа қилиш ва Аллоҳ йўлида жиҳод қилишдир, ҳокимият талашиш эмас.

Учинчи: Шаръан мусулмонлар халифаси амирлиги остида битта армия бўлади, бир неча кучларнинг бўлиши ножоиздир.

Тўртинчи: Ислом ҳокимиятни Умматга хослади, фақат Уммат Халифалик шартлари топилган инсонга Аллоҳнинг Китоби ва Росули ﷺнинг Суннати билан ҳукм юритиши асосида байъат беради.

Бешинчи: Исломда ҳукм ва ҳокимият ўлжа эмас, балки Аллоҳнинг аҳкомларини татбиқ қилиш, Уммат ишларини ғамхўрлик билан бошқариш ҳамда Росулуллоҳ ﷺ айтганларидек жавобгарлик ва омонатдир:

«وَإِنَّهَا أَمَانَةٌ وَإِنَّهَا يَوْمَ الْقِيَامَةِ خِزْيٌ وَنَدَامَةٌ إِلَّا مَنْ أَخَذَهَا بِحَقِّهَا وَأَدَّى الَّذِي عَلَيْهِ فِيهَا»

«У (раҳбарлик) омонатдир ва қиёмат кунида шармандалик ва надоматдир. Фақат уни ҳақли равишда зиммасига олган ва ўша зиммасидаги масъулиятни адо эта билган кишигина бундан мустасно».

Устоз Абу Халил ўзининг матбуот баёнотини қуйидагича тамомлади:

«Судан Армияси билан Тезкор қўллаб-қувватловчи кучлар қўмондонларига бизнинг айтар сўзимиз: Аллоҳдан қўрқинг ва эс-ҳушингизни йиғиб, мусулмонлар қони оқизилишини тўхтатинг ҳамда Пайғамбарлик минҳожи асосидаги иккинчи рошид Халифаликни барпо этиш учун Ҳизб ут-Таҳрирга нусрат-ёрдам беринг… Шояд, Аллоҳ ўтган гуноҳларингизни кечириб, сизга ҳам Росулуллоҳ ﷺга Мадинаи Мунавварада илк Ислом давлатини барпо этишида нусрат берган ансорларнинг савобини берса. Дарҳақиқат, Аллоҳ Субҳанаҳу уларни мадҳ этиб, бундай деган:

﴿وَالَّذِينَ آوَوا وَنَصَرُوا أُولَئِكَ هُمُ الْمُؤْمِنُونَ حَقًّا لَهُمْ مَغْفِرَةٌ وَرِزْقٌ كَرِيمٌ﴾

«(Муҳожирларга) уй-жой бериб, нусрат берган зотлар – ана ўшалар ҳақиқий мўминлар бўлиб, улар учун мағфират ва улуғ ризқ бор»                                                                               [Анфол 73]

Роя газетасининг 2023 йил 19 апрел чоршанба кунги 439-сонидан