بِسْمِ اللَّـهِ الرَّحْمَـٰنِ الرَّحِيمِ

Роя газетаси:

Сурия инқилобининг охирги қалъаси – Идлибни нималар кутмоқда?

Турк режими Ҳалабни Асад қўлига топширишдаги ўз вазифасини муваффақиятли бажарди. Шундан сўнг, Шом инқилобига заррача фойдаси тегмаган “Фурот қалқони” амалиёти якунлангани эълон қилинди. Аксинча, бу амалиёт қўзғолончи отрядларни турк режими ва унинг ҳожаси Америка фойдасига ишлаган иккинчи даражали жангларга чалғитиб, уларнинг кучини беҳудага совурди. Эрдоған режими нафақат тоғут Асадни ағдармади, балки “Фурот қалқони” амалиёти кучлари назоратидаги минтақаларда бир томондан араблар ва туркманлар, бошқа томондан курдлар орасига душманлик уруғини сочди. Туркия халқнинг миллатчилик туйғулари билан ўйнашиб, бу минтақаларда ўз ҳукмронлигини ўрната олди. “Фурот қалқони” амалиёти кучлари назоратидаги минтақаларда одамларни батамом курдларга қарши қайраш учун оммавий юришлар ташкил қилинди. Турк режими Туркия чегарасида курд вужуди тикланишини олдини олиш бўйича ўз манфаатларини амалга ошириш учун араб ва туркманлардан разилона фойдаланди.

Воқеаларни ва сиёсатчиларнинг баёнотларини кузатар эканмиз, Сурия инқилобининг сўнгги таянчи – Идлибга қарши йирик амалиёт тайёрланаётгани ойдинлашмоқда. Америка қуруқлик қўшинлари штаби бошлиғи генерал Марк Милли 21.03.2017 да Вашингтондаги конференцияда кутилаётган жанглар тўғрисида шундай деди: “Эҳтимол, биз жанглар бўладиган минтақаларда фундаментал ўзгаришларни кўрамиз. Жанг майдони бўшаган ҳудудлардан аҳоли зич жойларга кўчади”. Бундан ташқари, Россия ўз қўшинларини Сурия курдлари назоратида бўлган Ҳалаб ғарбининг Африн шаҳрига кўчирмоқда ва ўз кучларини бир томондан курдлар, бошқа томондан турклар ва Сурия Озод Армияси ўртасидаги эҳтимолий тўқнашувларни олдини олиш баҳонасида Идлибдан шимол томонга кенгайтирмоқда.

Бунга курд YPG командири Сипан Хамонинг курд SDF отрядлари Сурия Озод Армиясининг айрим гуруҳлари билан ҳамкорликда ва Россиянинг ҳаво кўмагида “Фатҳ уш-Шом” билан жанг қилиш учун Идлибга боришларини инкор этмаслиги тўғрисидаги баёнотини ҳам қўшинг. Бундан ташқари, Марказий Разведка Бошқармаси (ЦРУ) қўмондонлигидаги “Ал-Мук” координацион маркази барча “мўътадил” отрядларни “эктремистларга” қарши жанг қилишга тайёрланишлари учун битта вужудга бирлашишга мажбурламоқда. Одатда Ғарб мана шундай ҳаракат қилади, ўз манфаатларини амалга ошириш учун бир гуруҳ мусулмонларни бошқасига қарши қайрайди. Шунингдек, ОАВда эълон қилинган “Жайш ал-Фатҳ” вакиллари ва ИИҚК (КСИР) бошчилигидаги делегация ҳамда Ливан “Ҳизбуллоҳи” ўртасида Идлиб вилоятининг Кафрая ва ал-Фуа аҳолисини эвакуация қилиш эвазига Дамашқ яқинидаги Забадоний, Мадая ва Блудандаги мужоҳидларни эвакуация қилиш, шу жумладан Сурия режими асирга олган юзлаган шахсларни озод қилиш бўйича Қатар воситачилигида эришилган келишувлар ҳам сўзларимизни тасдиқламоқда. Кафрая ва ал-Фуада қолган фуқаролар ва ҳарбийлар эвакуация қилинишлари ва кейинчалик улардан Идлибга ҳужум қилишда – айниқса, бу икки районга самолётлардан катта миқдорда қурол-яроғ ташлангани ҳисобга олинса – режим томонидан ишга солиниши кутилмоқда.

Шундай қилиб, Шом инқилобининг сўнгги қалъасига ҳужум қилиш учун барча даражаларда тайёргарлик ишлари кетмоқда. Бу тайёргарлик доирасида Америка YPG курд отрядларидан фойдаланиб, Раққани ўз назоратига олмоқчи, бу ернинг аҳолиси “ИШИД” ни шаҳардан чиқиб кетишга ва Дейр аз-Зорга кўчишга тайёрланаётганига гувоҳ бўлиб улгурди. Бу ҳодисалар фонида музокаралар давом этмоқда, унинг бешинчи қисми навбатдаги қисмини ўтказиш таклифидан бошқа нарсага эришмай якунланди. Бу музокаралар орасидаги танаффусда тоғут Асадни хурсанд қилаётган Америка маҳсулоти реклама қилинмоқда. Масалан, АҚШнинг БМТдаги доимий вакили Никки Хейли Сурияга нисбатан унинг давлати олдидаги асосий вазифа Башар Асадни ҳукуматдан четлаштириш эмаслигини айтди. Одатдагидек, Америка халқларга қарши тил бириктирувлар тўқимоқда ва ўз тақдирини ўзи белгилаш шиори остида уларнинг тақдирини ҳал қилмоқда.

Шубҳа йўқки, Сурияда Асадни қулатиш ҳеч қачон Американинг асосий ташвиши бўлмаган, Ислом ва мусулмонлар душманидан бундан бошқасини кутишнинг ҳожати йўқ. Унинг учун биринчи галдаги муҳим вазифа бутун дунё бўйлаб “терроризмга” қарши курашдир. Биз бу “кураш” ни худди Шомда бўлганидек, Афғонистон, Ироқ, Ливия ва бошқа давлатларда ҳам кўрдик. Америка бу курашга ҳатто жаҳон ҳамжамиятини ва қўзғолончи отрядлар раҳбарларини торта олди, у “терроризм” ни баҳона қилиб шаҳарлар ва инфратузилмаларни вайрон қилмоқда, гўдаклар, аёллар, қарияларни қирғин қилмоқда ҳамда уларни кўчиб кетишга мажбурламоқда. Қочқинлар ишлари бўйича БМТ Олий комиссари Бошқармасининг баёнот беришича, инқилобнинг еттинчи йилида Суриядаги қочқинлар сони беш миллиондан ошиб кетган ва бу дунё бўйича энг катта қочқинлар кризиси сифатида тавсифланган. Шундай қилиб, Ғарбнинг асосий вазифаси мусулмонларни ўлдириш, уларни уйларидан ҳайдаб чиқариш ва шаҳарларини вайрон қилиш эканлиги ойдинлашмоқда. Бу мусулмонларни ҳимоя қиладиган ва ишларини ғамхўрлик билан бошқарадиган халифаси йўқлиги сабабли содир бўлмоқда.

Аллоҳнинг Расули с.а.в. дедилар:

إنما الإمام جنة يقاتل من ورائه ويتقى به

“Имом қалқондир, унинг ортида туриб жанг қилинади ва ҳимояланилади” (Муслим).

Мусулмонлар буни англашлари, Ғарбнинг ўзларига нисбатан душманлигини кўришлари ҳамда у ва унинг барча малайлари билан барча алоқаларини узишлари лозим. Улар мусулмонларга шон-шарафи ва буюклигини қайтарадиган, Ғарбни шайтон васвасасини унутишга мажбур қиладиган Иккинчи Рошид Халифалик давлатини тиклаш учун Пайғамбаримиз с.а.в. тариқатлари бўйича ишлашлари лозим.

Аҳмад Абдулваҳҳоб

Ҳизб ут-Таҳрирнинг Суриядаги ахборот офиси масъули

8 Ражаб 1438 ҳ.й.

05.04.2017 й.