Туркий давлатлар бирлиги ёлғон ғоя
Туркий давлатлар бирлиги ёлғон ғоя
بسم الله الرحمن الرحيم
Жорий йилнинг 10-11 ноябрь кунлари Самарқандда Туркий давлатлар ташкилотининг (ТДТ) биринчи саммити бўлиб ўтди. Саммитда туркий дунёни янада яқинлаштириш ва мавжуд салоҳиятини тўлиқ ишга солишга қаратилган таклиф ва ташаббуслар илгари сурилгани айтилди. Бироқ учрашув якунида имзоланган Самарқанд декларацияси ва бошқа бир қатор ҳужжатлар ўрганилса, уларнинг асосий қисмини савдо-иқтисодий келишувлар ташкил қилгани маълум бўлади. Аниқроғи, Америка ўз таъсири остидаги Туркия воситасида Ўрта Осиёнинг транспорт изоляциясини бартараф этиш баҳонасида минтақани Россиядан узоқлаштиришга эришяпти. Бу масалага Қорабоғ муаммосини ҳам боғлашга уринаётгани кузатиляпти. Бироқ Ўзбекистон тарафи ТДТ йиғинларини «Буюк Турон» деб номланган ёлғон ғояга боғлашга уриняпти. Шавкат Мирзиёев келгуси йили Ўзбекистонда Туркий дунё ёшларининг илм ва инновациялар халқаро конгрессини ўтказишни таклиф қилди. Бу таклиф гарчи иқтисодий ўсишни кўзда тутса-да, билим ва илғор техника ва технологияларнинг янги авлодларига эришиш орзусидаги ёшларни туркий халқлар бирлиги ғоясига тарғиб қилишни ҳам кўзлайди. Шавкат Мирзиёев иқтидорга келган илк кунларданоқ Каримов даврида «фикрга қарши фикр, ғояга қарши ғоя, жаҳолатга қарши маърифат» тамойили шиор қилиб олингани, бироқ амалда тақводор мусулмонларга нисбатан нотўғри сиёсат юритилганини танқид қилган эди. Шундан сўнг, Ўзбекистон ҳукумати халқнинг асрий орзуси бўлган Исломий уйғонишга бўлган ҳаракатларини бошқа тарафга буриб юбориш учун туркийлар бирлиги ғоясини аста-секин илгари сура бошлади. Бу қабиҳ ниятни устамонлик билан яширишда айбсиз қамалган мўминларни «афв» қилиш ва Жаслиқ зонасини ёпишдан фойдаланганини кўрдик. Бундан ташқари, ҳукумат сиёсатини тарғиб қилувчи диний маърузачиларнинг ижтимоий тармоқларда кескин фаоллашувини ҳам давлатнинг диндорларга бераётган эркинлиги, деб талқин қилинди. Ваҳоланки, Мирзиёев даврида қўл телефонидаги биргина Исломий материал энг хавфли нарсага айланди. Ҳатто аёлларни уйда Қуръон ўрганиши жиноят даражасига етди. Эндиликда ТДТ доирасида Тошкент давлат шарқшунослик институти Туркиянинг шарқшунослик маркази билан кўп томонлама ҳамкорликни йўлга қўймоқда. Бу марказ Усмоний Халифаликни қулатишда мустамлакачи ғарбга содиқ хизмат қилган хоинлар тарафидан асос солинган. Ислом таъсирини чеклашда бу марказ билан алоқа ўрнатишни Ўзбекистон ҳукумати катта имконият деб ҳисобламоқда. Америка тарафидан дастакланаётган «туркий давлатлар ташкилоти» мусулмонларни ўзининг қўрғони бўлган Исломга қайтишидан чалғитувчи (миллий) ғояга тарғиб қилиши шубҳасиздир. Ғарб аввалда ҳам мусулмонларни бирлашишдан чалғитиш учун шундай ғоялар ва лойиҳаларни тиқиштирган эди. Хоссатан, Ислом Давлати заифлашиб, қулатилишига яқин қолганда мусулмонлар орасига «Араб давлатлари бирлиги» ёки «Исломий давлатлар бирлиги»нинг қайси бири афзал ва уйғониш учун яқин йўл? — деган баҳс мавзусини киритган эди. «Араб давлатлари бирлиги» ҳам, «Исломий давлатлар бирлиги» ҳам зеҳнларни Исломий Давлатдан буришга хизмат қилди. Бугун ҳам кофир Ғарб мусулмонлар зеҳнини Рошид Халифалик давлатидан буриш учун «Туркий давлатлар бирлиги» деган хавфли фикрни ёйишда Туркиядан фойдаланяпти. Чунки Ўрта Осиё халқлари Туркияни ўзига яқин олади, унинг минтақага кириб келишида бирор хавф-хатар кўришмайди. Кўпчилик мусулмонлар Эрдўғон Туркияси Ўрта Осиёга Ислом ақидаси асосида бирлашиб, унинг ҳукмларини ҳаётга татбиқ қилиш йўлида ҳамкорлик қилиш учун кириб келмаётганини, балки Американинг навбатдаги чалғитувчи ва ботил ғояларини тиқиштириш учун елиб-югураётганини кўра олмаяптилар.
Мусулмонлар учун Исломдан ўзга нажот йўли йўқ. Аллоҳ розилигини ва ҳаётдаги азизликни истаган холис ва қатъиятли мусулмонлар мана шу йўлдан ўзгасига рози бўлишмайди. Уларгина Аллоҳнинг нусрати ва раҳматига ноил бўлишади. Шунинг учун мўминлар фақат Ислом ва унинг аҳкомларини ҳаётда татбиқ бўлиши йўлида ҳамкорлик қилмоқлари лозим.
وَتَعَاوَنُوا عَلَى الْبِرِّ وَالتَّقْوَىٰ ۖ وَلَا تَعَاوَنُوا عَلَى الْإِثْمِ وَالْعُدْوَانِ
– “Яхшилик ва тақво йўлида ҳамкорлик қилинг. Гуноҳ ва душманлик йўлида ҳамкорлик қилманг”. (Моида:2)
Ҳизб ут-Таҳрирнинг Ўзбекистондаги матбуот бўлими аъзоси Абдураҳмон
20.11.2022й
