Ўзбек режими Аллоҳга қарши журъат қилишга ўтдими?

بسم الله الرحمن الرحيم

Бу йилги Рамазон ойи куфр кучларининг, шу жумладан, ўзбек режимининг Исломга қарши аёвсиз кураши билан бошланди, десак адашмаймиз. Мактаб ёшидаги болаларни таровеҳ намозига қўйилмаётгани ҳақидаги хабарлар совумай туриб, ижтимоий тармоқларда шунга ўхшаш бошқа хабарлар ҳам тарқала бошлади. Айрим хабарларда айтилишича, Ўзбекистон Республикаси Миллий гвардия ҳарбий хизматчилари ва ходимларидан Рамазон ойида рўза тутишдан воз кечиш тўғрисида тилхат олинмоқда. Ҳужжатга кўра, ҳарбий хизмат давомида диний расм-русумлар ва маросимларни бажармаслик, хусусан, “Рамазон ойи”да рўза тутишдан воз кечиш шартлари қайд этилган. Ҳужжатда таъкидланишича, бу талабларга амал қилмаслик ҳарбий хизматчини лавозимидан озод қилиш ва миллий гвардия сафидан бўшатишга асос бўлиши мумкин. Бу чекловдан кўзланган мақсад сифатида хабарда қуйидаги маълумотлар келтирилган: “Миллий гвардия раҳбарияти эса мазкур чекловлар ҳарбийларнинг жисмоний ҳолати ва хизмат самарадорлигини таъминлаш учун жорий этилганини таъкидламоқда”. Бундай жирканч ишда сарой муллалари ҳам четда қолмади. Хабарда айтилишича, расмий имомларга кўра, “рўза тутиш мусулмонлар учун фарз саналади, аммо жисмоний оғир меҳнат, узоқ сафар ёки касаллик ҳолатларида уни кечиктириш шариат томонидан рухсат этилган”.

Юқоридагилардан маълум бўладики, ҳукумат наздида рўза ҳарбийларнинг жисмоний ва хизмат самарадорлигига салбий таъсир қилармиш. Ҳукуматдагилар учун Ислом аҳкомлари, Аллоҳнинг рўза каби буйруқларининг унчалик аҳамияти йўқ бўлиши мумкиндир. Бироқ расмий имомларчи, улар бу масаланинг нечоғлик долзарблигини тушунмайдиларми?! Наҳотки, имомлар Рамазоннинг 17-кунида буюк Бадр жанги бўлиб ўтганини ва унда Макка мушриклари қақшатқич мағлубиятга учраганини билишмаса?! Наҳотки, имомлар ҳижратнинг 2-йили, муборак Рамазон ойининг йигирмасида Маккаи Мукарраманинг фатҳи рўй берганини билишмаса?! Наҳотки, имомлар мусулмонларнинг Мусанно қўмондонлигида ҳижратнинг 31-йили, Рамазоннинг 14-кунида Форс Ярмукидаги ғалабаларни билишмаса?! Наҳотки, имомлар ҳижратнинг 223-йили, Рамазоннинг 17-куни Муътасим қўмондонлигида Амурия фатҳ қилинганини билишмаса?! Наҳотки, имомлар ҳижратнинг 65-йили, Рамазоннинг 25-кунида Айн Жолут жанги бўлиб, мусулмонлар унда мўғул-татарларни мағлубиятга учратганини билишмаса?! Наҳотки, имомлар Байтул Мақдиснинг озод этилиши ва Анқара фатҳи ҳам Рамазонда бўлганини билишмаса?!…

Тўғри, бугунги миллий гвардияни тарихдаги буюк фатҳларни амалга оширган мужоҳидлар билан тенглаштирмоқчи эмасмиз. Некаки, бугун миллий гвардия ўзбек ҳукуматининг Исломга қарши курашдаги қуролига айланиб қолмоқда. Мана, бу йилги Рамазонда ёшларни таровеҳ намозига қўймасликда ҳукумат асосан миллий гвардияни ишга солаётгани сўзимизнинг тасдиғидир. Шунинг учун ҳам мақоладан кўзлаган мақсадимиз ўзининг ота-онаси ва ака-укасига қарши ишлатилаётган хор миллий гвардиячиларни тарихдаги буюк мужоҳидлар билан солиштириш эмаслигини таъкидлаб қўймоқчимиз. Бироқ улар ҳам агар Исломий бошқарув остида бўлсалар, тарихдагидек буюк фатҳлар ва зафарларга эришиб, ота-онаси ва яқинлари, умуман ўз халқи фахрланадиган, қадрлайдиган ва дуо қиладиган буюк фотиҳларга айланиш имкониятига эгадирлар.

Мақсадимиз – ўзбек ҳукумати Аллоҳнинг фарзларидан бири бўлган рўзани, ҳарбийларнинг жисмоний ҳолатига ва хизмат самарадорлигига салбий таъсир қилади, деган бўлмағур важ-карсонлар билан тақиқлаши умуман шариатга тўғри келмаслигини ва бу масалада расмий имомларнинг хоинона фатволари ҳам мутлақо асоссиз эканини очиб беришдир. Чунки Аллоҳ рўза тутишга узрли бўлган ҳолатларда оғизни очишга рухсат берган ва тутганни жазолаш билан таҳдид қилмаган. Ўзбек режими эса, рўза тутган ходимни лавозимидан озод қилиш ва миллий гвардия сафидан бўшатиш билан қўрқитиб, очиқчасига рўзани тақиқламоқда. Ҳукумат бу иши билан одамларни Аллоҳга осий бўлишга буюрмоқда. Расмий имомлар эса, Аллоҳнинг рухсатини бузуқ талқин қилиб кўрсатиб, ҳукуматни оқламоқда. Аслида, улар Пайғамбаримиз ﷺнинг: “Агар улардан (раҳбарлардан) бирортаси сизни Аллоҳга осий бўлишга буюрса, унга итоат қилманг”, – деган ҳадисларига амал қилишлари вожиб эди. Уларга Аллоҳнинг қўйидаги ояти ва унга боғлиқ ҳодисани эслатамиз:

اتَّخَذُوا أَحْبَارَهُمْ وَرُهْبَانَهُمْ أَرْبَابًا مِنْ دُونِ اللَّهِ وَالْمَسِيحَ ابْنَ مَرْيَمَ وَمَا أُمِرُوا إِلَّا لِيَعْبُدُوا إِلَهًا وَاحِدًا

لَا إِلَهَ إِلَّا هُوَ سُبْحَانَهُ عَمَّا يُشْرِكُونَ

– “Улар Аллоҳни қўйиб ўзларининг донишмандларини ва роҳибларини ҳамда Масиҳ ибн Марямни Парвардигор деб билдилар. Ҳолбуки, фақат ягона Аллоҳга бандалик килишга маъмур (буюрилган) эдилар. Ҳеч илоҳ йўқ, фақат Унинг Ўзи бордир. У зот уларнинг ширкларидан покдир”.   (Тавба:31)

Адий ибн Ҳотим бу оятни эшитиб: “Улар роҳибларини Худо қилиб олмаганлар” деганида, Пайғамбар ﷺ: “Уларга ҳаромни ҳалол қилиб, ҳалолни эса ҳаром қилиб беришмаганмиди. Мана шу уларни (яъни роҳибларини) Худо қилиб олишларидир”, – деб жавоб берганлар.

Ҳукуматга келсак, кўрябмизки, у Исломга қарши курашда миллий гвардияни қурол қилиб ишлатмоқда ва хавфсизлик тизимларида Исломга муҳаббатли ходимларнинг бўлишидан ўзига хатар кўрмоқда. Ҳукуматнинг рўзани тақиқлашда келтирган юқоридаги сабаблари мутлақо шариатга зиддир.  Демак, миллий гвардия ходимларига қўйилган бу тақиқни бошқача талқин қилишнинг иложи йўқ.        

Хуллас, ўзбек режими Аллоҳ вожиб қилган ишларга тақиқ қўйиб, инсон сўзини Аллоҳнинг каломидан устун қўйяпти. Бунинг сабаби мусулмон халқимиз устида динни ҳаётдан ажратиш асосига қурилган бузуқ капиталистик қонунлар татбиқ қилинаётганидир…

Бироқ шуниси аниққи, тарихда Аллоҳга қарши борган қанча тоғут подшоҳлар бўлган бўлса, уларнинг барчаси бу дунёда хорликка дучор бўлишди ва Охиратда эса ўзларига абадий азобни тайин қилишди. Ўзбек ҳукумати ҳам ўз вақтида эс-ҳушини йиғиб олмас экан, якунда бу дунёнинг хорлиги ва Охиратнинг аламли азобини ўзига вожиб қилиб олиши ҳеч гап эмас. Яқиндагина шармандаларча қулаган Асад режимининг аччиқ қисмати бунга  ёрқин мисолдир. Аллоҳ таоло дейди:

فَأَوْحَىٰ إِلَيْهِمْ رَبُّهُمْ لَنُهْلِكَنَّ الظَّالِمِينَ

“Шунда Парвардигорлари уларга (яъни пайғамбарларга) “Албатта, Биз бу золимларни ҳалок қилурмиз…” деб ваҳй қилди”.                       (Иброҳим:13)

Ҳизб ут-Таҳрир Ўзбекистон матбуот бўлими аъзоси Салоҳиддин

09.03.2025й