Вашингтон октагонида кўринган тарихий ҳақиқат

بِسْمِ اللهِ الرَّحْمٰنِ الرَّحِيمِ

Тарих ҳеч қачон тасодифлардан иборат бўлмаган, аксинча, у муайян қонуниятлар ва илоҳий сунанлар асосида ҳаракатланадиган жонли жараёндир. Инсоният тарихидаги энг йирик империяларнинг таназзули ва янги мафкуравий кучларнинг майдонга чиқиши, одатда, жамиятларнинг маънавий инқирози энг юқори нуқтага етган пайтда содир бўлади. Кеча Вашингтонда, АҚШ давлатчилигининг бош қароргоҳи ҳисобланган Оқ уйнинг Жанубий майдонида (South Lawn) АҚШ мустақиллигининг 250 йиллиги ва президентнинг 80 ёшли юбилейи баҳонасида ўтказилган тижорий “UFC Freedom 250” қонли жанглар шоуси замонавий дунёга жуда улкан бир тарихий рамзни тақдим этди. Сиёсий ҳокимият пойдевори устига тўқсон икки метрлик темир панжарали октагон (қафас) ўрнатилиши, жангчиларнинг Оқ уй ичидан қуролли фахрий қоровул кузатувида чиқиб келиши ва одамлар бир-бирини қонга белаб уришини давлат миқёсидаги энг олий томошага айлантирилиши шунчаки замонавий спорт тадбири эмас. Бу – Ғарб капиталистик маданиятининг мафкуравий жиҳатдан буткул ичидан чириб битганини, маънавий ва сиёсий қадриятларининг энг сўнгги чегарасига етиб келганини фош қилувчи, худди Қадимги Рим империясининг таназзул даврини бошлаб берган ўша машҳур “нон ва томоша” (Panem et circenses) сиёсатининг асл намунасидир.

Агар биз ушбу ҳодисани тарихий фактлар тарозисига қўйиб таҳлил қилсак, бугунги Ғарб дунёсининг аҳволи милодий VII аср бошларидаги Шарқий Рим (Византия) империясининг инқироз даври билан ҳайратланарли даражада уйғун эканини кўрамиз. Тарих саҳнасида Рим империясининг ички маънавий емирилиши, оммавий ваҳшиёна томошалар орқали халқ онгини заҳарлаши ва сиёсий тузумнинг чириши айнан Арабистон ярим оролида, Мадинаи Мунавварада Ислом Давлатининг тикланиши ва дунё саҳнасига чиқиши билан бир даврга тўғри келган. Милодий 610-641 йилларда Рим тахтини эгаллаган император Ираклий (Ираклиос) даврида давлат сиёсий ва иқтисодий парокандаликка юз тутган эди. Ўша даврда Рим императорлари ички синфий зиддиятлар, оғир солиқлар ва ҳокимият инқирозларини яшириш, омманинг ҳақли норозилигини чалғитиш учун пойтахт Константинополдаги “Гипподром” (Hippodrome of Constantinople) каби улкан ареналарда юз минглаб одамларни тўплаб, ваҳшиёна арава пойгаларини ва оммавий қонли шоуларни тинимсиз рағбатлантириб боришган. Жамият “Яшиллар” (Прасинои) ва “Кўклар” (Венетои) каби сохта мафкуравий фанатлар қатламига бўлиниб, ареналарда бир-бирини ваҳшийларча қатл қилар, императорлар эса мана шу нафс ва қон устига қурилган шоулар ёрдамида ўз оммасини бошқарарди. Инсон ҳаёти, ҳақ-ҳуқуқлари, ахлоқ ва соф тафаккур мана шундай зўравонликлар остида топталган айни ўша йилларда (милодий 622 йилда), Мадинада соф Ислом ақидаси асосида инсониятни қулликдан озод қилувчи, адолат ва ҳақиқий юксалишни олиб келувчи илоҳий бошқарув тузумининг пойдевори қўйилаётган эди. Бир томонда ўз нафси, иқтисодий зулми ва ваҳшиёна оммавий шоулари билан овунаётган, ичидан чириган Рим ўзининг сўнгги таназзул босқичида турган бўлса, иккинчи томонда инсонлар устидан инсонлар ҳокимлигини бекор қилиб, Ҳокимликни фақат Аллоҳнинг Шариатига топширган Ислом Давлатининг порлоқ тонгги отаётган эди.

Бугунги Америка ва у тақдим этаётган Ғарб капитализми худди ўша Рим империясининг замонавий ва энг сўнгги шаклидир. Давлат рамзларининг хусусий ширкатлар манфаати билан қоришиб кетиши, миллиардерлар ва технология гигантлари Оқ уй ложасида ўтириб инсонларнинг қафас ичидаги ваҳшиёна жангларини миллионлаб инсонларга пул эвазига сотиши Ғарбнинг “олий демократик қадриятлари” аслида пуч эканини исботловчи омилларнинг айнан ўзидир. Улар йиллар давомида бутун дунёга оғиз йиртиб жар солган “инсон ҳуқуқлари”, “гуманизм” ва “маданият” ниқоблари Вашингтон қафаси ичида парчаланиб кетди. Ўз халқига реал сиёсий ва иқтисодий инқирозлардан нажот бера олмаётган, мафкуравий жиҳатдан боши берк кўчага кириб қолган капиталистик тузум худди Рим императорлари каби оммани қонли шоулар ва чексиз эркинликлар бериш орқали бошқаришга мажбур бўлмоқда. Давлат пойдевори бўлган конунчилик ва сиёсий марказнинг тижорий октагонга айланиши – тузумнинг суяк-суягигача чириганининг, уни ушлаб турган мафкуравий устунларнинг синиб-йўқ бўлганининг далилидир. Тарих гувоҳ, қачонки, бирор катта империя ўз марказида мана шундай маънавий ваҳшийликни, одамхўрликни “тараққиёт ва байрам” деб улуғлашни бошласа, демак, ўша тузумнинг тарих саҳнасидан кетиш вақти муқаррар равишда яқинлашган бўлади.

Шу сабабли, Вашингтондаги кечаги жанг шоуси бизга ҳозирги замоннинг энг йирик ва зўравон империяси ўз қулаши ва таназзулининг сўнгги палласига кирганини англатувчи жуда катта сиёсий белгидир. Бу худди Рим Колизейидаги сўнгги жанглар каби эскирган ва чириган дунёқарашнинг ўлим олдидаги жон таслим қилиш ҳаракатларини эслатмоқда. Мана шундай тизимли ва глобал маънавий қулаш содир бўлаётган тарихий вазиятда, инсоният худди VII асрдагидек янги ва соф озодлик тонгига, яъни Исломнинг илоҳий бошқарув тузумига сув ва ҳаводек муҳтождир. Бугунги Ғарб андозалари асосида қурилган, инсонни инсонга қул қилувчи дунёвий бошқарув шакллари инсониятни фақат мана шундай маънавий жаҳолат ва иқтисодий зулм ботқоғига етаклаши ҳеч кимга сир бўлмай қолди. Вашингтон октагонининг чириган сурати қаршисида, бугун мусулмон уммати ва унинг уйғоқ фикрли зиёлилари англаб етиши керак бўлган энг олий ҳақиқат бу – мавжуд сунъий тузумларни ислоҳ қилиш хомхаёлидан воз кечиб, дунёни зулматдан нур сари олиб чиқадиган Пайғамбарлик минҳожи асосидаги Халифаликни тиклаш учун ҳаракат қилишдир. Айнан мана шу ҳаракатгина бугунги замонавий Римнинг қулаши ортидан бутун башарият учун Исломнинг адолатли ва порлоқ тонги отишини таъминлайдиган ягона тарихий ва шаръий йўлдир.

Салоҳиддин

21.06.2026й