Янги йилни байрам қилмоқчи бўлаётганлар, Аллоҳдан қўрқинг ва Ғазони унутманг!
Янги йилни байрам қилмоқчи бўлаётганлар, Аллоҳдан қўрқинг ва Ғазони унутманг!
بسم الله الرحمن الرحيم
Ҳа, биз ҳар бир мусулмон биродаримизга шундай деймиз, янги йилни байрам қилмоқчи бўлаётган бўлсангиз, аввало Аллоҳнинг бу ҳақдаги ҳукмини ёдга олинг ва Ғазони унутманг! Шояд, шундагина ушбу куфр байрамини нишонлаш фикридан қайтиб, Аллоҳнинг ғазабидан ўзингизни асраб қолсангиз!
Янги йилнинг асло жоиз эмаслиги, ҳатто бу иш иймон эгасини – агар эътиқод билан қилса – куфрга олиб бориш хавфи борлиги очиқ-ойдин кўриниб турган бўлса-да, юртимизда бунга бепарволик қилиб, байрам қилаётганлар, афсуски кўпчиликни ташкил қиляпти. Албатта, бу борада сарой уламоларининг ҳиссаси ҳам катта. Чунки улар байрамларни турларга ажратиб, янги йилни “диний байрам турига кирмайди, бу шунчаки милодий йилнинг янгиланиши ва уни яхши ниятлар билан, ичкилик ва бошқа ҳаром амалларсиз, оила дастурхонида кутиб олиш жоиз – хуллас мусулмон киши ҳам бу кунни байрам қилиб нишонлаши мумкин” дея фатво беришяпти. Бироқ улар ўзларининг “биз аҳкомларда Ҳанафий ва ақидада Мотуридийлик мазҳабидамиз” деган даъволарида ростгўй бўлганларида, янги йилни нишонлашни ҳаром ва унга пул сарфлашни исроф, деган бўлардилар.
Зеро, Ҳанафий мазҳабида ҳам янги йил каби байрамлар кескин рад қилиниб, уларга ишониш куфр, нишонлаш эса ҳаром эканлиги очиқ-ойдин айтилган. Масалан, “Ал-Фатава ас-Суғро” китобида шундай дейилган: “Наврўз куни, илгари одатланмаган нарсани Наврўз байрамини улуғлаб сотиб олган киши катта гуноҳни қилиб, кофир бўлади. Чунки у кофирларнинг байрамларини улуғлаган ҳисобланади”. (Имом Абу Ҳанифа раҳимаҳуллоҳнинг “ал-Фиқҳул-Акбар” китобига ёзилган шарҳ: 186). Ҳанафий мазҳабининг машҳур уламоларидан аллома Мулло Алийюлқорий раҳимаҳуллоҳ айтади: “Наврўз байрами куни мажусийга бир тухумни совға қилган одам кофир бўлади. Чунки у мажусийнинг куфри ва залолатига ёрдам берди ёки совға бериши билан уларга ўхшади. Баъзилар: “Мусулмон Наврўз байрамида мусулмонга совға берса кофир бўлмайди” демоқдалар. Бу сўзга диққат этиш керак. Чунки бу ишда мажусийларга ўхшашлик бордир. Табиийки, қасдсиз (билмай туриб) Наврўз байрамига келиб қолган одамнинг ҳукми бундан фарқлидир”. Бу ўринда наврўз билан янги йил ўртасида фарқ йўқ. Икковига ҳам, шунингдек бошқа ҳар қандай куфр байрамларига ҳам айни шу ҳукм тўғри келаверади.
Албатта, Ўзбекистондаги муфтий бошлиқ сарой уламолари бундай куфр байрамларини халқимизга ҳалол, деб фатво бераётганининг ўзига яраша сабаби бор. Улар одамларга Аллоҳ таоло нозил қилган динни тўлалигича баён қилиш эмас, балки ундан ҳукумат хоҳлаган қисминигина етказиб, ҳатто ҳалолни ҳаром, ҳаромни ҳалолга айлантириб беришдек хоинона фатволарини чиқаришга муккасидан кетишди. Улар бу ишлари билан, Қуръонда лаънатга учраган Бану Исроил – яҳудийлар қилмишининг худди ўзини қилмоқдалар. Аллоҳ таоло дейди:
لَقَدْ أَخَذْنَا مِيثَاقَ بَنِي إِسْرَائِيلَ وَأَرْسَلْنَا إِلَيْهِمْ رُسُلًا ۖ كُلَّمَا جَاءَهُمْ رَسُولٌ بِمَا لَا تَهْوَىٰ أَنفُسُهُمْ فَرِيقًا كَذَّبُوا وَفَرِيقًا يَقْتُلُونَ
– “Биз бани Исроилнинг аҳд-паймонини олдик ва уларга пайғамбарлар юбордик. Қачон уларга бир пайғамбар нафслари хоҳламаган бирон ҳукмни келтирса, бировларини ёлғончи қиладилар, бировларини эса ўлдирадидар”. (Моида:70)
Биз мусулмон халқимизга айтамизки, бундай адаштирувчи ботил “фатво”ларга эргашиш Аллоҳнинг олдидаги ҳисоб-китобда сизга ҳеч қандай ҳужжат бўлолмайди. “Домла фатво берди ва мен ўшанга эргашдим, энди мендан жавобгарлик соқит” дея ўзингизни осло алдай кўрманг! Албатта, бундай сохта фатволарни бераётганларнинг ҳисоби уларга эргашаётганларникидан кўра оғирроқ бўлиши муқаррар. Аммо сиз, айниқса, бугун Ислом давлати йўқ бўлиб, Аллоҳнинг дини билан савдо қилувчи рувайбизалар тўлиб кетган бир даврда, бундай ботил фатволарга эргашганингиз учун, шубҳасиз ҳисобга тортиласиз.
Қолаверса, бундай куфр байрамларини нишонлаш кўнглингизга сиғаётган пайтда, унга киришишдан аввал Ғазодаги мусулмонларни ҳам бир ёдга олинг. Ахир, улар Муборак Фаластин замини ва барча мусулмонларнинг муқаддасотлари ҳимояси учун жон олиб, жон бераётган бир вақтда, сиз қандайдир асоси йўқ байрамларни нишонлаб ўтиришдан Аллоҳдан хаё қилмайсизми?!
Биз бундай оғир гапларни анави ҳукумат ва унинг сарой домлаларига айтмаяпмиз. Сабаби, бугун уларнинг Ислом ва мусулмонларга нисбатан хиёнатлари ҳар қандай чегарадан ошиб тушмоқда. Лекин шундай бўлса-да, уларни бундай мункар ишлардан қайтариш ва Аллоҳдан қўрқишга бўлган даъватимиз ҳеч қачон тўхтамайди. Фақат даъватимизга улардан кўра азиз халқимиз кўпроқ қулоқ солади, деган умидда сизга юзланмоқдамиз. Зеро, ҳукумат ва сарой домлаларини Исломга қараб юргизишда сизнинг ҳам улкан таъсир қувватингиз бор. Шунинг учун сиз Исломни муаммоларга энг тўғри ечимларни берадиган сиёсий тузум сифатида англаб, унга бўлган рағбатингизни кучайтиришингиз ўта муҳимдир. Арзимасдек кўринаётган бўлса-да, байрамлар борасидаги муҳитнинг ўзгариши ҳам Исломни ҳокимиятга олиб келишда жуда катта қадам ҳисобланади. Мана шундай қадамлар кўпайган сайин юртимизда Исломий муҳит ҳукмрон бўла бошлайди ва охир-оқибат ўша биз хоҳлаган Ислом қонунлари асосида бошқариладиган Хилофат давлатининг қайта тикланишига ҳам Аллоҳнинг изни ила қисқа фурсатларда эришамиз, инша Аллоҳ! Аллоҳ таоло дейди:
إِنَّ رَحْمَتَ اللَّهِ قَرِيبٌ مِّنَ الْمُحْسِنِينَ
– “Зеро Аллоҳнинг раҳмати чиройли амал қилувчиларга яқиндир”. (Аъроф:56)
Ҳизб ут-Таҳрир Ўзбекистон матбуот бўлими раиси Ислом абу Халил
29.12.2023й
