Жон фидо этмоққа лойиқ бирор ғоя борми?!
Жон фидо этмоққа лойиқ бирор ғоя борми?!
بسم الله الرحمن الرحيم
Нафс лаззатларини қўлга киритишни инсониятга бахт дея сингдирган Ғарб ҳазорати ўз ғояси учун жонини фидо қилишга қодир бирор қаҳрамонни чиқаролмади. Албатта, чиқаролмайди ҳам. Чунки бу мафкуралар борлиқ Яратувчисининг ҳаётга алоқасини инкор қилди. Охират, жаннату жаҳаннамнинг инсонга алоқасини шахсий масала қилиб чеклади. Шу мафкура асосида тарбияланган халқ ҳаётда барча ишларни манфаат асосида ўлчади. Бундай мафкурани ўз ҳаётига асос қилган кишилар нафақат давлати учун, балки ўз ота-онаси учун ҳам ширин жонини фидо қилишга қодир бўлолмади. Бўлолмайди ҳам. Шу боис динни ҳаётдан ажратган Ғарб ўзи асосланган демократияни оламга ёйишда таянадиган армияси сафидаги аскарларни ўз ғоясига фидоий қилолмади. Қандай фидоий қила олсин?! Ахир, халқи лаззатларни қўлга киритишни бахт дея тарбияланган бўлса. Қариган ота-онасига хизмат билан машғул бўлиб, давлати учун жангларда қатнашиб бу “бахт”дан маҳрум бўлсинми?!
Аммо давлати қудратини оламга ёйишда фидоийларга муҳтож бўлмасликнинг иложи борми? Албатта йўқ! Бу танқисликни тўлдириш учун сунъий фидоийларни, тўқима қаҳрамонларни фильмларида кенг намойиш этишга мажбур бўлди. Лекин туйғуларига эргашиб армияси сафига чорланган Америка аскарлари 20 йиллик афғон урушида ҳам, Ироқ ва Шом ўлкаларидаги жангларда ҳам мағлубиятга учради. Ва Америка ҳам дунёда энг қудратли армияга эга бўла туриб Россиянинг Афғондан шармандаларча чиқишини такрорлади. Аммо бу шармандали мағлубиятга музокаралар столида юзсизларча “ғолиблик” тўнини кийгизиб келмоқда. Ҳазоратлар тўқнашувидаги мағлубиятини ўз кучига таяниб, қудратда ягоналигини кўрсатиш билан беркитмоқчи бўлган Америка олам саҳнасида ўз мафкурасининг чириб битганини намоён қилиб қўйди.
Эй азизликка ҳақли Уммат! Сизда оламни ўзгартиришга яроқли, ўз сиёсий тузумига эга Ислом мафкураси бор. Унга эътиқод қилувчи ва Роббисининг Шариатини ҳаётга қайтиши йўлида жонлари-ю молларини фидо қилувчи рижоллари бор. Ва бу Ислом мафкураси асосидаги давлат ватанпарварлик ва миллатчиликка асосланмаган ҳамда анавиларнинг жирканч демократиясидан ҳам ҳазар қилувчи Исломий давлатдир. У оламда ўн уч аср ҳукм сурган Халифалик давлатидир. Ислом мафкураси мусулмонларни шундай асосда тарбияладики, унга эътиқод қилувчи ҳар бир миллат ягона Уммат бўлиб бирлашди. Ва бу Исломий Давлат тарихда ўз ғояси учун молу жонларини фидо қилган қаҳрамон муслим ва муслималари билан машҳурдир. Халифалик Давлати 1924 йили кофир Ғарбнинг хийла-ю найранглари билан қулатилган бўлса-да, уни қайта тиклаш учун янги-янги фидоий даъватчилар, мужоҳидлар олам аҳлига танилиб келмоқда. Заифлиги кўриниб қолган Ғарб бу икки курашда (ҳазорат ва сиёсий жангларда) бир Вужуд бўлган Умматни малай ҳокимлар ёрдамида майда давлатчаларга бўлиб, зўр-базўр ушлаб турибди.
Исломий юртлардаги қамоқхоналар шу Буюк Ғояга даъват қилувчилар билан тўлдирилмоқда. Бу хусусда биргина Ўзбекистон қамоқларига назар ташласак, тоғутлар бир неча минглаб даъватчиларни тутган йўлларидан қайтариш учун 24 йилдан бери қатл қилиб, даҳшатли қийноқларга солиб, қўшимча муддатлар қўшиш билан ҳам ўз мақсадига эришолмаётганига гувоҳ бўлиб турибмиз. Қамоқдаги муслим ва муслималарнинг ота-оналари ўз фарзандлари доғида қон йиғласалар-да, фарзандлари Аллоҳнинг калимасини олий қилиш мақсадида майдонга чиққанлари учун чиройли сабрда бўлдилар ва кўплари дийдорни қиёматга қолдириб вафот қилиб кетдилар. Аллоҳ ҳаммаларини раҳмат ва мағфиратига буркасин!!! Улардан ҳар бирининг ибратли ҳаёти ҳақида сўзласак достонлар бўлиб кетади…
Бу тўғрида бир онахоннинг шу кунлардаги ноласига қулоқ тутилса кифоядир. Шу кунларда ижтимоий тармоқларда Фарғона вилоятида яшовчи Муборак аянинг президентга мурожаати кенг тарқалди. Муборак ая эндигина балоғат ёшига етган уч ўғлини 1999 йилда Ҳизб ут-Таҳрирга аъзо бўлгани учун қамоққа ташланганидан сўзловчи мурожаатида мўминлар қалбини ларзага солувчи хитоб қилдилар. Катта ўғлини зона ходимлари 2009 йилда оғир қийноқлар остида ўлдиришгани етмаганидек, унинг жасадини полиэтилен қопга тиқиб кечаси соат 00:03 да уйига олиб келишган ҳамда автоматлар билан қуролланган ҳарбийлар ва ҳукумат вакиллари безбетларча онахонни тонг отгунича ўғлини кўмишга мажбурлашган. Бундай жирканч талаб фикрловчи кишиларга кўп сирларни очиб беради. Агар бу қатл қилинган йигитимиз золим Каримов айтганидек террорчи, экстремист, бузғунчи, ватан хоини бўлса, жасадини халққа ибрат қилиб кўрсатишлари керакмасмиди?! Нима учун оммага “биз халқ душманини ўз ғоясидан қайтмагани учун қатл қилдик” — деб баралла айта олишмади?! Оламга жар солиб “фикрга қарши фикр, ғояга қарши ғоя, жоҳилиятга қарши адолат” деган баландпарвоз шиорлар билан чиққан ҳукумат минглаб Ҳизб ут-Таҳрир аъзолари кўтариб чиққан фикрга қарши қайси фикрни илгари сура олди?! Буюк Исломий ғояга қарши қандай ғояни қўя олди?! Йигитларимиз кўтариб чиққан Исломий фикрлар жоҳилият бўлса, уларнинг қотилликлари жоҳилият эмас, адолатми?!
Кўзингизни очинг эй мусулмонлар! Олам саҳнасида ҳукмронлик даъвосидаги зўравон давлатлар ўз ғоялари учун молу жонларини фидо қилувчи кишиларни тарбиялай олмаган бир пайтда, Раббоний тарбия топган мусулмонлар ҳимоячи давлатлари йўқ бўла туриб, моллари-ю жонларини ва азиз фарзандларини Аллоҳ йўлида фидо этишда заррача иккиланмайдиган рижолларини кўз ўнгингизда кўрсатиб қўймоқда. Улардек бўлолмасангиз, ўша шаҳидларни тарбиялаб етиштирган Буюк Ғояга назар ташланг! Балки шунда саҳобаларнинг бугунги издошларини таниб оларсиз.
يا أيها الذين آمنوا هل أدلكم على تجارة تنجيكم من عذاب أليم تؤمنون بالله ورسوله وتجاهدون في سبيل الله بأموالكم وأنفسكم ذلكم خير لكم إن كنتم تعلمون يغفر لكم ذنوبكم ويدخلكم جنات تجري من تحتها الأنهار ومساكن طيبة في جنات عدن ذلك الفوز العظيم وأخرى تحبونها نصر من الله وفتح قريب وبشر المؤمنين
– “Эй мўминлар, сизларга аламли азобдан нажот берадиган бир “тижорат”ни кўрсатайми? (Ўша “тижорат” мана будир) – Аллоҳ ва Унинг пайғамбарига иймон келтирурсизлар ва Аллоҳ йўлида мол ва жонларингиз билан жиҳод қилурсизлар. Мана шу агар билсангизлар ўзларингиз учун энг яхши (иш)дир. (Агар шундай қилсангизлар, Аллоҳ) сизларнинг гуноҳларингизни мағфират қилур ҳамда сизларни остидан дарёлар оқиб турадиган жаннатларга ва абадий жаннатлардаги покиза масканларга киритур. Бу эса улуғ бахтдир. Ва (Аллоҳ сизларга) яна бошқа сизлар суядиган (бир неъматни ҳам берурки, у) Аллоҳ томонидан бўлган ғалаба ва яқин(да рўй бергувчи Макка) фатҳидир. (Эй Муҳаммад), мўминларга (мана шу) хушхабарни етказинг!” (Саф:10-13)
Ҳизб ут-Таҳрирнинг Ўзбекистондаги матбуот бўлими аъзоси Зайниддин
13.09.2022й
