بِسْمِ اللهِ الرَّحْمٰنِ الرَّحِيم

1924 йил 3-март

Ислом умматининг хорликлари бошланиши

Нима учун биз доим умматга бу кунни эслатамиз?! Аслини олганда, инсоннинг ёмон куни унга эслатилиши бу инсон қалбига озор бериши мумкин, лекин бу кун эслатиб турилиши ортида катта маъно бор, ҳатто у кун уммат бошига оғир мусибат куни ва мусибатлар келишининг дебочаси бўлган бўлса ҳам.

Инсон шундай эканки, вақт ўтгани сари қувончли кунларини ҳам, қайғули онларини ҳам унутиб борар экан. 3-март эса, мусулмонлар учун унутилиши мумкин бўлмаган асл қайғу онларидир. 1924 йил 3-март Ислом умматини Ислом ақидаси асосида бирлаштирган, Росулуллоҳ с.а.в саҳоба р.а лари билан қурган, бутун дунёга адолат билан бошқариш қандай бўлишини кўрсатиб қўйган Давлатнинг йиқитилган кунидир.

У менинг давлатим эди, чунки Аллоҳимнинг шариати билан бошқариладиган, Росулим бош бўлиб қурган давлатим эди. Тарихида қандай кунларни бошидан кечирган бўлмасин, қандай хоинликлар кўрган бўлмасин, баъзан йўлидан чекиниш, ҳатто Ислом шариатидан чиқиш ҳолатлари юз берган бўлмасин, у менинг ва Ислом умматимнинг давлати эди. Бу давлат тўғрисида ким нима деса дер, қандай бўхтонларни ёғдирса ёғдирар, ҳатто у давлат борасида ортга қайтиш, дея хулоса қилинган бўлса бордир, лекин нима бўлганда ҳам у менинг ва Умматимнинг давлати эди.

Ҳар бир мўминда бир савол туғилиши табиий: нега бугун Ислом Уммати бугунгидек мазлум аҳволда? Бунинг жавоби оддий. Уммат ўз давлати йўқлиги учун шу ҳолга тушди. Бугунги кунда ана шу давлат йўқлиги учун бутун дунёда мусулмонлар хору зор ҳаёт кечирмоқдалар. Бу оддий тушуниладиган хорлигу зорлик эмас, қонлари тўкилмаган тупроқ қолмаган ва ҳар бир золим учун ўлжага айланган, ҳатто ожиз қарияларию, хокисор гўдаклари ҳам бомбаланаётган, аёллари зўрланиш учун нишонга айланган, таналари бемалол қиймаланиб гўштлари қайсидир йиртқичсифатларнинг овқатига айланиб улгурган, исталган лайчанинг оёқлари остида хўрланиб, депсаланаётган умматнинг аҳволини билдирувчи хорлик ва зорликдир. Яна қайтарамиз, буларга асл сабаб бу ҳолатларни олдини олувчи, ҳимоя қилувчи давлатнинг йўқлигидир. Ҳатто давлати йўқлигидан уммат ўз байрамларида ҳам кўнгли тўла ёришиб хушнуд бўла олмаяпти. Бир давлат эмас, ҳатто халқаро ташкилотлар ҳам бу умматни ўз душманидек кўради. Душмандек кўришларига сабаб бу уммат яна ўз давлати бўлишини истаётганлигидир.

Бу уммат ўз давлатини йўқотишида хоинлар қанчалик хизмат қилган бўлса, бугунги кунда қайта тикланишига қаршилик қилиш учун ҳам аввалгиданда кўпроқ ҳаракат қилишмоқда. Лекин билишмайдики, Аллоҳ Ўз динини ер юзида албатта ғолиб қилгувчидир. Бу эса, умматнинг қайта ўз давлатини тиклаши билан бўлиши кундек равшан. Пайғамбар с.а.в нинг “…Сўнгра пайғамбарлик минҳожи асосидаги рошид Халифалик бўлади’’, дея қилган башоратлари ҳам шунга ишора қилиб турибди. У хоинлар эса, бу дунёда ютқазишлари етмаганидек, охират диёрида ҳам азобга гирифтор бўлишлари аниқдир.

Бугунги кунлар эса, ўткинчидир, шунинг учун ҳаракат қилиб олиш учун энг қимматли фурсатдир. Чунки Халифалик тикланган эртанги кунда амалларнинг ажри бугунгидек мўл бўлмайди. Бу кунлар ҳар бир мўмин учун ғанимат фурсатдир. Кимда қандай имконият бўлса Аллоҳ учун, Аллоҳнинг шариатини татбиқ қиладиган давлат тикланиши учун сарф қилиши керак бўлган муҳим онлардир. Шунинг учун ўртамиздаги ҳар қандай гина-адоватни унутиб, бир тану, бир жон бўлиб Ислом давлатини тиклаш йўлида хизмат қилиб қолайлик.

Ҳизб ут-Таҳрирнинг Ўзбекистондаги медиа офиси

03.03.2019й.