“Зиндон хотиралари” туркумидан

Боласини урувдим, отаси қаматиб юборди

بسم الله الرحمن الرحيم     

Зонада ҳидоят топганларнинг шундайлари борки, биродарларимиздан кўра даҳшатли синовларни бошидан ўтказганлар.

Ўзининг мардлиги ва қайсарлиги билан танилган ва ҳар сафар кимнидир дўппослаб, қамалиб келаётган Умарбек ҳизбийлардан бири билан зонада муштлашиб кетди. Зона режими бошлиғи кабинетига иккисини ҳам олиб борилди. Биродаримиз ўн беш суткага изоляторга қамалди. Аммо Умарга жазо берилмади. Лекин негадир штабдан қайтгач, ҳизбийларга ўта меҳрибон ва самимий бўлиб қайтди.

Мен ундаги бу ўзгариш сабабини билгим келди. Ва ундан эшитганларимни сиз ўқигувчимизга ҳам илиндим.

Хуллас, режим бошлиғининг кабинетида Умар муштлашув сабабларини бироз ўзининг фойдасига майорга сўзлаб берган. Бошлиқ ҳизбий биродаримизга қараб: Шу гаплар тўғрими? деб сўраганида биродаримиз ўзини оқлашга уринмасдан Умарни хайрон қолдириб: Ҳа тўғри, Умарбек рост сўзлади, деб жавоб берибди. Бошлиқ биродаримизни айбдор деб топиб, уни ўн беш сутка изоляторга ҳукм қилган.

Умарбек ҳар гал шундай ишлар билан штабга борганида, ўзи айбдор бўлиб қамалавергач, бу сафар ҳам шунақа натижани кутган экан. Аммо бу сафар бироз бўрттириб биродарнинг зарарига айтганларини у инкор қилмаганидан ва режимнийга “Ҳа тўғри, Умарбек рост сўзлади” деб ўзи қамалиб кетгани унинг ҳизбийларга муносабатини ўзгартирган экан.

Шу-шу улфатлари ҳам, суҳбатдошлари ҳам ҳизбийлар бўлиб қолди, алалоқибат ҳидоятланди. Табиийки, бу бутун штаб ходимларига ёқмади. Уни арзимас баҳоналар билан штабга чақириб калтаклай бошлашди. Кунларнинг бирида штабга кетаётса, рўбарўдан ўша режим бошлиғи шотирлари билан чиқиб қолибди. Ва атайлаб унга нафсонияти кўтаролмайдиган гап қилиб: “ҳа, Умар, ҳизбутларнинг кетини ялаб юрганмишсан” деганида, у ўзини тутолмай ўзининг оғир ва ҳар гал фалокат олиб келган машҳур муштини режимнийга отгач, майор шармандаларча юз тубан йиқилиб ҳушидан кетган. Табиийки, кейин дарҳол шотирлари Умарни дўппослаб, изоляторга қамашганди. Қасдини олиш учун ҳар гал режимний изоляторга кириб, Умарни кишанлаб, прогулка камерасида чарчагунча уриб кетишни одат қилганди.

Умарда бошқаларда кам учрайдиган бир одат бор эди. Қачон уни калтаклашаётганда чурқ этиб овоз чиқармай, урувчига нафрат билан қараб тураверарди. Бу одати режим бошлиғининг баттар жаҳлини чиқазарди. Бир гал олти кишилик изолятор камерасида у билан бирга бўлиб қолдик. Унинг кўзи шамоллаб қолгани учун уйидан келтирилган томизиладиган дорини санчаст врачи ҳар куни бир маҳал олиб кириб кўзига томизарди. Бир сафар кўзлари олазарак янги врач кириб келди. Ва унинг кўзига дори томизганида у қичқириб юборди ва врачни бўғиб “бу қанақа дори, ахир меникимас-ку” дея дўппослаганида, у: “бу дорини режимний берди” деди. Режим бошлиғи Умарни дорисига кислота аралаштириб қўйган экан. Шундан кейин чап кўзи кўришдан маҳрум бўлганди.

Мени яна бошқа зонага этап қилишини эшитиб у сўнгги суҳбат учун келди. Бир кўзини қароқчилардек қора боғич билан тўсиб олган эди. Роса суҳбатлашдик. Гап орасида, “ука бу сафар кимни дўппослаб қамалгандиз” деб сўрадим. У енгил бир кулиб, “боласини урувдим, отаси қаматиб юборди” деди.

Айтишига қараганда, шаҳар тротуарида бир чол орқасига қоп орқалаб кетаётган экан. Ёнида эса бир олифта, бақувват йигит: “оз қолди, бироз чиданг, оз қолди” деб кетаётганмиш. Бу ҳолат Умарни жаҳлини чиқарибди. Ва: “Ҳой аблаҳ, отахонга юк кўтаргиздингми” деб жавобини ҳам кутмай машҳур мушти билан ўша йигитни уриб, ҳушидан кетказиб қўйган экан. Кейин билса, ўша ўғил врач бўлиб, отасини қоп орқалатиб даволаётган экан. Ўша ота даъвогар бўлиб яқиндагина қамоқдан чиққан Умаримизни яна тиконли сим ортида бизларга улфат қилган экан. Умар ўша отахонни эсларкан: Агар ўша отахоннинг боласини уриб қамалмай қолганимда, сиз азизлардаги хотиржамлик бўстонида сайр қилмай, уни танимай ўтиб кетармидим, деб мени роса кулдирганди.

وَاللَّهُ يَهْدِي مَن يَشَاءُ إِلَىٰ صِرَاطٍ مُّسْتَقِيمٍ

“Аллоҳ Ўзи хоҳлаган кишиларни Тўғри йўлга ҳидоят қилур”. (Нур:46)

(Мушти ҳидоятига сабаб бўлган укамизни эслаганим – ўша хотираларидан)

Ҳизб ут-Таҳрирнинг Ўзбекистондаги матбуот бўлими аъзоси Зайниддин

11.03.2023й