Демократия жон таслим қилмоқда
بِسْمِ اللهِ الرَّحْمٰنِ الرَّحِيمِ
Демократия жон таслим қилмоқда
Устоз Мўънис Ҳамид – Ироқ вилояти
Ўз кирдикорларини холислик ва беғаразлик ниқоби билан яширган Американинг қул қилинган, бойликлари таланган ва мустамлакачиликдан азият чеккан халқларни бошқаришга интилиши, шунингдек, ўз юртлари ва ҳақ-ҳуқуқларини ҳимоя қилиш учун курашаётган фаластинликларга қарши яҳудийларнинг агрессиясини қўллаб-қувватлаши демократиянинг омадсизлигидандир. У мусулмонлар қонини тўкишда, шаҳарларини вайрон қилиб, бойликларини талон-торож қилишда яҳудий вужудини қўллаб-қувватламоқда… Тортиб олинган ҳақ-ҳуқуқини ҳимоя қилиш учун курашаётган бегуноҳ инсонлар қонига бўялган демократия либосини кийган давлатларнинг Америка билан ҳамкорлик қилиши ҳам демократиянинг омадсизлигидир.
Мусулмонларни ваҳшиёна қирғин қилиш демократия раҳнамоси бўлмиш Америка билан яҳудийларнинг халқаро ҳамжамият ва бутун дунё кўз ўнгида қилаётган тил бириктируви ҳисобланади. Ҳақиқатда, улар оғиз кўпиртириб мақтанган демократия юрак хуружига учради. Айниқса, Ғарб халқлари айни режимлар даъво қилаётган эркинлик ҳуқуқларига чақириб, Фаластин халқига қарши амалга оширилаётган тажовузни тўхтатишни талаб қилиб чиққан пайтларида бу демократия етакчилари даъво қилаётган нарсанинг ёлғонлиги фош бўлди. Чунки Ғазодаги бегуноҳ инсонларга қарши содир этилган ваҳшиёна тажовуз ва даҳшатли жиноятларни тўхтатишни талаб қилиб чиққан ғарблик халқлар демократия ва сўз эркинлиги жорий қилинганини даъво қилиб келаётган режимларнинг зўравонлик ва шафқатсизлигига дуч келдилар!
Демократия, ўзининг шунча муваффақиятсизликларига қарамай, сўнгги нафасигача халқларни хорлашда қатъий турибди. У мана шундай носоғлом-расво ёндашувдан азият чекаётган мазлум халқларнинг эркинлигини бўғишдан на хижолат бўлади ва на уялади. Халқлар шу пайтга қадар айни шу демократиянинг зулми остида эзилиб келди. Бугунги кунга келиб эса, унинг иллатлари фош бўлиб, айниқса, Фаластин масаласи кўтарилганда ўзининг энг хунук юзини кўрсатди. Дарвоқеъ, осмон ва ердаги барча жонзотлар Фаластин масаласининг энг адолатли ва қўллаб-қувватланишга ҳақли масала эканига гувоҳлик берар экан, лекин у Хавфсизлик Кенгаши ва БМТ каби сохта халқаро доираларга ҳавола қилинмоқда. АҚШ президенти Байденнинг ўз ҳуқуқларини ҳимоя қилаётганларни айблаб, уларни террорчи тажовузкорлар деб таърифлаши мантиққа тўғри келмайди. Зеро, унинг мамлакати халқларнинг қонуний ҳуқуқларига қарши энг катта тил бириктирувчилардан ҳисобланади.
Бугун инсоният мана шундай даҳшатли хорлик, хўрлик ва қулликдан азият чекар экан, мен қуйидагиларни айтмоқчиман:
Инсоният учун ўзи қабул қилган фикр ва тамойилларни қайта кўриб чиқиш вақти келди. Зотан, аллақачон уларнинг сохталиги кўриниб, абгорлиги аён бўлган. Шу боис инсоният нурни кўра билиш учун олдинга қадам ташламоғи, Исломнинг ақидаси ва мангу адолати зарварақларини бирма бир варақламоғи, ушбу буюк диннинг инсонпарварлигига ва нурли тарихига назар ташламоғи даркор. Ана шунда у ҳақ йўлни кўради. Исломни оламга олиб чиққан кишиларнинг йўлига назар ташлаб, уларнинг энг оғир дамларда ҳам, одамларни қулликдан қутқариб, зулматдан нурга олиб чиқиш учун Ислом олиб борган уруш вақтларида ҳам тўғри фикр юритганига гувоҳ бўлади. Шу билан фақатгина бутун башариятни бахтли қилиш учун келган ушбу диннинг адолатига гувоҳ бўлади. Шундай экан, қачон биз буларни ҳис қиламиз. Қачон эгнимиздаги хорлик ва ғафлат ғуборларини қоқиб, қўзғаламиз?!
Мустамлакачи давлатлар ўзларининг зулму зўравонликларини тўхтовсиз давом эттиришдан бошқа нарсани билмайди. Биз уларнинг инсониятга қарши шафқатсиз кураш олиб бораётганини кўриб турган эканмиз, зўравонликдан бошқа нарсани қаёқдан ҳам билишсин?! Айтмоқчиманки, инсоният Росулуллоҳ ﷺ бошчилигидаги Исломнинг нуфузли кишилари, У зотдан кейинги саҳобаи киромлар ва уларнинг йўлини тутганлар томонидан сўз ва амалда қўллаб-қувватланганидек қўллаб-қувватланишини бирон бир кун орзу қилганми?! Пайғамбаримиз Муҳаммад ﷺ бизга ва бутун инсониятга Ғарб ҳазоратининг барча тизим ва конституциялари ҳам билмайдиган дарсни ўргатиб кетдилар! Дарҳақиқат, ул зот бир куни йўл четида ўтирганларида олдиларидан одамлар тобут кўтариб ўтиб қолишади. Шунда Пайғамбаримиз ўринларидан турадилар. У зотга тобутдаги маййитнинг яҳудий бўлгани хабар қилинади. Шунда ул зот «У одам эмасми?!», деб жавоб берадилар. Қаранг, бу дин нақадар ажойиб ва олийжаноб диндирки ва бу қандай ҳам буюк принципдирки, эътиқодлари турли бўлишига қарамай, башарият ўртасидаги тенгликнинг қандай бўлишини ўргатмоқда.
﴿قُلْ هَلْ نُنَبِّئُكُمْ بِالْأَخْسَرِينَ أَعْمَالاً * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا﴾
«(Эй Муҳаммад), айтинг: Сизларга қилган иш-амалларидан энг кўп зиён кўргувчи кимсаларнинг хабарини берайликми?! Улар (кофир бўлганлари сабабли) қилган саъй-ҳаракатлари ҳаёти дунёдаёқ йўқ бўлиб кетган-у, аммо (нодонликлари сабабли) ўзларини чиройли-яхши амал қилаётган кишилар, деб ҳисоблайдиган кимсалардир!» [Каҳф 103-104]
Роя газетасининг 2024 йил 29 май чоршанба кунги 496-сонидан
