Иқтисодий қарамликдан қутулишнинг ягона йўли Ислом тузумини татбиқ қилишдир

بِسْمِ اللهِ الرَّحْمٰنِ الرَّحِيم

Бугун Ислом Уммати деярли барча соҳаларда кофир давлатларга қарамлигича қолмоқда. Айниқса, иқтисод соҳасидаги қарамлик мусулмонларнинг тинка-мадорини қуритмоқда. Исломий юртлар инсон эҳтиёжларини қондирувчи воситалар, яъни товар ва хизматларнинг катта қисмини айнан кофир юртлардан импорт қилмоқдалар. Бундай ҳолатга сабаб бўлаётган энг муҳим омил юртларимизда оғир саноатнинг йўқлигидир. Айнан оғир саноат бошқа саноат соҳаларини юргизишда ва ривожлантиришда асос вазифасини ўтайди. Чунки оғир саноат ушбу саноат соҳаларига керакли бўлган техника ва станокларни етказиб беради. Шундагина бошқа саноат соҳалари техник жиҳатдан тўла таъминланади ва асосийси, чет давлатларга қарамликдан халос бўлади. Оғир саноатсиз мамлакат худди сунъий нафас берадиган ускунага улаб қўйилган беморга ўхшайди. Унинг ҳаёт-мамоти шу ускунага боғлиқ бўлганидек, оғир саноати бўлмаган юрт ҳам ўзи қарам бўлиб қолган давлатларнинг “ҳиммати” га муҳтож бўлиб қолади.

Бу масала янада ёрқинроқ тушунилиши учун бир ҳаётий мисол келтирамиз. Халқ орасида оддийгина қилиб уста, дейиладиган уй қурадиган мутахассислар бор. Агар устада ўзининг шахсий иш қуроллари, асбоб-ускуналари бўлмаса, уларни бошқа усталардан фойдаланиш учун ёки ижарага олишга мажбур бўлади. Бу билан у муайян даражада уларга қарам бўлиб қолади, халқ тили билан айтганда “тили қисиқ” бўлади. Қачонки у ўзига иш қуроллари сотиб олсагина бу қарамликдан халос бўлади, мустақилликка эришади. Бундай ҳолат оғир саноат масаласига ҳам тегишли. Оғир саноати бўлмаган давлат худди ўзининг шахсий иш қуролларига эга бўлмаган устадек саноати ривожланган давлатларга қарам бўлиб қолади. Бу қарамлик ниҳоят даражада хатарли ҳолат бўлиб, қарам давлатнинг мустақил қарор қабул қилиш қобилиятини йўқотишига олиб боради. Бу эса, давлатнинг ички ва ташқи сиёсати мустақиллигини катта хавф остида қолдиради, бошқача айтганда, бу сиёсий жиҳатдан ўз жонига қасд қилишдир.   

Бундай хавф-хатарлар Ислом тузумини татбиқ қилиш билангина бартараф қилинади. Исломда давлат ҳақиқий маънода ўзининг мустақил ички ва ташқи сиёсатини юритиши учун тўсиқ бўладиган барча омилларни бартараф қилиши вожибдир. Оғир саноатни барпо қилиш ва уни ривожлантириш ҳам шу вожиботлардан бири ҳисобланади. Чунки юқорида айтилганидек, оғир саноати бўлмаган давлат қарам давлатга айланади, Исломда эса, бундай бўлиши асло мумкин эмас. Шу туфайли Ислом Давлати ўз оғир саноатига эга бўлишга энг биринчи вазифалардан бири сифатида эътибор қаратади. Бу билан у ўзининг ички ва ташқи сиёсатидаги мустақиллигини таъминлайди.

Ҳизб ут-Таҳрирнинг Ўзбекистондаги медиа офиси. Фаррух

31.07.2019й