Шу ерда тўхтанг ва фикрланг
Шу ерда тўхтанг ва фикрланг
بِسْمِ اللهِ الرَّحْمٰنِ الرَّحِيم
Инсон баъзида бир қанча масофа юриб, қаергадир етиб боргач, оёғи тойилганда ёки боши деворга урилгандан сўнг босиб ўтган йўли тўғрисида фикрлай бошлайди. Нималарнидир хато қилганини ва яна нималаргадир улгурмаганлигини, ҳаётининг қаеридадир бурилиш бўлганлигини ёки бурилишга имконият бўлса-да, бурилмай кетганлигини ўйлайди. Нега аксар инсонлар шундай-а?
Аллоҳ Таоло инсонга ақлни берди. Инсон айнан шу ақлини ишлатибгина Яратувчисини топади ва У зотга итоат қилиб яшаш кераклигини тушунади. Ҳа, тушунади. Ҳамма гап мана шу ТУШУНИШда. Биласизми, бунинг учун нима қилиш керак? Юқорида айтганимиздек, тўхташ керак ва барча нарсани бир четга суриб фикрлаш керак.
Тасаввур қилинг, сиз ҳам ҳаётингизни ўзгартиришдан ожиз ҳолатга келдингиз, энди фикрлаб, ҳаётдаги хатоликларни ўйлаш ва фақатгина афсус чекишдан бошқа илож йўқ. Сиз хатоларингизни тузатиб, умуман бошқача ҳаёт қуришни истайсиз, лекин афсуски энди кеч. Наҳотки, шу сизга керак бўлса?! Агар керак бўлмаса, тўхтанг ва ҳаётингиз тўғрисида фикрланг.
Юқорида айтиб ўтдик, қандай қилиб тўғри яшашни тушуниш керак. Барча инсон ҳам ўзини тўғри яшаётганини даъво қилиши мумкин. Лекин тўғри ҳаётни уни тушунган одамгина қура олади. Бундан бошқа йўли йўқ, тўғри ҳаётда яшамоқчимисиз, демак, у тўғрисида фикрлашингиз керак. Ахир Аллоҳ Таоло ақлни бекорга бермаган.
Хуллас кейин афсусланишни истамасангиз, тўхташга ва фикрлашга мажбурсиз. Йўқса, қуриб қўйган ҳаётингиз сизни у ёқдан бу ёққа судраб, истаган соҳилига улоқтираверади. Сиз эса, оқим бўйлаб сузиб ҳаётингизни маъносиз ўтказишда давом этасиз. Қаердан келдингиз, қаерда кетяпсиз, қаерга борасиз, булар сизни қизиқтирмай яшаб ўтиб кетасиз. Агар сиз тўхтамасангиз ва фикрламасангиз, бу саволларга жавоб топа олмайсиз.
Тўғри ҳаёт кечириш бу дунё ҳаётини Яратган зотни мавжуд эканлигини билиш билан бошланади. Биламан, деб даъво қилишга шошилманг. Оддий текширув: агар Яратувчининг борлигини билсангиз, унда У зотнинг борлигини ўзингиз истаган бирор инсонга исботлаб беринг-чи.
Ислом ақидасига иймон келтириш, дегани, бўлди, мен иймон келтирдим, дейишдан иборат эмас. Балки Исломнинг талаби ақидага тушуниб иймон келтиришдан иборатдир. Шундагина Яратувчи берган Исломни тушуниш мумкин бўлади. Ислом ақидасини тушунгач, Ислом шариати бўйича яшаш тушунилади. Бу эса, тўғри яшашни тушуниш, деганидир. Шунинг учун тўхтанг, ҳаёт ҳамда Ислом ақидаси тўғрисида фикр юритинг.
Ҳизб ут-Таҳрирнинг Ўзбекистондаги медиа офиси. Абдуллоҳ
08.08.2020й
