بِسْـــمِ اللهِ الرَّحْمٰـــنِ الرَّحِيـــم
Ўзбекистоннинг мустақиллик йилларида эришаётган тараққиёти

Ўзбекистон президенти Ислом Каримов Ўзбекистон республикаси конституциясининг 20 йиллигига бағишланган маросимда узундан узоқ нутқ сўзлади.

Ўз нутқини кириш қисмини;- "Бугун биз Ўзбекистонимизнинг янги тарихидаги қутлуғ сана – ҳалқимиз учун мустақил тараққиёт йўлини белгилаб, миллий давлатчилик, янги сиёсий – ижтимоий тизим барпо этиш, демократик давлат ва фуқаролик жамияти қуришнинг ҳуқуқий пойдеворини яратиб берган конституциямизнинг 20 йиллигини байрам қилмоқдамиз",- деб бошлади.

Аммо, Ўзбекистоннинг оддий фуқаролари кўнглига бу байрам ва тадбирлар сиғмади. Бунинг сабаби байрамни нишонлашлик ва "муҳтарам" президентни табриги ва аёлларга нисбатан "эҳтиромга" тўла сўзларини эшитишдан электр токи йўқлиги сабабли фуқаролар "бебаҳра" қолдилар. Бунинг устига байрам дастурхонини тузашлик ва иссиқ овқат тортишлик учун газнинг йўқлиги, уйларни совуқлиги ҳам, бу "қутлуғ айёмни" кўнгилдагидек нишонлашликка тўсқинлик қилди.

Байрамни яхши нишонлашлик учун шаҳар электр таъминоти бўлимига светни йўқлигидан арз қилиб чиққан, Фарғона вилоятининг Марғилон шаҳридаги фуқаролар ички ишлар ходимлари томонидан ушлаб кетилиб, суд қарори билан 15 суткали қамоқ жазосига махкум этилишди.

Бундан ташқари, яна шу Марғилон шаҳрида синфдош жўралар хафталик ўтиришларидан сўнг, тўғри шаҳар электр тармоқлари бўлимига свет беришликни талаб қилиб боришган. Буларни ҳам жамоат тартибини бузяпти деган бахона билан милиция ходимлари ушлаб кетишган ва улардан жарима ундиргач қўйиб юборишган.

Бугунги кунда Марғилон шаҳрида суткасига 1,5-2 соат электр токи берилмоқда. Ҳаттоки, банкларда ва милиция бўлимларида ҳам электр токи йўқлиги сабабли электрогенераторлардан фойдаланиляпти. Бу генераторлар бензин билан ишлашлиги сабабли, милиция ходимлари унга сарфланадиган бензинни ҳам ҳалқни бўйнига юкламоқда.

Андижон шаҳрида эса, бир неча юз одамлар газ ва свет йўқлиги сабабли ҳокимиятга арз қилиб чиқишган. Уларни бу чиқишидан қўрқиб кетган шаҳар ҳокимияти уларни тинчлантириш учун зудлик билан газ босимини ошириб, электр токини ёқиб қўйишган.

Бироқ, одамлар тарқагандан уч соат ўтиб электр токи ва газни қайтадан узиб қўйишган. Сўнгра, бу норозиликларни уюштиришда фаол қатнашган фуқароларни ИИВ ходимлари ушлаб кетиб қаттиқ қийноққа солишган.

Айнан ўша кунлари ўқув машғулотларини ўтказишлик бахонаси билан, вилоят бўйича танк ва БТР ҳаракатлари кузатилинди. Бу ишлар натижасида бир марта қирғинни бошидан ўтказган Андижон ҳалқи газ ва светни талаб қилишдан ҳам қўрқиб қолишди.

Бунинг устига йўқ бўлган свет ва газ учун ишчиларни иш ҳақи ва ҳатто нафақахўрларнинг нафақа пулидан ҳам, йўқ бўлган қарздорлик учун маълум фоизлар чегириб қолинмоқда.

Табиий газни йўқлиги сабабли одамлар 20 йилдан кўпроқ вақт олдин фойдаланилган ва газлаштиришлик натижасида, унутиб юборилган суюлтирилган газдан фойдаланишликка мажбур бўлишмоқда.

Бу суюлтирилган газдан газбаллонлар ёрдамида ташиш ва фойдаланишлик мумкин бўлганлиги сабабли, бугунги кунда Ўзбекистонда газбаллонларнинг бозори жуда чаққон бўлиб, 10 кг газ сиғадиган баллон 100 минг, 20 кг лиги эса 140-150 минг сўмни ташкил этади. Бундай газ баллонлар собиқ СССР даврида ишлаб чиқарилганлиги сабабли кам бўлиб юқорида кўрсатилган нархга ҳам топилиши қийин бўляпти.

Мана шундай "арзимас" сабаблар оқибатида фуқаролар бу "қутлуғ кунни" байрамона нишонлашликдан маҳрум бўлишди.

Салохиддинов Али