Фаровонлик Исломда

بِسْمِ اللهِ الرَّحْمٰنِ الرَّحِيم

Юртларимиздаги мусулмонлар ҳаётига назар солсак, ғалати воқеликни кўрамиз. Турли ёшдаги инсонларда ҳаёт ҳақидаги фикрлар ҳар хил, кимдир собиқ Иттифоқ даврида фаровон ҳаёт кечирганмиз, деса, кимдир бугунги кунимиздаги ривожланишни мақтайди. Ҳар иккала тоифа вакиллари ҳам мусулмонликни даъво қилсалар-да, Ислом ҳақида етарли тушунчага эга эмасликлари равшан. Акс ҳолда Исломга зид бўлган нарсаларни мақтаётганларини англаб етган бўлардилар.

Мусулмонларда шундай тушунчаларни шакллантириш орқали Исломдан узоқлаштириш мақсадидаги кураш узоқ вақтдан буён давом этмоқда ва бу иш турли ҳийла, алдовлар билан амалга оширилмоқда. Агар бу ҳийла ва алдовларнинг асл мақсадини тўғри англай олмасак, юқоридаги тоифа вакиллари каби фикрлайдиган қолоқ инсонларга айланамиз ва бу курашда енгилиб, душманлар қўлида хорланишда давом этаверамиз.

Собиқ Иттифоқ ҳаётга татбиқ қилган социализм мабдаси юртларимизга қонли босқини ва қатағонлари билан кириб келди ҳамда моддийликка асосланган даҳрий тузумини ўз ҳарбий қуввати ва қонун кучи билан татбиқ қилди. Шундан сўнг ўз сақофатини энг ёш давр, мактаб ёшидан бошлаб режали асосда босқичма-босқич киритди, натижада ўша даврда яшаган инсонлар ушбу сақофатдан кучли таъсирландилар, шунинг учун бугунги кунда ҳам ўша даврни қўмсайдиганлар топилади. Лекин уларнинг тасаввуридаги фаровон ҳаёт, яъни яхши яшаш шароити, озиқ-овқат етарлилиги, бепул таълим, бепул касалхона, боғчалар эвазига нимани йўқотганларини англамадилар. Чунки буларнинг барчасини эвазига тўлов Яратувчига бўлган иймондан воз кечиш эди. Чунки социализм мабдаси улардан Яратувчини борлигини инкор қилиш ортидан бу дунё ҳаёти фақатгина моддийликка асосланганини тан олишни, моддий ривожланишга ҳисса қўшиш учун меҳнат қилишни ва бунинг натижасида коммунизмда фаровон яшашга ишонишни талаб қилди.

Собиқ Иттифоқ парчаланиб, социализм мабдаси ҳаёт майдонидан кетиши билан юртларимизга капитализм мабдаси кириб кела бошлади. Бу жуда ҳам маккор ва ваҳший мабда ишни аввало ўз сақофатини киритишдан бошлади, бу ишни у турли ОАВ, газета-журналлар, кино ва сериаллар, кўнгилочар кўрсатувлар ёрдамида Ғарб ҳаётини ранг-баранг тасвирларда намойиш қилиш орқали кўпчиликни маҳлиё қилди. Бунинг ортидан инсонлар ҳаётга айнан ана шу сақофатдан таъсирланиб баҳо беришни бошладилар, айниқса сериалларга ружу қўйиш, бойликка интилиш, ҳар бир нарсада манфаатни кўриш, ўлчовларни фойда-зарар асосида шакллантириш ҳаётдаги мақсадларнинг асосийсига айланди. Фахш, бузуқлик авж олди. Инсон эркинликларини таъминлаш орқали бахтиёрликка эришиш ҳақидаги чўпчакка ишонтиришга уринаётган бу мабда инсонлардан Яратувчини инкор қилишни талаб қилмади, балки ҳаётига аралаштирмасликни шарт қилди.

Биз юқорида кўриб ўтган иккала мабданинг ҳам бир хил жиҳати бор. Яъни инсон томонидан ўйлаб топилгани ва мустамлакачилик воситаси эканлигидир. Мустамлакачиларнинг асл мақсади юртларимиздаги табиий ва бошқа бойликларга айнан ўзимизнинг меҳнатимиз ва розилигимиз билан эгалик қилишдир. Улар буни амалга ошириш йўлида ҳар қандай жирканч алдов ва ҳийлалардан фойдаланадилар.

Бу нарсаларнинг асл моҳияти ва анави мустамлакачилик воситаси бўлган мабдаларнинг ҳақиқатини англашимизнинг ягона йўли ўз Исломимизга қайтишдир. Бундан бошқа йўл йўқ. Ислом мабдаси бу дунё ҳаётини яратган Яратувчиси борлигига ва мабда У томонидан ваҳий йўли билан нозил қилинганига иймон келтиришни талаб қилади. Исломда мустамлакачилик йўқ. Инсонлар ҳаётини фаровон бўлиши ва буни кафолатлаш кайфияти ҳам Яратувчи томонидан тартиблаштириб берилган бўлиб, бу иш улардан келадиган манфаат эвазига эмас, айнан Яратувчининг буйруқ ва тақиқлари эканлиги жиҳатидан амалга оширилади.

Ҳизб ут-Таҳрирнинг Ўзбекистондаги медиа офиси. Салоҳиддин

04.08.2019й