“Гендер тенглик”нинг асл ҳақиқати халқдан яширилмоқда

بِسْمِ اللهِ الرَّحْمٰنِ الرَّحِيم

Ижтимоий тармоқларда диний кайфиятдаги материалларни тарқатганлиги учун экстремизм ва терроризмда айбланиб судланаётган аёл ва эркаклар ҳақидаги хабарлар ўзбек матбуотида тез-тез эълон қилинмоқда. Бу диндорларнинг айримлари таъқиқланган воизлар қатори расмий имомларнинг маърузаларини тарқатганлиги учун ҳам жазога лойиқ кўрилмоқда. Ҳеч бир ташкилот ёки давлат диндорларнинг ҳақ-ҳуқуқларини ҳимоя қилмагани учун ҳукумат ва унга бўйсунувчи органлар уларни жиноятчи қилиб кўрсатишда ҳар қандай тубанликдан тап тортишмаяпти. Мазкур даъватчилар жамиятни залолат ботқоғидан чиқишга ва Аллоҳнинг динига қайтишга чақираётгани учун ҳукумат уларнинг шахси ва даъватининг моҳиятини халқдан яширмоқда. Шунингдек, Ўзбекистон ҳукуматининг Ғарб билан тил бириктирган ҳолда олиб бораётган шундай лойиҳалари ҳам борки, уларнинг асл мақсадлари халқдан сир тутилиб, ёлғон мақсадларигина омма орасида шиор қилиб кўтарилмоқда. Бунга эркак ва аёл ўртасида тенглик бўлишини назарда тутадиган гендер тенглик масаласини мисол қилишимиз мумкин.

Америка етакчилигидаги ғарб гендер тенгликка тарғиб қилиш билан давлатларни ижтимоий ва иқтисодий жиҳатдан тараққий этишига кўмаклашмоқчи эканини айтиб келади. Бироқ ўз манфаатларигагина дўст бўлган ғарбнинг Мирзиёев ҳукумати олдига гендер сиёсатини юритиш талабини қўйиш билан Ўзбекистондаги муслималарнинг ҳақ-ҳуқуқларига қайғуряпти, деб ўйлаш ўта соддалик ҳисобланади. Буни англаш учун гендер тенгликнинг ҳақиқатини ва унинг Американинг халқаро сиёсатидаги тутган ўрнига қисқа тўхталиб ўтиш кифоя қилади.

Маълумки, 2017 йилда эълон қилинган гендер тенглик бўйича дунё давлатлари рейтингига Ўзбекистон киритилмади. Бу нарса президентлигига бир йил ҳам тўлмаган Мирзиёев учун ўзига хос бир сигнал бўлди. Шундан сўнг, Мирзиёев ҳукумати гендер тенглик бўйича ғарбга катта ваъдалар бера бошлади ва Саида Мирзиёеванинг халқаро форумлардаги чиқишларининг асосий мавзуи ҳам гендер тенглик бўлиб қолди. Бу ваъдаларнинг амалий тасдиғи сифатида Ўзбекистонда гендер тенгликка эришиш стратегияси ишлаб чиқилди. Мазкур стратегиядаги энг йирик ишлар 2023-2030 йиллар оралиғида амалга оширилиши белгилаб қўйилди. Ҳозирги босқичда эса, гендер тенгликни таъминлаш комиссияси фаолияти жадаллаштирилган ҳолда, вазирлик ва идоралар, нодавлат нотижорат ташкилотлари ўртасида “Гендер тенглик фаоли” номли миллий танловлар ўтказилмоқда. Куни кеча “Ўзбекистон Гендер тенгликни таъминлаш масалалари бўйича комиссияси” номи “Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси” номига ўзгартирилиши маълум қилинди. Комиссияга унинг фаолиятини очиқловчи ном берилиши гендер тенглик сиёсатининг таъсир кўламини ошириш учун ташланган навбатдаги қадам дейишимиз мумкин. Шунга кўра, эндиликда аёлларнинг жамиятдаги ролини ошириш ва оилаларнинг ички ишларига аралашиш гендер тенглик талаби эканлиги халққа сингдирилади. Ҳозирда халқимизнинг аксари гендер тенглик масаласига енгил қарамоқда. Гендер тенглик сиёсати жамият ҳаётининг барча соҳаларини ўз ичига олишидан афсуски халқимиз ғафлатда.

Аёл ва эркакнинг оиладаги, жамиятдаги ўрни ва вазифалари тўғрисидаги Аллоҳнинг ҳукмларини оммага етказадиган даъватчиларнинг фаолиятига тўсиқ қўйилгач, мусулмон аҳоли ўзининг бурч ва ҳуқуқларидан ғафлатда қолди. Оқибатда эрлар золимлашиб, аёллар итоатсизлашиб борди. Халқимиз тўғри яшаш қандай бўлишини билмай қолди ва фарзандларининг келажаги ҳақида чуқур қайғуга ботишди. Оиладаги ва жамиятдаги муаммолар ечимсиз ташлаб қўйилиб, ғарбнинг бузғунчи меъёрлари келиб ўрнашишига қулай шароит пайдо қилинди…

Гендер тенглик шубҳасиз куфр лойиҳаси бўлиб, у аёл ва эркакка нисбатан Ислом шакллантирган қарашни тубдан парчалайди. Гендер тенглик мусулмонлардан Аллоҳнинг эркак ва аёлга юклаган мажбуриятлар ва ҳақларга риоя қилмасликни талаб қилади. Гендер тенглик Аллоҳнинг буйруқ ва қайтариқларидан юз ўгириб, ўз нафсига қулликни англатадиган демократик эркинликка инсонларни мажбурлайди. Исломни мусулмонларнинг дилидан ва ақлидан чиқаришда гендер тенглик демократиянинг амалий услубларидан саналади. Мана шу жиҳатдан ҳам гендер тенглик Америка қўлидаги энг ўткир қуроллардан ҳисобланади.  

Ҳақиқат шуки, гендер тенглик эркак ва аёлнинг табиатига зид бўлган бир уйдирмадир. Исломда гендер тенглик, деган тушунчанинг ўзи йўқ. Балки эркаклар учун эркак деган эътиборда Ислом белгилаб қўйган ҳуқуқ ва бурчлари, аёллар учун аёл деган эътиборда Ислом белгилаб қўйган ҳуқуқ ва бурчлари бор. Аллоҳнинг ҳукмлари асосида берилган бу таълимотлар мумтоз шахсияларни, сўнг саодат қасри бўлган Исломий оилаларни вужудга келтиради. Ғарбни рози қилиш учун гендер тенглик деган жирканч бир сиёсатни мусулмонларга тиқиштиришга уринаётган Мирзиёев ва унинг қизи эса, жамиятдаги мавжуд Исломий дунёқараш ва Шаръий ўлчовларнинг қолган қутганини ҳам буткул бекор қилиб, ғарб меъёрларини ўрнатишда жонбозлик кўрсатишмоқда. Ҳукумат аёлларнинг нозик елкасидан нон ейиш ва уларнинг қаровсиз қолган фарзандларини ажнабийлар тузиб берган дастурлар асосида тарбиялаш учун гендер тенглик сиёсатини кенгайтирмоқда. Унинг бу ёвуз сиёсатига қарши чиқиб интернет тармоқларда ҳақ сўзни айтаётган мўмин ва мўминаларни аёвсиз жазолаш билан ҳукумат ўзининг қанчалар заиф эканлигини кўрсатмоқда. Улар имкониятидаги барча воситаларни ишга солса ҳам даъват йўлига тўсиқ қўя олишмайди. Чунки бу малай ҳукумат кофир Ғарб ва Россияга таяниб, улардан халқни манипуляция қилиш усулларини олишмоқда. Биз мусулмонлар эса, Аллоҳга суяниб, зулм ва адолатсизликка қарши курашиш усулларини Росулуллоҳ ﷺдан олишимиз лозим. Дин душманлари Росулуллоҳ ﷺга эргашиб куфр ва залолатни фош қилган саҳоба р.а.ларнинг бошига қийинчиликларни тўхтовсиз солишган эди. Уларнинг бошидаги зулмлар Мадинада давлат тиклангунига қадар давом этди. Бугунги мусулмонлар ҳам ғарб тиқиштираётган фасод демократияни таг-томири билан қўпориб ташлайдиган Рошид Халифаликни тиклаш учун ҳаракат қилмас эканлар, бузғунчи гендер тенглик масаласини улоқтириб ташлаш ҳам, Аллоҳнинг буйруқ-қайтариқларига эмин-эркин амал қилиш ҳам имконсиз иш бўлиб қолаверади.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

01.08.2022й