“Зиндон хотиралари” туркумидан

بسم الله الرحمن الرحيم

Маълумки, “Зиндон хотиралари” туркумини муқаддимасида Сиз азиз ўқигувчиларга 1998-2021 йиллар давомида Ўзбекистон қамоқхоналарида Ҳизб ут-Таҳрир аъзолари ва бошқа мусулмонларга нисбатан қилинган муомалалар, қийноқлар ва қатллар хусусида ҳикоя қиламиз, деган эдик. Аслида ҳам шундай эди. Чунки золим биринчи президент ўлиб, ўрнига Ш. Мирзиёев давлат раҳбари бўлиб келгач, аввалги қатағон йилларни “ахлат тузум” деб атади. Халқ Мирзиёевнинг “энди янгича ишлаймиз”идан умидланди. “Одам кўпайсин”га қамалган диний фаолиятда гумонланган маҳкумларда озодликка чиқиш ишончи пайдо бўлганди. Чунки жазо муддатини тугатган диний ишларда айбланган маҳкумларни ҳам фикридан қайтганми, йўқми – фарқсиз қўйиб юбора бошланганди. Аммо бугун ўша “ахлат тузум” шарпалари аста-секин қайта намоён бўлаётганига барчангиз гувоҳсиз! Афсуски, ҳозирда Ўзбекистон қамоқларида Аллоҳ ва Росулига бўлган муҳаббати туфайлигина жазоланиб, берилган муддатни аллақачон ўтаб бўлганига қарамай, яна янги муддатлар ортидан ҳануз қамоқда қолиб кетмоқдалар.

Шу сабаб уларнинг бугунидан ҳам сизларни гувоҳ қилишга ўзимизда мажбурият ҳис қилмоқдамиз. Шу боис “Зиндон хотиралари” номли туркумимизда 1998–2021 йиллардангина эмас, балки зиндоннинг шу кунларидан ҳам сизни воқиф қилиб борамиз.

Навбатдаги суҳбатимиз айни Мирзиёев даврида содир бўлган воқеалардан бири ҳақида бўлади.

Шу саволни беришим керак

Диний фаолиятда бўлган… дея бўйнига бир дунё “айб”ни юклаб, қамаб ташланганлар эрталабки “проверка”дан ҳар бирининг қўлида бир парча қоғоз билан қайтишди. Қизиқдим, “у қандай қоғоз, унда нима ёзилган экан?”

Сектор четидаги чинор тагида ўтирган Хоразмлик йигитни кўриб қолиб, олдига бордим. У танишганимиздан буён “менга намоз ўқишни ўргатинг, ака” деб юрарди. Қарасам, қўлидаги қоғозга термулиб, нималарнидир пичирлаяпти. Ёнига ўтириб:

– Парча қоғоздан бошингизни кўтаролмай қолдингизми, жўра? – деб гап бошладим. У тишини кўрсатмасдан лабини қимтиб нимтабассум қилди-да, ёнидаги кружкасини менга суриб “ичинг” деб ишора қилди ва:

– Зонага домлалар келаркан, шу саволни уларга берсам авфга тушармишман, – деб, қўлидаги қоғозни менга узатди. Ўқидим, унда:

“Сизларнинг зоналарга уюштираётган зиёратларингиз туфайли менга ўхшаб адашган маҳкумлар тўғри йўлини топиб, хатоларини англаб етяпти. Бунинг учун сиз устозлардан миннатдормиз. Мумкин бўлса, зоналарда алоҳида дарсликлар ўтишга мутахассислар жўнатсангиз, зора бошқалар ҳам тушуниб, хатоларини англаб тавба қилса ва оилалари бағрига қайтса”, – деб ёзилган экан. Мен у биродарга беихтиёр савол бердим:

– Қамалганингиздан бери “қайтдим”дан бошингиз чиқмаган бўлса, ҳеч қандай гуруҳга алоқангиз бўлмаса, улар туфайли нимадан қайтдингиз?

– Ростини айтсам, мен номозниям шу ерга келиб ўзиздан ўргандим, биласиз! Аслида мен оддий бир “Дамас”да кира қиладиган таксичи эдим холос. Машинамга чиққанларни бир тўда автомат кўтариб олган маскали ваҳима одамлар пойлаб келган экан, мени ҳам ўшаларга қўшиб “ҳисобга тўғри бўлади” деб қўлимни қайириб, оппоқ Нексияга босиб, апил-тапил мелисахонага олиб кетишди. Роса дўппослаб, кейин қамашворганди. Терговни эслашдан ҳам қўрқаман. Онангни эмгурлар, мени “ҳизбийсан, нақипсан” деб ураверишди. Мен нима қилишим керак эди? Битта ҳали чақалоқ ўғлим бор, қари отам бор. Ўлиб қолсам бўлмейди деб, нима десейлар мен ўшанақа одамман деб қутулдим… Кейин билсам, битта сизлардақани ушласа, ҳукумат пул тўлайди экан уларга, – деди.

– Хўп тушунарли, лекин сиз ўн йилдан бери шунақа тадбирларда қатнашганингизнинг фойдаси бўлмади-ку, нимага умидвор бўлаверасиз, жўра? – дегандим,

– Қўяверинг жўра, ҳеч бўлмаса сизларни қийнаб вымогать қилишаётган пайтда “сен кетавер” деб урмасдан, тек қўйиб ётоққа жўнатворишяпти-ю. Шуям катта гап, дейман-да, – деб, чойдан бўшаган кружкасининг ҳалқасига бармоғини тиқиб асабий ҳолда айлантира бошлади…

Аслида золим Каримов даврида ҳам, ундан кейин ҳам қилган даъвати, эшитган маърузаси, жўнатган нашидаси ва босган “лайк”и учун қамалганларнинг ҳаммаси ноҳақдан қамалган мазлумлардир. Чунки биз мусулмонлар учун Аллоҳ таоло ҳаром қилган ва гуноҳ деган ишларгина жиноят ҳисобланиб, уларга қўл урган кимсаларни жиноятчи, дейилади. Демак, бугунги кунда мусулмонни террорист, экстремистга чиқариб, турли мотивлар билан айбдор қилаётган ва устидан ҳукм ўқиб жазолаётганларнинг ўзлари аслида ҳақиқий жиноятчилардир. Далилимиз шуки, Аллоҳ таоло дейди:

إِن يَثْقَفُوكُمْ يَكُونُوا لَكُمْ أَعْدَاءً وَيَبْسُطُوا إِلَيْكُمْ أَيْدِيَهُمْ وَأَلْسِنَتَهُم بِالسُّوءِ وَوَدُّوا لَوْ تَكْفُرُونَ

– “(Эй мўминлар), агар улар (мушриклар) сизларга зафар топсалар душманларингиз бўлурлар ва сизларга қўл ва тилларини ёмонлик билан чўзурлар (яъни сизларни ўлдирурлар, ҳақорат қилурлар ва сизларга зулм етказурлар).      (Мумтаҳана:2)

Бу оятда гап Маккада Расулуллоҳ ﷺ ва у кишига эргашган саҳобаларга қарши курашган мушриклар ҳақида кетмоқда. Уларни Аллоҳ таоло суранинг аввалида عَدُوِّي وَعَدُوَّكُمْ – “Менинг душманим ва сизларнинг душманларингиз…ни” демоқда. Демак, мусулмон кишига тили ёки қўли билан озор етказаётганлар – гарчи мусулмонликни даъво қилаётган бўлса ҳам – ё Аллоҳнинг очиқ душмани ёки Аллоҳнинг душманига хизмат қилаётган, динини, охиратини озгина матога сотиб кун кўраётган малай, хоин кимсадир. Аллоҳнинг душманидан ҳам ва унинг хизматида бўлиб, малайлик қилаётган кимсадан ҳам жиноятчироқ ким бор?! Аллоҳим, бутун оламдаги, жумладан Ўзбекистон қамоқхоналаридаги барча мазмум ва мазлумаларга Ўзингни буюк нусратинг ила тез кунларда нажот бер. Амин.

(“Одам кўпайсин”га қамалганни эслаганим – ўша хотиралардан)

Ҳизб ут-Таҳрир Ўзбекистон матбуот бўлими аъзоси Зайниддин

26.08.2023й