Ўзбек ҳукумати қабул қилган концепция халқимизнинг Исломийлашишига қарши қаратилган навбатдаги зарбадир
Ўзбек ҳукумати қабул қилган концепция халқимизнинг Исломийлашишига қарши қаратилган навбатдаги зарбадир
بسم الله الرحمن الرحيم
Жорий йилнинг 20 феврал куни Сенатнинг тўртинчи ялпи мажлисида “Ўзбекистон Республикасида фуқароларнинг виждон эркинлигини таъминлаш ва диний соҳадаги концепциясини тасдиқлаш тўғрисида”ги қонуни кўриб чиқилиб, бир овоздан маъқулланди. Концепция лойиҳаси 31 январдан 10 февралгача жамоатчилик муҳокамаси учун эълон қилинди. Депутат Жаҳонгир Ширинов бундай ҳужжатнинг қабул қилинишига важ-карсон сифатида диний соҳадаги давлат сиёсатини аниқ кўрсатилмаслиги унинг аҳоли ўртасида турлича тушунилишига, дунёвий давлат асосларининг бузиб талқин қилинишига, жамиятда зиддиятларнинг кучайишига олиб келиши мумкинлигини таъкидлади. Маърузачи, шунингдек, ижтимоий муносабатларга муайян бир динга хос қоидаларни жорий этиш, аёллар ва эркаклар ҳуқуқлари тенглигини шубҳа остига қўйиш, айрим давлат хизматчиларининг дунёвий давлатчилик моҳиятини теран англамаслиги, жамият тараққиёти, бирдамлиги ва барқарорлигига путур етказувчи қонунга хилоф ғоялар, ижтимоий ахлоқ нормалари, миллий ва умуминсоний қадриятларни инкор этиш, тиббий хизматдан, илм-фан ва маданият ютуқларидан фойдаланишга бўлган ҳуқуқларни чеклашга қаратилган ғоя ва қарашлар тарқалиши ҳолатлари учраётганини қайд этди.
Концепцияни ўрганиб чиққан ҳар қандай ақли расо киши унда бирор яхшилик йўқлигини англаши қийин эмас. Дарҳақиқат, лойиҳа муҳокамасида қолдирилган шарҳлар орасида шундай фикрларни ҳам учратиш мумкин. Умуман олганда, ушбу билдирилган муносабатларда бундай ҳужжат бошқа бирор динга эмас, яна айнан Исломга қарши қаратилганлиги, ўзи шундай ҳам Исломга қаршиликлар тўлиб-тошиб кетгани ва бу ҳужжат орқали бундай қаршиликлар янада кучайиши таъкидланган. Ҳа, албатта, булар жуда тўғри фикрлар. Агар яна муҳокама диққат билан кузатилса, унда ўзбек ҳукуматининг ёлланма “трол”лари ҳам иштирок этгани сезилади. Чунки шарҳлар орасида лойиҳани мақтаб талқин қилган бир хил шаблонли фикрлар кўп такрорланганини илғаш мумкин. Концепция лойиҳаси муҳокамалари юзасидан қуйи палатанинг Халқаро ишлар, мудофаа ва хавфсизлик масалалари қўмитаси раиси Улуғбек Шерматовнинг маърузасида, жумладан, шундай дейилади: “Концепция лойиҳаси бўйича муҳокамаларда барча юртдошларимиз катта қизиқиш билан иштирок этиб, ўз таклиф ва фикр-мулоҳазаларини билдирди. Жамоатчилик муҳокамаси жараёнида аҳолидан 400 тадан ортиқ изоҳлар, таклиф ва тавсиялар келиб тушди. 270 дан ортиғи Концепция лойиҳаси юзасидан ижобий фикрга асосланган”. Кутилганидек, мазкур ҳужжатни Ўзбекистон мусулмонлари идораси ҳам қўллаб-қувватлади. Албатта, муҳокамадаги бундай қинғирликлар ва диний идоранинг ҳам қўллови гўё халқ концепцияни ёқлади, деган тасаввурни ҳосил қилиш учун қилинди.
Энди концепцияни ўзига келсак, у асосидан бошлаб Исломга зид эканлигини, сарқит дунёвийлик-демократияни халқимиз, жумладан, ёшлар ва давлат хизматчилари учун дастури амал қилишдаги навбатдаги қадам эканлигини тушуниш қийин эмас. Концепцияда кўрсатилган Ўзбекистон Республикасининг диний соҳадаги давлат сиёсатининг асосий принципларининг ўзиёқ шунга далолат қилиб турибди. Ушбу принциплар қуйидагилар:
қонунийлик;
виждон эркинлиги;
диннинг давлатдан ажратилганлиги;
тенглик;
эркин фикрлаш;
динлараро мулоқот ва ўзаро тушуниш.
Масалан, Исломда виждон эркинлиги йўқ. Ҳар ким ўзи хоҳлаган динга эътиқоди қилиши ёки ҳеч қайси динга эътиқод қилмаслик ҳуқуқи йўқ. Бу ўринда, “динда мажбурлаш йўқ” деган ҳукм эмас, балки Исломга кирган инсон хоҳласа диндан чиқиб, муртад бўлиши мумкин эмаслиги назарда тутиляпти. Шунингдек, қолган дин вакиллари ёки динсизларга ҳам ўз эътиқодингизда қолаверинг, дейилмайди. Балки улар мажбурланмаган ҳолда, “ҳикмат ва чиройли насиҳат билан даъват қилинади ҳамда энг гўзал услубда улар билан мунозара қилинади”.
Диннинг давлатдан ажратилганлиги ҳам Исломга тамоман зид келади. Чунки Ислом давлат бошқаруви, таълим, иқтисод, тиббиёт, ташқи ишлар, мудофаа, хавфсизлик каби барча соҳаларни қамраб олувчи шаръий аҳкомлардан иборат. Динни фақат шахсга оид қисмини олиб, қолганини ташлаб юбориш куфрдир. Исломни ҳаётга, демакки, давлат ишларига аралаштирмаслик ҳам куфрга кетиш ҳисобланади. Зеро, Ислом инсон ҳаётининг барча соҳаларини қамраб олувчи мукаммал илоҳий низомдир.
Динлараро мулоқот ва ўзаро тушунишнинг дунёвий давлат талқинидаги маъно-мазмуни шундан иборатки, унда Ислом қолган барча конфессиялар билан бир қаторга қўйилади. Гўё бошқа динлар ҳам ўзича ҳақ, улар ҳам тўғри ва инсон улардан қайси бирига эътиқод қилса ҳам унга “сен нотўғри динга эътиқод қиляпсан, нотўғри йўлдасан” дейилмайди. Балки бу унинг ҳуқуқи, дея “тўғри тушунилади”. Шунингдек, кофир, ғайримусулмон, ботил эътиқод каби тушунчалар ҳам мусулмонлар онгидан ўчирилади. Балки ғайримусулмонлар ҳам мусулмонларнинг дўсти, гарчи Исломга зид келса ҳам уларнинг ботил эътиқодларига тоқат қилиб, улар билан келишиб, муроса-ю мадора қилиб яшашимиз керак, деган тушунчалар сингдирилади. Бир сўз билан айтганда, ҳақни ботил билан аралаштиришга йўл қўйиб берилади. Исломда эса Исломий бошқарув остидаги зиммийларга (ғайримусулмон фуқаролар) шаръий ҳукмлар доирасида муомала қилиниб, уларнинг ҳақ-ҳуқуқлари тўла кафолатланади ва мажбуриятлари белгилаб берилади. Аммо уларнинг эътиқодига хайриҳох бўлинмайди, маъқулланмайди, янги ибодат масканлари қуриб берилмайди. Исломий жамиятда умумий ҳаётда шаръий ҳукмларга амал қиладилар, хос ҳаётларида ўз эътиқодига кўра яшашларига қўйиб берилади. Юқорида айтилганидек, мажбурланмаган ҳолда Исломга даъват қилинадилар… Энди кофир мустамлакачи давлатларга келсак, улар билан муроса-ю мадора қилинмайди. Балки улар билан ҳам шаръий аҳкомларга кўра муомала қилинади. Жумладан, уларга қарши жиҳод қилинади, сулҳ тузилади ва ҳоказо.
Ҳужжатда диний соҳадаги давлат сиёсатининг асосий вазифалари ҳам белгилаб қўйилган. Масалан:
– фуқароларнинг динга муносабатидан қатъий назар, диний қарашларни мажбуран сингдиришга йўл қўймаган ҳолда, уларнинг виждон эркинлигига бўлган конституциявий ҳуқуқларини амалга ошириши учун шарт-шароитлар яратиш.
Бундан шуни тушуниш мумкинки, мусулмон халқимиз ўзидаги Исломий тушунчалардан келиб чиқиб фикр билдириш ҳуқуқига эга эмаслиги янада мустаҳкамлаб қўйилмоқда. Бу эса Ислом тугул, ҳукумат оғиз кўпиртириб гапираётган дунёвий давлатмиз, деган даъволарига ҳам тўғри келмайди. Чунки бу улар даъво қилаётган фикр эркинлигига тўғри келмайди. Демакки, фикр эркинлиги қачонки Исломий кўзқарашдан бошқача бўлса, ана ўшандагина ишлаши мумкин холос. Бунга сон-саноқсиз мисол ва далиллар бор. Хусусан, қайси бир мусулмон Ислом асосида фикр билдирса ёки бирор амалга қўл урса ё ҳатто Жума муборак, деган хабар жўнатса ҳам жазога тортилаётгани ҳеч кимга сир эмас. Бироқ кимдир бузуқ, беҳаё гапларни омма олдида гапирса, шунга чақирса, ҳокимлар одамларни куракда турмайдиган сўзлар билан сўкса, худосиз-атеист кимсалар Ислом муқаддасотларига дахл қилиб, таҳқирласа… – буларга ҳеч қандай чора йўқ. Албатта, фикр эркинлиги деган нарса демократиянинг ғирт иккиюзламачи эканлигини яққол намоён қиладиган бузуқ қадриятларидан биридир.
– давлат хизматчиларининг ўз касбий фаолиятида ва функционал вазифаларни бажаришда бирор-бир динга ёки эътиқодга устунлик беришига ёхуд бирор-бир динни ёки эътиқодни камситишига йўл қўймаслик.
Бу ўринда эса, давлат хизматчилари – хусусан, хавфсизлик соҳаси ходимлари ва армияда хизмат қилаётганлар ҳам – ўзларининг Исломий тушунчаларидан келиб чиққан ҳолда вазифаларини бажаришларига йўл қўймаслик назарда тутилади. Яъни ўз хизмат вазифасини бажаришда умуман Исломни аралаштирмасликлари талаб қилинади. Бинобарин, ҳалол-ҳаром, гуноҳ-савоб каби Исломий ўлчовларга умуман эътибор бермасликлари, уларга амал қилмасликлари кераклиги ҳам назарда тутилмоқда. Шунингдек, иш вақтида намоз ўқимаслик, Жума намозига бормаслик, соқол қўймаслик ва ҳатто рўза тутмаслик каби ғайриисломий ишларга мажбурланишлари ҳам тушунилади. Аслида, бу бўйича яширин буйруқлар аллақачон ишга тушиб бўлган.
Албатта, халқимизнинг Исломийлашувига қарши курашда сийқаси чиққан “радикал диний оқимлар, экстремистик ва террористик ташкилотлар ғояларига қарши кураш” деган нарсага ҳам алоҳида ўрин берилган. Жумладан, диний радикаллашувга, яъни шахсий диний қарашлар асосида маълум бир диннинг ёки конфессиянинг бошқаларига нисбатан устунлигига… радикал диний оқимлар, экстремистик ва террористик ташкилотлар ғояларига қарши курашиш ва уларнинг мафкураси тарқалишининг олдини олиш… радикал диний оқимлар, экстремистик ва террористик ташкилотлар ғоялари таъсирига тушиб қолган шахсларни, айниқса, ёшларни ижтимоий мослаштириш… ахборот маконида диндан қонунга хилоф равишда ва сиёсий мақсадларда фойдаланиш ҳолларини аниқлаш ҳамда уларга нисбатан қонунда белгиланган чораларни кўриб бориш каби ишлар ҳам белгиланган. Бунга ортиқча изоҳ беришга ҳожат йўқ. Ҳозирда мусулмон халқимиз ҳам бундай алдов-ёлғонларга учмайдиган бўлиб қолган.
Албатта, концепциянинг ҳар бир бандини мана шундай тарзда таҳлил қилиб чиқилса, унинг Исломга тамоман зидлиги келиб чиқаверади. Шунинг учун уларнинг ҳар бирига киришиб ўтирмаймиз.
Шуни алоҳида таъкидлаш керакки, мазкур концепция муқаддас Рамазон ойи кириши арафасида қабул қилинмоқда. Демак, ушбу қутлуғ ойда мусулмонлар орасида иймоний муҳитнинг кучайиши, яхши амаллар қилишга бўлган рағбатининг янада ортиши ҳам ҳисобга олинганини билдиради. Зеро, бу ҳужжат қабул қилиниши ҳам, муҳокамаси ҳам, сўнг бир овоздан тасдиқланиши ҳам жуда қисқа вақт ичида ва шошилинч амалга ошди. Гўё энг юқори идорадан “Рамазон ойигача қабул қилиб улгуринглар” деган қатъий буйруқ бордек.
Умуман олганда эса, мазкур ҳужжатдан ёшлар ва давлат хизматчиларидан тортиб оддий фуқарогача Исломга нисбатан ортиб бораётган оммавий интилиш ва рағбатни йўқотиш ё ҳеч бўлмаса камайтириш қасд қилинган. Шунингдек, сарқит дунёвий-демократик принцип ва қонунларни ҳамда уларга мутеларча кўникишни мусулмонлар ақли ва қалбига мажбуран сингдириш мақсади ҳам бор. Бу ўринда, Исломийлашишга тўсиқ қўйиш ва дунёвийлаштириш борасидаги мавжуд қонун ва қарорлардаги бўшликлар ҳам мумкин қадар тўлдирилган, десак нотўғри бўлмайди. Минг афсуслар бўлсинки, ўзбек режими анави Америка, Хитой ва Россия каби кофир мустамлакачи “оға”ларини рози қилиш учун яна бир жиддий қадам ташламоқда. Зеро, бундай ҳужжат жамиятимиздан Ислом ва унинг аҳкомларини йироқлаштириб, ботил ва бузуқ демократиянинг томир отишига шароит яратиб беришдан бошқасига хизмат қилмайди.
Булардан хулоса қилиш мумкинки, ўзбек режими Исломга амал қилиб, Исломий даъватни кўтариб чиқаётган ва ўзида унинг катта-ю кичик белгиларини намоён қилаётган мўмин ва мўминаларни, ҳа, айнан шуларни ўз ҳокимияти учун энг катта хавф деб билмоқда. Аниқроғи, бу режим Америка, Россия ва Хитой каби кофир мустамлакачилар этагини тутиб, хавф-хатарни уларнинг талқини бўйича англаб, асосан мусулмонлардан хавотир ҳис қилмоқда ва бунинг натижасида Исломга қарши курашда мустамлакачиларга кўр-кўрона эргашмоқда. Афсуски, бу режим ўзининг мусулмон халқига таяниш, халқнинг Исломга бўлган муҳаббати ва интилишини кўра била туриб, ана шу илоҳий дастурни маҳкам ушлаш ўрнига, анави кофир мустамлакачи “оға”ларига суянишда давом этяпти. Нақадар адашмоқдалар-а!
Бироқ шуниси аниқки, Ҳақ таолонинг неъмати бўлмиш Ислом мусулмонларда Аллоҳнинг адолатли илоҳий низомини ҳаётда татбиқ қилиш учун курашувчанлик ва саботни пайдо қилади. Ҳукуматнинг Ислом ва мусулмонларга қарши қаратилган қатор қонун ва қарорлари энди халқимизни бундай шарафли ишни амалга оширишдан тўхтатиб қололмайди. Шунинг учун ўзбек ҳукумати ҳали вақт ва имкон борида ақл-ҳушини йиғиб олиб, Ислом ва мусулмонлар тарафига ўтиши шарт. Акс ҳолда ўзи суянаётган кофир мустамлакачилар билан бирга Аллоҳнинг лаънати ва ғазабига мубтало бўлиши муқаррардир. Шунингдек, бундай ғайриисломий қонун ва қарорларни дастаклаб, ҳукуматнинг яроқсиз, ёмон бошқарувига хизмат қилаётган дин уламоларини ҳам огоҳлантириб ўтамиз! Сизлар ҳам мана шундай ноҳақлик ва зулмни оқлашга, хаспўшлашга қаратилган ноўрин ишларингиз билан халқ ишончидан чиқдингиз. Ҳеч бўлмаса, Аллоҳнинг олдида юзи қароликдан қўрқсангиз бўлмайдими?!
Бугун дунёда яшин тезлигида содир бўлаётган воқеа-ҳодисалар шуни кўрсатмоқдаки, Халифалик тонгги отишига жуда оз вақт қолди. Мусулмонлар Аллоҳнинг нусрат-ёрдами билан хурсанд бўладиган, кофир қавм ва уларнинг малайлари, уларга хайриҳох бўлганлар, улардан ечим излаганлар… ер тишлайдиган кунларга ҳам, иншаАллоҳ, жуда яқин қолдик. Бас, ҳар ким ўз тарафини – куфр ёки иймон, зулм ёки адолат тарафини танламоқда. Ва, албатта, ҳар ким мана шу танловига кўра Аллоҳнинг олдида ҳисоб беражак!
لِلَّهِ الْأَمْرُ مِن قَبْلُ وَمِن بَعْدُ ۚ وَيَوْمَئِذٍ يَفْرَحُ الْمُؤْمِنُونَ ﴿٤﴾ بِنَصْرِ اللَّهِ ۚ يَنصُرُ مَن يَشَاءُ ۖ وَهُوَ الْعَزِيزُ الرَّحِيمُ
– “Аввалу-охир барча иш Аллоҳнинг (измида)дир. Ўша кунда мўминлар Аллоҳ (уларни) ғолиб қилгани сабабли шодланурлар. (Аллоҳ) Ўзи хоҳлаган кишини ғолиб қилур. У қудрат ва раҳм-шафқат эгасидир”. (Рум:4-5)
Ҳизб ут-Таҳрир Ўзбекистон матбуот бўлими аъзоси Форуқ
26.02.2025й
